مكنة تعبئة السكر الباكيتات كود 905 ماركة مهندس منسي

العميل : السلام عليكم

المهندس منسي : عليكم السلام ورحمة الله وبركاته

العميل : شركة نسر الشرق

المهندس منسي : أيوه

العميل : كنت عايز أسأل على مكنة تعبئة السكر الباكيتات

المهندس منسي : اللي هي الصوابع؟

العميل : آه الصوابع

المهندس منسي : آه..

العميل : موجودة عند حضرتك؟

المهندس منسي : موجودة آه

العميل : طيب صناعتها إيه؟

المهندس منسي : إحنا ماركة، براند عالمي

العميل : أنا لسه داخل في المجال جديد فمش عارف بصراحة، بحضرتك ممكن تشرح لي

المهندس منسي : هو يمكن إحنا الماركة الوحيدة على مستوى الوطن العربي، ماركة المهندس منسي، إحنا ماركة عالمية على مستوى العالم، يعني حضرتك لو دخلت على النت وكتبت المهندس منسي في معرض الصين الدولي، هتلاقينا كنا عارضين بنافس الشركات الصينية في هذا المجال

العميل : تمام.. طب هي صناعة المكن مصري ولا صيني

المهندس منسي : لا.. هو النهاردة لما بتجيب تليفون آيفون أو لاب توب أو عربية.. هتسأله الصناعة إيه؟ إنت ليك بالماركة بس

العميل : ماشي بس زي ما حضرتك بتتكلم في العربيات في تقفيل مصري، وفي تقفيل صيني، وفي تقفيل كوري، في هندي، كل مكان له الجودة بتاعته

المهندس منسي : آه بص هو إحنا بنعمل الديزاين والابتكار بحيث إن إحنا نسهل المكنة ونبسطها لأن عموماً العميل العربي ثقافته في المكن ضعيفة جداً، ده رقم واحد، رقم 2 بنشغل المكنة على الكهرباء بتاعت البيوت العادية، رقم 3 إن إحنا قدرنا نمسك المكنة ونفكها 600 حتة ونخليها وحدات تتجمع مع بعضها بحيث إن إحنا لاحظنا إن العميل العربي ممكن يعمل المشروع بتاعه في شقته فوق أو مش عارف إيه فهنا بيمسك المكنة يفكها حتة حتة وينزلها ويطلعها تاني، رقم 4 عملنا فيديوهات شرح وتركيب المكن وتشغيله وتصيينه بحيث إنك تبقى مهندس مكنتك، عملنا حاجات كتيرة أفدتنا بيها العالم العربي في مجال التعبئة والتغليف إفادة كاملة 100%، خش على النت وشوف الفيديوهات

العميل : هو حضرتك شركة المهندس منسي؟

المهندس منسي : أيوه

العميل : أمال نسر الشرق دي إيه؟

المهندس منسي : ما هو شركة المهندس منسي اشترت شركة نسر الشرق

العميل : أنا كلمت شركة المهندس منسي وأخدت المواصفات وكل حاجة، كنت كلمت الحاج حامد مسعود

المهندس منسي : آه.. عادي، أصل شركة المهندس منسي النهاردة إحنا 20 فرد مبيعات، فممكن تتجه في التليفون اللي بعديه أو اللي بعديه، إحنا منوعين في المبيعات عشان راحت العميل، يعني بتاع المبيعات لو الكاريزما بتاعته ما مشيتش ما الكارزيمات بتاعتك ولا حاجة شوف غيره عادي، وهو مش هيزعل لأن إحنا بنشتغل بروح التيم وورك، يعني الناس كلها حابه شركتها وبيحبوا يخدموا شركتهم

العميل : تمام.. تمام.. خلاص ماشي، كنت عايز أسأل حضرتك في حاجة

المهندس منسي : إنت عارف الأفضل إنك تعمل زيارة مباشرة

العميل : لازم طبعاً هنزل أشوف المكن وفي مصانع برده شغالة في الكلام ده هروح أبص عندهم على نظام الشغل إزاي

المهندس منسي : آه.. إحنا عندنا ميزة، إن إحنا ممكن نشغلك المكنة وإنت واقف، وكمان إحنا عندنا مواد التعبئة والتغليف

العميل : آه ما الحاج حامد قالي على مكن تاني تعبئة تاني

المهندس منسي : لا المواد بتاعت التعبئة والتغليف، اللي هي الخامة اللي هتعبي فيها

العميل : يعني الأظرف  عند حضرتك؟

المهندس منسي : آه عندنا آه

العميل : طب ودي أسعارها إيه

المهندس منسي : نادر لما تلاقي حد عنده لأن إحنا داخلين بعلم، ولو إنت جيت لقيت سعري كويس في المكن وسعري مش ملائم في المواد ما بنفرضش عليك المواد

أنا فاهم آه أصل ده بيبقى عرض وطلب، الواحد بيلف يعني وبيجيب أسعار، والمكان برده اللي بيرتاح فيه في التعامل، ممكن يكون سعرك غالي بس مرتاح في التعامل عن مكان تاني

العميل : كنت عايز أسأل على أسعار الباكيتات إيه؟

المهندس منسي : أنا أقولك سعر الورق سادة، أما سعره بعد الطباعة ده هيبقى صعب

العميل : آه سعره سادة بعد كده عادي، آه كل واحد بيختلف في الحاجات اللي عايز يكتبها، لكن سعر الظرف أبيض كده كام؟

المهندس منسي : الطن في حدود 1500-1، هو إحنا بنسعر بال ولكن بناخد بالجنيه المصري عشان خاطر نضمن ثبات الأسعار

العميل : تمام.. طيب يعني أقل حاجة كمية طن ولا ممكن أقل من كده؟

المهندس منسي : لا عادي لو عايز 100 كيلو حتى مافيش مشكلة

العميل : تمام.. طب وزن الظرف بيبقى أد إيه؟

المهندس منسي : لا دي تبعك إنت بقى، يعني إنت بتيجي تنقي الخامة، وبناء على الخامة بتشوف الأوزان بتاعتها هتبقى إيه

العميل : تمام.. طب معلش أنا هتعامل بالكيلو مش هتعامل بالطن، الكيلو ممكن يبتدي من كام؟

المهندس منسي : إنت بتيجي تختار الخامة لأنه خامات الورق كتيرة..

العميل : لا أنا قصدي بتبدي مثلاً أخف خامة عندك سعرها بيبتدي مثلاً الكيلو من جنيه لأعلى خامة لغاية الكيلو بتاعها يوصل 20 جنيه

المهندس منسي : لا ده لو أنا افتكرت مواد التغليف عندنا بتوزن إيه وبتطلع إيه ده أنا أبقى موسوعة المهندس منسي مش شركة المهندس منسي

العميل : تمام…

المهندس منسي : الدنيا في الخامات كتييييير قوي قوي، فصعب إن أنا أعرف أوزانها، وبتطلع كام كيلو.. لازم بيبقى على الطبيعة

العميل : تمام.. تمام.. خلاص ماشي يا باشا، أتشرف باسم حضرتك طيب

المهندس منسي : المهندس منسي معاك

العميل : ماشي يا باشا، شكراً، السلام عليكم

المهندس منسي : عليكم السلام ورحمة الله وبركاته