رولات تعبئة صوابع السكر
العميل : السلام عليكم مع حضرتك وائل محسن عايز اسئل على رولات تعبئة صوابع السكر
المهندس منسي : أهلاً وسهلاً بك اتفضل أنا معاك
العميل : تسلم
في انتظار عناوين الفروع عند حضرتك
المهندس منسي : اتصل بنا في الفروع التي تناسبك / ماكينات تعبئة وتغليف
ستجد عناوين وتليفونات ولوكيشنات فروع شركة المهندس منسي في هذا الرابط:
العميل : شكراً لذوقك
السلام عليكم، باش مهندس إزي حضرتك إن شاء الله تكون بخير
كنت كلمت حضرتك بخصوص رول ورق تعبئة أكياس السكر
المفروض كنا اتكلمنا أنا والأستاذ محمد والأستاذ حسن إن همه يجهزوا لنا عينة آخدها أوريها للشركة، الشركة دي من الشركات الكبيرة مش شركة صغيرة، فإذا كان همه بيستقلوا بالعينة فلأ العينة دي رايحة لشركة كبيرة مش شركة صغيرة، ودي لو إن شاء الله اتوافق على العينة هيتم توريد كميات كبيرة من الورق دوت، المفروض إن همه رجالة مبيعات فاهمين الموضوع ده كويس، إن لما أي حد ييجي يطلب عينة، العينة دي قلنا هندفع ثمنها أياً كانت هتطلع البكرة أو اللفة أياً كان الوزن بتاعها هاخدها وأدفع ثمنها، فهمه قالوا لي العينة دي المفروض تكون خلصت من إمبارح أو النهاردة، ولغاية دلوقتي بكلمهم ماحدش بيرد عليا، والأستاذ محمد كلمته وقالي هرد عليك النهاردة وماردش عليا برده
فحضرتك لو مش هتجهزوا لي العينة ممكن أشوفها عند حد تاني مافيش مشكلة، أو لو همه شايفين الموضوع مش مستاهل يبلغوني بس عشان ما أفضلش قاعد مستني والوقت يضيع عليا مع الشركة التانية
شكراً لذوقك تسلم
المهندس منسي : بص هو أياً كان العميل صغير أو كبير صدقني كله له عندنا احترامه وتقديره، ولكن في حاجات كده بتحصل غصب عنك، يعني أنا لسه ما كلمتهمش وعارف إيه اللي حصل، بص يا سيدي إحنا بتبقى عندنا الخامة، الخامة بتبقى رول، فبنحتاج نقطعها، إحنا عندنا مقصاتنا وكل حاجة، ولكن العمالة للأسف عندنا مش لقينها، فبنضطر نقص بره، يا اسطى فلان هتاخد البكرة توديها عند فلان القصاص، طب حاضر بكرة أصل أنا النهاردة عندي مشوار مش عارف إيه و.. و.. و.. يتنهم وراء الأسطى فلان عبال ما يفضى، طيب الأسطى فلان عبال ما يقص ويخلص لنا شغلنا بيكون مررنا ومرر عيشتنا، هو ده التعامل في مصر للأسف، هو الحل إنك تغير، ما هو عادي هتلاقي نفس المشاكل، وأتحداك هتلاقي نفس المشاكل، المنظومة نفسها بايظة، إحنا غصب عننا، نفسنا نبقى محترمين بس هنعمل إيه؟؟؟
أنا عارف ناسي كويس صدقني، يعني لا اتصلت بيهم ولا كلمتهم، بس عارف إيه اللي حصل، هو الناس الود ودهم يمدوا إديهم على الرف يجيبوا لك البكرة ويقولوا لك خد
العميل : باش مهندس منسي بسبب المواضيع بتاعت مصر دي أنا بجيب كرتون للعملاء في المغرب والأردن بجيب لهم كرتون من تركيا، تخيل بقى!!!!!! أسرع وسعر أقل وأحسن، بجد إحنا فعلاً عندنا مشكلة، عمرنا ما هنطور
الله يعينك يا باشا، مش عارف أقول لحضرتك إيه؟؟ بس على الأقل بقى قطع لنا بكرتين ـ 3 حطهم على الرف ممكن نحتاجهم في أي وقت بجد لأنه الموضوع بيبقى فيه أزمة كده.. أنا معاك إن العمالة في مصر عمالة قذرة فعلاً، أنا لفيت دول كتير ما شفتش عمالة زي عندنا هنا، حاجة تجيب الشلل آه والله
أستأذنك بس يا باشا تشوف لنا الموضوع عشان الناس دي طالبينها من يوم ما كلمتك وقلت لي تقدر تجيلنا المعرض بتاعنا وأنا بصراحة مش عارف أقولهم إيه.. وأنا بصراحة مش أقدر أشرح لهم وأقولهم عندنا مشكلة في القص والحاجات دي لأن برده هياخدوها على محمل تاني إن إحنا بعد كده مش هنقدر نوفر لهم الطلبات بتاعتهم
أنا بشكر حضرتك لاهتمامك تسلم لي يا رب، وتقولي أعمل إيه طيب، شكراً لحضرتك يا باش مهندس
المهندس منسي : السلام عليكم
إزيك يا أ/ وائل
أنا دلوقتي في الفرع باب الشعرية وزي ما تقول الكلام جاب بعضه، دلوقتي هي أقل عينة ممكن نجيبها لك ونقصها لك هتبقى 50 كيلو، وسعر الكيلو 90 جنيه، أقل من كده هيبقى صعب جداً علينا، صدقني مش هنقدر، يعني أقل بكرة هيبقى وزنها 50 كيلو، أب تو داون، يعني ممكن تطلع 45 وممكن تطلع 65، وسعر الكيلو في الكميات القليلة دي 90 جنيه، ولكن ساعة التنفيذ أقل كمية هتبقى نقول مثلاً ربع طن هتبقى الكيلو السادة بـ 56 جنيه من غير طباعة
همه الجماعة تقريباً كانوا محرجين يكلموك مش عارف ليه
العميل : ماشي سعادة الباشا
