أكياس تغليف مقلمة

العميل : السلام عليكم
شركة منسي للبلاستيك
العميل : كنت عاوز أسأل على كيس بلاستيك بسوستة
مقاس حوالي 10 × 25 يا ترى ألاقي وسعر الألف كام
المهندس منسي : هو إحنا عندنا كل أنواع الأكياس موجودة، بسوستة، ومن غير سوستة، واللامينيشن، والألومنيوم فويل، والميتالايز… كله موجود
فهو أسعار الأكياس بالذات ما نقدرش نحدد أسعارها كده في الشات لأنه مش عارفين ذوق الكيس اللي هيعجبك إيه
المهندس منسي : اتصل بنا في الفروع التي تناسبك/ ماكينات تعبئة وتغليف:
ستجد عناوين وتليفونات ولوكيشنات فروع شركة المهندس منسي في هذا الرابط:
العميل : السلام عليكم
متشكر جداً على السرعة في الرد والاهتمام، بس المشكلة والله إني بره مصر، وعندي مصنع في مصر بنصنع المقلمة بتاعت الأطفال، وهبعت لحضرتك صورة لها دلوقتي يعني، هو أنا عايز كيس مناسب ليها يكون بسوستة، فعايز أعرف سعر الألف بتاعه هيكون كام عشان أعرف هل هينفع معايا ولا أعبيها في الكيس العادي يعني، ومتشكر جدا
العميل : ولو ممكن صورة للكيس المناسب
جزيل الشكر والتقدير
المهندس منسي : هو المقاس كام طول × عرض؟
العميل : هو طول المقلمة يا فندم حوالي 22-23 سم، والعرض حوالي 10 سم، مش مشكلة يبقى أزيد 1 سم من هنا، 1 سم من هنا.. مافيش مشكلة
المهندس منسي : سمك المقلمة أد إيه؟؟ التخانة
العميل : بعد ما يتحط فيها قطعة اسفنج مش هتقل عن 6 سم تقريباً
كده حضرتك هتحتاج كيس مقاسه 17.5 × 25، ده سعره هيبقى في حدود من 65 قرش إلى جنيه
العميل : آسف لتعبك ممكن صورة بس ليه وهل ممكن طباعته
المهندس منسي : اتصل بنا في الفروع التي تناسبك/ ماكينات تعبئة وتغليف:
ستجد عناوين وتليفونات ولوكيشنات فروع شركة المهندس منسي في هذا الرابط:
المهندس منسي : ده تليفون المبيعات، تابع بقى معاهم وخليهم يبعتوا لك صور للأكياس، لأنه في أنواع من الأكياس، في نوع اسمه لامينيشن، وفي نوع اسمه ميتالايز، وفي نوع اسمه ألومنيوم فويل، فخليهم يبعتولك صور للأكياس دي
في نوع رابع اسمه بيبر، ده بيبقى ورق على لامينيتد، اللي هو ورق على بلاستيك، وفي ورق على ميتالايز، وفي ورق على ألومنيوم فويل يعني في أنواع كتيرة عموماً
المهندس منسي : ولكن يفضل إن حضرتك تبعت لنا صورة من الكيس اللي حضرتك عايزه، لأن إحنا بنتكلم كده في الـ 6 أنواع دول في تحت كل نوع حوالي قول 50 مواصفة، يبقى هو كده محتاج يبعت لك صور لـ 300 كيس، فهمتني، فلما إنت تجيب لنا كيس وتقول عايز زي ده ده بيبقى أفضل حل
العميل : معلش يا باش مهندس هتعب حضرتك تاني لأني قلت لحضرتك إن أنا بره، هو أنا أول مرة السنة دي هعبي في كيس، أنا كنت بعبي قبل كده في حاجات تانية خالص، فأستأذن حضرتك من خلال خبرة حضرتك والصورة اللي أنا بعتها لك فحضرتك ترشح لي خامة تكون محترمة، يعني عايز خامة يكون تسعيرها معانا لغاية جنيه، جنيه وحاجة برده مايجراش حاجة، بس أهم حاجة تكون حاجة محترمة، وتكون حاجة تشد يا باش مهندس، يكون شكلها كويس وتشد
العميل : هو معنى ميتالايز إنها بتلمع مثلاً؟ تكون شاين شويه بتلمع يعني حضرتك تقصد؟ فلو حضرتك رشحت لي نوع أو 2 بحيث إن أنا لما أكلمهم في المبيعات زي ما حضرتك بتقول ما يقولوش يا باشا إحنا هبعت لك 300 صورة، فحضرتك بس لو ترشح لي في المقاس اللي إحنا قولنا عليه نوع أو 2 أو 3 بحد أقصى وأنا هتابع معاهم أقولهم ابعتولي الصور والحاجات دي، متشكر جداً لتعاون حضرتك والله يا باش مهندس، متشكر جداً، وأنا أول ما أرجع هاجي أتشرف بحضرتك، بس هي المشكلة إن الوقت ضيق قوي، فأنا حابب إن الموضوع ده أنجزه وأنا هنا وأبعت لحد ياخد منكم الحاجة ويحاسبكم عليها إن شاء الله، شكراً لحضرتك، وكل سنة وحضرتك طيب
المهندس منسي : بص هو اللي هيناسب حضرتك هو الميتالايز بولي إيثيلين، يعني هيبقى بولي إستر ميتالايز بولي إيثيلين، بنسميه اللي هو البست الإيطالي، ليه؟؟ لأن إنت عايز مظهر، وفي نفس الوقت اللحام يكون شديد، فالنهاردة لو حضرتك أخدت ميتالايز 20-20 اللحام هيبقى ضعيف، فالنهاردة تاخد ميتالايز يبقى الشكل بتاعه رائع، ومدي شكل الفضة كده، وفي نفس الوقت اللحام بتاعه شديد، يبقى لما تيجي تكلمه قوله بست إيطالي، بولي إستر ميتالايز بولي إيثيلين
المهندس منسي : طيب دلوقتي المنتج بتاع حضرتك هيخش في الميتالايز فهيداره، فممكن تعمل إيه بقى؟؟ ممكن تعمل استيكر بصورة المنتج اللي جوه وتحطها على الكيس، يبقى إنت ظهرت المنتج أهو بشكل تسويقي رائع كده وتقوم طابعه على ليبول وتقوم لاصق الليبول ده على الكيس
العميل : معلش يا باش مهندس دوشتك معايا، متشكر جداً على الحلول دي، بس يا باش مهندس معلش أنا عاوز حاجة لازم يكون الوش بتاعها شفاف، يعني يا إما الوش شفاف يا إما الوش والظهر شفاف، أسوأ حاجة لازم يكون الوش شفاف، لأنه مش هينفع كده هتبقى تكلفة زيادة إن أنا أطبع وأحط استيكر من بره والكلام ده كله، معلش هتعب حضرتك تاني، حاجة يكون الوش بتاعها شفاف عشان المنتج لازم يبان، مش هينفع إن أنا أطبع استيكر وليبول والكلام ده، أنا عارف إن أنا أزعجت حضرتك أنا آسف يعني
المهندس منسي : لا ولا يهمك عادي مافيش مشكلة، لو حضرتك عايز الوش شفاف يبقى حاجة اسمها أكياس اللامينيشن، اللي هو بولي إستر بولي إيثيلين، أو بولي إستر بولي بروبلين
العميل : متشكر جداً على تعبك والاهتمام بس أنا بعتلهم على التليفون بس غالباً مواعيد العمل انتهت، إن شاء الله أتواصل معاهم بكرة ولا الجمعة عندكم أجازة؟
العميل : ما هي المشكلة بقى إن أنا بره مصر، هخلي حد في مصر بقى يكلمهم ويتواصل معاهم
العميل : بقول لحضرتك أنا بعت لحضرتك الكيس ده، مش هو ده أكياس اللي عند حضرتك حاجة شبيهة بكده بتبقى بسوستة بس مش ظاهرة شويه مضبوط؟ ولا الأكياس اللي عند حضرتك ليها شكل تاني، مش حاجة قريبة من اللي أنا بعتها لحضرتك دي؟
المهندس منسي :آه هي الأكياس دي، الأكياس دي حاجة اسمها لامينيشن، لامينيشن يعني بولي إستر مبطن بالبولي إيثيلين، أو بولي إستر مبطن بالبولي بروبلين، أو باي أوريانتد بولي بروبلين بلانت مبطن بالبولي إيثيلين، أو باي أوريانتد بولي بروبلين بلانت مبطن بالبولي بروبلين، ولكن هو الأفضل والأجود البولي إستر المبطن بالبولي إيثيلين، أو البولي إستر المبطن بالبولي بروبلين، دول أجود في النوعية دي
العميل : تمام أنا هبعت حد ينظم معاهم في المعرض
العميل : بعد إذنك يا باش مهندس ممكن حضرتك تقولي المكان اللي في باب الشعرية ده فين بالضبط ومواعيدهم إيه؟ وأنا هبعت لهم حد النهاردة إن شاء الله ياخد منهم العينات عشان إن شاء الله الأسبوع ده نتفق على الحاجات اللي إحنا عايزينها؟ فبعد إذنك العنوان والمواعيد لو سمحت، متشكر جداً يا فندم
المهندس منسي :ستجد عناوين وتليفونات ولوكيشنات فروع شركة المهندس منسي في هذا الرابط:
المهندس منسي : هو ده الرابط بتاع العناوين كلها
ومواعيد العمل من الساعة الحادية عشر صباحاً حتى الساعة التاسعة مساء عدا يوم الجمعة الأجازة الأسبوعية
العميل : تمام
العميل : السلام عليكم
إزيك يا باش مهندس، إزي حضرتك عامل إيه كل سنة وحضرتك طيب، معلش أنا بعت حد فرع باب الشعرية دلوقتي وهو قدامه دقيقة أو دقيقتين يكون هناك، أستأذنك بقى تكلم لنا حد هناك تقوله على موضوع الكيس اللي كنت كلمت حضرتك عليه بتاع المقلمة تخليه معلش يديله كام عينة بالأسعار، وهو هيبعتها لي وأنا هبعت لحضرتك الكميات اللي إحنا عايزينها بإذن الله يعني، معلش يا باش مهندس بتعب حضرتك معاي جداً، السلام عليكم
المهندس منسي : لا خليه عادي يروح ويتعامل معاهم، ولو في أي مشكلة خليه يكلمني من هناك
العميل : باشا هيكلمك دلوقتي أ/ إياد هو واقف تحت الشركة كان نازل ماشي خلاص، أنا قلت له كلم الباش مهندس منسي، شوف بقى يا باش مهندس الأكياس دي موجودة ولا مش موجودة لأن أنا كده رحت المعادي وملقتش، وجيت باب الشعرية وملقتش، وأنا كنت بعت لحضرتك صورة لكيس زي اللي إحنا عايزنه حاجة زي كده يعني، هبعتها لحضرتك تاني يعني، وهو هيكلم حضرتك، السلام عليكم
المهندس منسي : هو أنا كلمتهم وفهمتهم كمان إن الأكياس موجودة في المخزن بتاعنا وهو هيجيب له عينات دلوقتي
المهندس منسي :وفي حاجة كمان تانية، حضرتك ممكن المقلمة دي تغلفها بطريقة اسمها طريقة تغليف بالشرينك، يعني وأنا بكلمه وكده تطرقت إليا الفكرة دي
المهندس منسي : نتائج البحث عن 101 ـ تعبئة وتغليف:
العميل : ماشي يا باش مهندس كتر خيرك، يا ريت يديله العينات بتاعت الأكياس، ويا ريت حضرتك توضح لي أكتر يعني إيه التغليف بالشرينك، تقصد الشرينك اللي هو الاسترتش بتاع الأكل يعني؟؟ لو الفكرة دي يبقى لا مش هينفع، ولا في فكرة تانية حضرتك تقصدها أنا مش واخد بالي
المهندس منسي : دي مجموعة فيديوهات هتلاقي فيها المنتج وهو بيتغلف بالشرينك، يعني مش المقلمة، هتلاقي فيها منتجات كتيييييييييرة قوي وهي بتتغلف بالشرينك، حاول تتفرج على أكبر كم ممكن من الفيديوهات عشان دماغك تطلع بفكرة جديدة، يعني لو اتفرجت على واحد هتقول لا دي مش تبعي وتقفل على كده، لا اتفرج على كمية كبيرة من الفيديوهات بحيث وإنت شغال دماغك تقول آه ده الفكرة دي تنفع معايا… فهمتني