خامات ألومنيوم فويل هارد خاص بالادوية من شركة المهندس منسي
| العميل | : | السلام عليكم |
| المهندس منسي | : | عليكم السلام ورحمة الله وبركاته |
| العميل | : | مع حضرتك سناء جمعة مدير مشتريات تو إز باك للطباعة والتغليف |
| المهندس منسي | : | أهلاً بيكي |
| العميل | : | أهلاً بحضرتك، معلش أنا أخدت الرقم من زميلة بس مش معايا الاسم، اسم حضرتك إيه بقى؟ |
| المهندس منسي | : | شركة المهندس منسي |
| العميل | : | آه أهلاً وسهلاً، أنا كنت بسأل على ألومنيوم فويل هارد بتاع الدواء هل يا ترى عندكم؟ |
| المهندس منسي | : | ألومنيوم فويل هارد 20 ميكرون |
| العميل | : | أيوه |
| المهندس منسي | : | موجودة عندنا وقلت لزميلة حضرتك إنها تشرفنا بالزيارة عشان تتفرج عليها |
| العميل | : | هي ستوكات ولا إيه؟؟ |
| المهندس منسي | : | لا والله مش ستوكات إحنا مستوردين أصليين، إحنا شركة المهندس منسي اسألي عنها في السوق، ونفس الكلام ده 4 شركات قالوها، هي كلمت أربع شركات والأربع شركات كلموني |
| العميل | : | أنا ما أعرفش، ممكن يكون حد تاني لتو إز باك، قالوا لك إن إحنا عايزين لتو إز باك؟ |
| المهندس منسي | : | بصي هو نفس الحوار ده كلمني فيه 4 شركات لغاية دلوقتي |
| العميل | : | أنا قلت لحضرتك هي زميلة واحدة |
| المهندس منسي | : | طب ماشي |
| العميل | : | عايزه أعرف المكان فين؟ وهل ممكن أبعت آخد عينة؟ |
| المهندس منسي | : | إن شاء الله، إحنا عندنا باب الشعرية، حدائق القبة، مدينة نصر، 6 أكتوبر، غمرة، العبور، والألومنيا موجودة بضاعة حاضرة حضرتك ابعتي حد يختار العينة اللي تعجبه |
| العميل | : | طيب أتواصل مع مين حضرتك عشان يديني الداتا شيت في الأول يبصوا عليها يشوفوها هي نفس الماتيريال اللي إنا بنستخمه ولا لأ؟ |
| المهندس منسي | : | نفس الكلام اللي قالته برده أول واحدة كلمتني، يا ست الكل إنتي اللي بتطلعيني على الداتا شيت وأنا أقولك يسوى كام؟ أما إن أنا.. |
| العميل | : | يعني أنا أقول لحضرتك المواصفات |
| المهندس منسي | : | إحنا عندنا أكتر من 3 آلاف مواصفة، يبقى هديلك كتيب فيه 3 آلاف مواصفة |
| العميل | : | طب ده عدد كبير قوي، طب ده هيشوف إيه، يعني أنا أبعت لك المواصفات اللي أنا عايزها والمقاسات |
| المهندس منسي | : | أيوه لازم تكوني محددة عايزه إيه عشان أقولك أيوه وأقوم مطلعها لك |
| العميل | : | طب عايزه أبعت لحضرتك الكلام ده على الإيميل بعد إذنك |
| المهندس منسي | : | آه |
| العميل | : | طب حضرتك ابعتلي الإيميل بتاع حضرتك وأنا هبعت لك على الإيميل |
| المهندس منسي | : | طب السؤال حضرتك شركة طباعة وتغليف؟ |
| العميل | : | آه.. إحنا بنطبع وبنورد لشركات دواء وكده |
| المهندس منسي | : | آه بتطبعوا روتو ولا فلكسو؟ |
| العميل | : | روتو وفلكسو، بس في الغالب روتو |
| المهندس منسي | : | عندكم مكن روتو؟ |
| العميل | : | عندنا مكن روتو |
| المهندس منسي | : | لغاية مقاس كام؟ |
| العميل | : | ممكن ناخد لحد مقاس 60 سم |
| المهندس منسي | : | بدايتكم 60 سم؟ |
| العميل | : | لا مش بدايتنا، العرض ممكن لحد 60، العروض بتاعتي المتاحة ستارتينج من 36 سم، وبعدين 410، 425، 450… لحد مقاس 60 ولا حاجة |
| المهندس منسي | : | اتشرفت بيكي، أقل كمية عندكم في الطباعة أد إيه؟ |
| العميل | : | يعني إيه؟ إحنا بنطبع في الشهر حوالي 30-40 طن |
| المهندس منسي | : | الأوردر الواحد يعني تكلفة السلندرات هل هي عالية؟ |
| العميل | : | لا أنا دي مش بتاعتي، أنا بشتري خامات أنا مش بيع، حضرتك لو عايز أي استفسارات عن البيع ممكن أدي لحضرتك رقم تتواصل معاه |
| المهندس منسي | : | آه.. ابعتي لي بقى البيانات بتاعتكم |
| العميل | : | بس يا ريت تبعتلي إيميل أحسن |
| المهندس منسي | : | ماشي |
| العميل | : | طب معلش اسم مين معايا |
| المهندس منسي | : | المهندس منسي |
| العميل | : | أوكيه يا فندم |
| المهندس منسي | : | أنا مش عارفه إزاي شغالة في المجال ما تعرفيش شركة المهندس منسي |
| العميل | : | أنا مش عارفة إزاي عند حضرتك خامات كده ومش عارف تتواصل مع العملاء اللي ممكن يشتروا منك، حضرتك اللي مش عامل برومشن ده موضوع تاني، حضرتك إحنا بندي لحضرتك المواصفة اللي إحنا شغالين بيها وحضرتك بتقولي إيه العروض اللي عند حضرتك والسعر كام ونجرب الأول في حاجة بكرة صغيرة نجربها، وحضرتك برده هتبعت لي الـ سي أو إيه والداتا شيت بتاعت البضاعة اللي عندك |
| المهندس منسي | : | إن شاء الله |
| العميل | : | ماشي يا فندم ألف شكر، مع السلامة |
