مكنه تغليف اظرف الكاتشب كود 505 ماركة مهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : شركة المهندس منسي
المهندس منسي : أيوه
العميل : بسأل على المكنة اللي بتغلف الظرف بتاع الكاتشب دي تكلفتها كام؟ أو موديلاتها إيه؟ ممكن آخد فكرة من حضرتك
المهندس منسي : آه هي موجودة بضاعة حاضرة، أتوماتيك كاملة سعرها يعني
العميل : طب دي بتعمل أد إيه في الساعة؟
المهندس منسي : يعني ممكن تطلع لك 4500 كيس في الساعة
العميل : طب الأكياس نفسها حضرتك موجودة عندك الخامة بتاعتها
المهندس منسي : عندنا الخامة قبل الطباعة
العميل : آه.. طب الظرف بيتكلف أد إيه حضرتك؟
المهندس منسي : لا ماعنديش فكرة، أنا ببيع بالكيلو
العميل : آه.. طب الخامة دي بيبقى فيها أشكال وكده
المهندس منسي : ما هو إنت بتعمل الشكل وتديه لحد يطبعهولك
العميل : لا مش قصدي على الطباعة، قصدي الخامة مختلفة من خامة لخامة
المهندس منسي : آه الأنواع كتيرة وأشكال كتيرة
العميل : هو حضرتك العنوان فين بالضبط؟
المهندس منسي : إحنا عندنا باب الشعرية، حدائق القبة، مدينة نصر، 6 أكتوبر، غمرة، العبور، المعادي
العميل : طيب غمرة كويس بالنسبة لي، أصل أنا في الهرم
المهندس منسي : هبعت لك الداتا بتاعته في رسالة حالاً
العميل : طب المكنة دي حجمها كام × كام مثلاً؟
المهندس منسي : متر ونص × متر ونص × ارتفاع 2 متر تقريباً
العميل : طب وزنها أد إيه؟
المهندس منسي : في حدود 250 أو 300 كيلو
العميل : دي إنتاج حضرتك ولا مستوردينها؟
المهندس منسي : إحنا ماركة، براند عالمي
العميل : يعني حضرتك اللي بتصنعها في مصر
المهندس منسي : إحنا مش بنصنعها، إحنا بنجمعها
العميل : آه.. طب في حجم أصغر من كده؟
المهندس منسي : إنت عايز تطلعها في دور علوي؟
العميل : أيوه بالضبط كده إنت فهمتني، عايزين حاجة حجمها صغير
المهندس منسي : لا تفائل يا أخي، المكن بتاعنا بنقدر نفككه، طلعناه الدور الـ 11
العميل : ما شاء الله
المهندس منسي : هي ده الفرق ما بين تاجر وبين مصنع
العميل : جميل.. عشان حضرتك بتجمعها أكيد فاهم، مين معايا؟ معاك أحمد أبو العنين
المهندس منسي : أخوك المهندس منسي
العميل : باش مهندس منسي أنا شفت في الصين المكنة بتاعت عصير القصب
المهندس منسي : إحنا كنا بنعملها هنا نفس المكنة اللي شفتها في الصين اللي بتشتغل على بطارية
العميل : أيوه صغيرة خالص حجمها 50 × 50
المهندس منسي : عملنا منها 3 حتت بيعناهم في 5 سنين
العميل : معلش عشان الفكر هنا، أنا بقى عايز المكنة دي عايز الحجم يصغر عشان السعر ينزل شويه
المهندس منسي : لا كسعر ما أعتقدش، لأن إحنا زنقنا الدنيا قوي فده آخر سعر، إحنا أرخص سعر مش في مصر، إحنا أرخص سعر في العالم كله، يكفي إن إحنا كنا عارضين في معرض كانتون الدولي في الصين بنافس في الصينيين
العميل : ما شاء الله، طب يا باش مهندس أقولك على حاجة، إيه رأيك في الوضوح والصراحة
المهندس منسي : لا خد راحتك عادي
العميل : أنا المكنة دي هاخدها وهبقى بإذن الله وكيلك في دولة عربية، عايز أسوق ويبقى عندي سعر تنافسي، إني أقدر أوزع منها أكبر قدر يعني
المهندس منسي : إن شاء الله، هو إحنا أوردي سعرنا تنافسي، لدرجة إن المنافسين بيستغلوا السعر ده في إنهم بيقولك رخيصة ليه
العميل : لكن هي بتطلع 4500 ظرف في الساعة
المهندس منسي : آه في حدود، ولكن ده كلام تجاري، الكلام الصناعي اللي على حق بيقول إن الخامة نفسها هتتلحم على سرعة كام، أصل هو كل العملية الموتور شغال على جيربوكس الموتور قدرته 1440 لفة في الدقيقة أنا ممكن أفتح لك الموتور وأخليه ينزل أكياس على طول، بس الأكياس هتلحم ولا مش هتلحم؟؟
العميل : مضبوط.. يبقى نقول مثلاً 3500 جودة مضبوطة
المهندس منسي : آه يعني من 3500-4500
العميل : خلينا نقول 3500 في الساعة
المهندس منسي : مثلاً
العميل : طب استأذن حضرتك عندك فيديو بيشرح المكنة وهي شغالة؟
المهندس منسي : عندي فيديوهات الدنيا، ده إحنا الشركة الوحيدة في الوطن العربي اللي رفعت فيديوهات لشرح وفك وتركيب المكن
العميل : لا أنا عايز فيديو بس بطريقة شغلها وهي شغالة، ممكن تبعت لي فيديو ليها
المهندس منسي : آه.. ماشي أبعت لك فيديو، هبعت لك صفحة هتلاقي الصفحة دي فيها فيديوهات كتيرة، بس…
العميل : ماشي يا باش مهندس، السلام عليكم
المهندس منسي : عليكم السلام ورحمة الله وبركاته
