ماكينة تعبئة وتغليف التوابل والبهارات كود 905 واكياس تعبئة البهارات من شركة المهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : حضرتك المنسي للتعبئة والتغليف مش كده؟
المهندس منسي : أيوه
العميل : مع حضرتك علاء محيي الدين من إسكندرية
المهندس منسي : أهلاً وسهلاً
العميل : أهلاً وسهلاً، إحنا بنأسس مصنع لتعبئة التوابل والبهارات فكنت عايز آخد فكرة حضرتك أكياس بس ولا المكن عند حضرتك؟
المهندس منسي : والمكن برده
العميل : يعني إنتم الـ 2 ولا كل منشأة لوحدها
المهندس منسي : الاثنين
العميل : أنا كنت عايز أسأل في مكنة كود 905 بتعبي حبوب مسحوق لحوالي 250 جرام صح؟
المهندس منسي : إن شاء الله
العميل : دي فول أتوماتيك، من أول التعبئة فوق لغاية طباعة التاريخ ولحام الأكياس؟
المهندس منسي : إن شاء الله
العميل : طيب هل.. حضرتك دي لحام رباعي صح؟
المهندس منسي : آه
لأن أنا عايز حاجة لحام رباعي، وفي نفس الوقت ينفع يتعملها علاقة، مكان للتعليق
أي تجهيزة بنقدر نعملها، بنشيل الفك وبنعمل تعليقة في الفك
العميل : تمام.. برده أتوماتيك مش عايز حاجة يدوي خالص، أنا عايز الحاجة تطلع على الكراتين على طول، متاحة الحكاية دي؟
المهندس منسي : متاحة آه
العميل : طب حضرتك المكنة سعرها كام بالإضافة هتبقى كام؟
المهندس منسي : المكنة سعرها 4، عملية الإضافة دي بنتفق عليها ممكن تبقى في حدود ألف ـ ألفين جنيه مصري.. كده يعني
العميل : طيب المكنة دي محتاجة كمبروسر صح؟
المهندس منسي : لا مش محتاجة.. لو عايز نخليها لك ضغط هواء مافيش مشكلة
العميل : لا أنا بسأل بس، طب بالنسبة لمكونات المكنة، أنا عارف إنها مكونات محلي…
المهندس منسي : لو جبت النهاردة أي تليفون أيفون أو.. أو.. هتلاقي المكونات بتاعته صيني
العميل : ما عنديش اعتراض
المهندس منسي : ولكن المكونات إحنا مختارنا لحسابنا إحنا بدقة عالية وجودة عالية
العميل : بتفرق في الكنتوكرات والحاجات دي
المهندس منسي : على أساس إن إحنا بنسبورتد في خدمة ما بعد البيع فلازم نجيب منتجات زي الفل عشان خاطر بنخدم خدمة ما بعد البيع بأمانة
العميل : طب معلش بالنسبة للمكنة دي بتعبي بودر يعني مسحوق ولا حبيبات، ولا ممكن الاثنين؟
المهندس منسي : تعبي الاثنين إن شاء الله
العميل : يعني شغالة بنظام البريمة صح؟ الأكر ده؟
المهندس منسي : لا هي شغالة بنظام الكاب
العميل : دي حجمية؟
المهندس منسي : حجمية آه، ولكن النظام التاني بس للدقيق والبن والحنة علشان فيهم زيوت، فالزيوت بتعرش
العميل : آه.. عشان أنا كنت محتار، أنا أول مرة أشتغل بالنوعية دي فمش عارف أنهي أنسب ليها، حضرتك ترشح البودر يعني؟
المهندس منسي : لا أرشح لك الكاب، حضرتك هتجيب المنتج بتاعك وتجربه مرة واثنين وثلاثة
العميل : ده يعبي معايا فلفل، وكمون، وشطة… ماعدا الدقيق
المهندس منسي : آه
العميل : طب حضرتك في حاجات في العطارة رفيعة، زي القرفة مثلاً، بودرة الثوم..
المهندس منسي : كل ده يشتغل معانا عادي
العميل : يشتغل على الكوبايات عادي؟
المهندس منسي : مافيش مشكلة خالص
العميل : هنعدل كل واحد حسب كثافته ونشوف الحجم بتاعه صح؟
المهندس منسي : آه
العميل : طب معلش من كام لكام… أصل أنا عشان في إسكندرية فبعيد عنك، لو كنت جنبك كنت جيت لك وأخدت كل المعلومات يعني
المهندس منسي : لا ولا يهمك، من 50-250 جرام
العميل : طب لو عايز عبوة أقل، 20 مثلاً متاحة
المهندس منسي : 20جرام؟
العميل : آه… الفلفل بيتبتدي من أول 20 عشان سعره بيبقى غالي شويه
المهندس منسي : عادي بنغير الكوبايات مافيش مشكلة
العميل : طب بالنسبة للأكياس كنت عايز كيس محمل شويه
المهندس منسي : حضرتك تيجي بقى تشرفنا بالزيارة وتختار الخامة اللي تعجبك ونقولك سعرها كام
العميل : أنا عايز أتأكد بس إن الخامة دي موجودة عندكم، أنا عايز 40 ميكرون بولي ميكرون و40 ميتالايز، دي متاحة ولا تقيلة شويه
المهندس منسي : آه دي موجودة بضاعة حاضرة، هو كل واحد بيختار يقولك محمل عشان يكون الكيس مالي مركزه كده
العميل : آه حضرتك إحنا نازلين كويس وعايزين نجيب خامة نظيفة يعني، ففكرنا في الـ 80 ميكرون ده عشان تبقى الخامة محملة غير اللي في السوق خالص
المهندس منسي : كل خامات التغليف موجودة عندنا بضاعة حاضرة
العميل : طيب بالنسبة لمكنة الحجمية دي متاحة عند حضرتك يعني لو طلبتها ممكن توردها لي في خلال أد إي؟
المهندس منسي : في خلال دقيقة
العميل : طيب ماشي، هرجع لهم بس وأكلم حضرتك تاني
المهندس منسي : ماشي يا غالي
العميل : شكراً يا فندم
