ماكينات تعبئة عبوات الجل واكياس الجل من شركة المهندس منسي
العميل : سلام عليكم.
المهندس منسي : عليكم السلام ورحمة الله وبركاته
العميل : إزايك يا باشا إيه أخبارك؟
المهندس منسي : أهلاً بيك.
العميل : معلش أنا آسف الأول إني أنا بتصل في وقت متأخر.
المهندس منسي : ولا يهمك.
العميل : أنا اسمي أحمد من المنيا وكنت جيبت النمرة بتاعت حضرتك من الفيس من على النت. والله عايز أسأل على العبوات بتاعت الجل اللي هي نص كيلو وربع كيلو.
المهندس منسي : آه نص كيلو وربع كيلو في إيه؟ في أكياس ولا في عبوات؟
العميل : لا عبوات اللي هي ربع كيلو ونص كيلو.
المهندس منسي : عايز المكنة يعني اللي بتعبي الجيل في عبوات؟
العميل : هو المكن آه أنا محتاج، ومحتاج اللي هوه الأتوماتيك ومحتاج المكنة بتاعت الأكياس بس عايز أستفسر عن العبوات الأول، هل العبوات دي متوفرة عند حضرتك ولا لأ؟
المهندس منسي : آه حضرتك بس هاتلنا شكل العبوة أو ابعتلنا شكل العبوة على الواتس وإحنا نبص عليها ونقولك آه ولا لأ، الكميات بتاعتك أد إيه؟
العميل : أنا هاعمل ربع وهعمل نص.
المهندس منسي : لا الكميات.
العميل : الكميات ممكن على حسب السعر، لما نشوف السعر.
المهندس منسي : لا هوه السعر بيتحدد بناء على الكمية.
العميل : يعني مثلاً لو هاخد مثلاً خمس آلاف عبوة وخمس آلاف عبوة.
المهندس منسي : لا هوه خمس آلاف عبوة دي كمية قليلة هنضطر نعملك الاسطمبة الأول، الاسطمبة هتتكلف .
العميل : طيب الاسطمبة ديه ممكن تتعمل بطباعة مثلاً تتطبع حاجة على الاسطمبة تخصني أنا ولا هي تبقى ليك إنت بس بقى.
المهندس منسي : آه.. لا.. إزاي ليا إزاي دي اسطمبتك، بتاعتك براحتك، إنت ممكن تعمل الاسطمبة وتقولي مش هاعلم عندك شغل، وممكن تعمل عندي الشغل براحتك، يعني افرض أنا…
العميل : لا ما أنا لو نويت إني أتعامل معاك وعملت اسطمبة ده أنا معاك على طول بقى مدى الحياة بإذن أمر ربنا.
المهندس منسي : طب افرض أنت بعد ما خلصت الشغل قولت هات الاسطمبة بتاعتي هاقولك لأ.
العميل : يا عم اسطمبة عندك عندي مش هاتفرق.
المهندس منسي : بالتأكيد هقولك آه خدها أهي.
العميل : طب إنت مصنع حضرتك فين يا باشا؟
المهندس منسي : إحنا عندنا حدائق القبة، مدينة نصر، باب الشعرية.
العميل : مدينة نصر، باب الشعرية، أستأذنك بس أتعرف باسم حضرتك؟
المهندس منسي : مهندس منسي.
العميل : مهندس منسي.. أهلاً وسهلاً..أيوه صح، الاسم كان على النت المهندس منسي..طب معلش أنا آسف طب يا باش مهندس عشان أعمل عبوات 5000 و5000 لازم الاسطمبة أم 1200 دي؟
المهندس منسي : إن شاء الله.
العميل : طيب أنا إن شاء الله بإذن الله على يوم الأربعاء أو يوم الخميس هانزل لحضرتك بنفس عبوة معايا ومش مشكلة موضوع الاسطمبة.
المهندس منسي : ماشي يا غالي.
العميل : الاسطمبة دي حضرتك اللي هتعملها طبعاً؟
المهندس منسي : إن شاء الله.
العميل : طيب يا باش مهندس أنا أخوك أحمد من المنيا من الصعيد يا باشا.
المهندس منسي : تشرفت بيك يا عم أحمد.
العميل : الله يخليك إن شاء الله يوم ما أتحرك من المنيا هاتصل بسيادتك أعرف حضرتك إن أنا طالع من المنيا، عشان لو محتاج حاجة من الصعيد أجيبهالك وأنا جاي برده بالمرة.
المهندس منسي : ماشي يا غالي تيجي نورنا.
العميل : معلش أنا آسف على الإزعاج.
المهندس منسي : لا ولا يهمك.
العميل : ماشي السلام عليكم.
