ماكينات تعبئة سكر وبقوليات وبهارات اتوماتيك ونص اتوماتيك من شركة المهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : مين معايا حضرتك؟
المهندس منسي : المهندس منسي
العميل : حضرتك صاحب الشركة
المهندس منسي : إن شاء الله
العميل : معلش على إزعاج يا فندم
المهندس منسي : لا خد راحتك
العميل : أنا شغال في الكويت مشرف مبيعات يعتبر في نفس المجالات دي برده، فكنت بفكر أنزل أفتح المشروع ده في مصر، فإيه رأيك في المشروع ده بأمانة؟
المهندس منسي : والله هو كويس، الدنيا شغالة، أنا شايف في حركة الحمد لله
العميل : طيب الحمد لله، طيب الماكينة كافية عشان أبدأ بيها المشروع ولا المفروض ماكنتين وكده؟
المهندس منسي : لا عادي ممكن تبدأ بماكينة واحدة
العميل : طيب كويس، أنا بس أفتح وعايز أطور المشروع بعد كده، يعني عايز ماكينة قهوة، وماكينة بهارات
المهندس منسي : آه اللي هو تبدأ تجس نبض السوق وبعد كده ربنا ييسر، هو السوق نفسه اللي هيقولك احتياجاته إيه
العميل : هو حضرتك أنا من الصعيد من محافظة سوهاج
المهندس منسي : أهلاً وسهلاً
العميل : الله يخليك، فأغلبية اللي عندنا ماحدش بيعبي إلا سكر ورز بس، وأغلبية التعبئة يدوي
المهندس منسي : آه لا إحنا بايعين مكن كتير في سوهاج وأسيوط، في الصعيد عموماً، ولكن هو مكنة أو مشروع واحد مش هيكفي محافظة يعني
العميل : لا.. لا.. ده أنا لو اشتغلت على مركز بس يبقى ممتاز يعني، لا أنا اللي عايز أوصله لحضرتك إنه مافيش حد يعبي عندنا بقوليات في أكياس يعني، كله بيتباع سايبة
المهندس منسي : تقريباً إنت ما نزلتش بقالك فترة
العميل : لا يا عم بنزل على طول، أنا كنت في مصر من شهرين 3
المهندس منسي : النهاردة الصعيد في حركة كويسة، وفي سوبرماركتات عالية، وفيها تعبئة وتغليف وكله بدأ يتجه للتعبئة والتغليف الحديث
العميل : أنا معاك حضرتك بس الكلام ده في المحافظات، بس المراكز والقرى مافيهاش
المهندس منسي : آه.. بس هو توكل على الله إن شاء الله طالما إنك ناوي خير وناوي تعبي صح، ومنتج صح أكيد إن شاء الله هتلاقي في يوم من الأيام عملت اسم طالما إنك ناوي تشتغل صح، أما أغلب الناس اللي عايزين يخطفوا ويجروا دول ما بيستمروش
العميل : لا أنا عايز أشتغل صح، حتى المنتجات هجيب حاجة كويسة ودرجة أولى وكده يعني
المهندس منسي : إن شاء الله
العميل : طب بعد إذنك المشروع ده تكاليفه أعمل حسابي في أد إيه يعني؟
المهندس منسي : هو مافيش إلا مكنة تعبئة الرز والبقوليات إما نص أتوماتيك أو أتوماتيك
العميل : بتخش في كام مصري تقريباً؟
المهندس منسي : هي المكنة النص أتوماتيك سعرها يعني 18 ألف جنيه مصري
العميل : لا.. لا.. الأتوماتيك أحسن بتهيألي
المهندس منسي : عادي الأتوماتيك سعرها اللي على الكيلو ، يعني 108 ألف جنيه مصري
العميل : تمام.. بعد كده حاجات بسيطة اللي هتدفع بعد كده
المهندس منسي : آه.. في بعد كده مواد التغليف كلها حاجات بسيطة
العميل : دي تبعكم حضرتك ولا شركات تانية؟
المهندس منسي : آه عندنا آه.. طالما هتشتغل أتوماتيك مش هتحتاج أكياس، هيبقى رول
العميل : آه بس بطبع عليه الاسم وكده
المهندس منسي : مضبوط آه
العميل : بس هو الأفضل الأتوماتيك يا باش مهندس
المهندس منسي : هو النص أتوماتيك بياخدوا اللي معهوش سيولة، إنما طبعاً الواحد بياخد الأتوماتيك عشان يريح دماغه، لأنه العامل الواحد بيشغل 15 مكنة أتوماتيك، أما النص أتوماتيك بيشتغل عليها عامل واحد
العميل : أيوه.. كل مكنة عايزه عامل
المهندس منسي : آه
العميل : لا خلينا في الأتوماتيك، السيولة الحمد لله متوفرة
المهندس منسي : ربنا يزيدك
العميل : الواحد ممكن يجيب مكنتين، يعني ممكن للبهارات، يعني الماكينة اللي بتكلمني عليها حضرتك بتعبي سكر وبقوليات
المهندس منسي : هي بتعبي سكر وبقوليات، بس دي مكنة كبيرة، في بقى مكنة صغيرة بتعبي100 جرام و 50 جرام والحاجات دي
العميل : أنا فاهم، لو عايز أعبي بهارات هجيب مكنة تانية
المهندس منسي : إن شاء الله
العميل : طب أنا إن شاء الله نازل بعد رمضان وآجي آخد موعد مع حضرتك وأمر عليك
المهندس منسي : تيجي تشرفني
العميل : ربنا يخليك، طب معلش سؤال أنا عندي سجل تجاري وبطاقة ضريبية بس مش نفس المجال ده، ممكن أضيف نفس المجال ده، شغل تاني خالص؟
المهندس منسي : ممكن تضيفه آه، طالما نشاط تجاري ممكن تضيفه، وعموماً الدولة الأيام دي بتشجع الصناعة تشجيع غير عادي
العميل : طب كويس، طب مساحة المكان يكون كام تقريباً؟
المهندس منسي : مش مشكلة، يعني ممكن مكان 30 متر تشتغل فيه عادي، أصل المكنة نفسها أد مكتب، فهتحتاج مكان للتشوين، ومكان للمنتج النهائي بس
العميل : تمام يا باش مهندس، معلش أنا آسف والله عطلتك
المهندس منسي : لا خد راحتك
العميل : إنت تأمر بأي خدمة من الكويت؟
المهندس منسي : شكراً يا باشا ما أتحرمش منك
العميل : شكراً يا باشا وإن شاء الله هكون على تواصل مع حضرتك، شكراً، مع السلامة
