خامات البلاستيك بجميع أنواعها من شركة المهندس منسي
العميل : سلام عليكم
مهندس منسي : عليكم السلام ورحمة الله وبركاته
العميل : شركة المهندس منسي
مهندس منسي : أيوه
العميل : معاك المهندس محمد جمال
مهندس منسي : أهلاً بيك
العميل : كنت بسأل على شكاير بلاستيك عايز أعبي فيها أوزان 60 كيلو، رمل وأسمنت…
مهندس منسي : آه.. إحنا عندنا ممكن الخامة
العميل : لا بص حضرتك طبعاً إحنا عندنا شغل في شكاير ورق، اللي هوه شكاير زي شكاير الأسمنت، أنا عايز أكياس بلاستيك زي حضرتك لا مؤاخذة زي أكياس الزبالة بس التخانة بتاعتها كبير تستحمل….
مهندس منسي : عندنا خامة بلاستيك 350 ميكرون معمولة من خامة اسمها بولي آميد بولي إيثيلين، القوة بتاعتها بقوة البلاستيك العادي أد قوة البلاستيك العادي حوالي 5 مرات
العميل : آه.. آه.. كنت في مرة لقيت شيكارة بتاعت مواد تشطيبات عامله وزن 50 كيلو فعلاً وبلاستيك قوي فعجبتني فعلاً يعني، أنا بالنسبة دي شايفها أفضل من الشكاير الورق يعني
مهندس منسي : آه دي هتبقى أقوى أكيد كمان، دي من خامة اسمها بولي آميد بولي إيثيلين، عارف حضرتك أوقات كده تلاقي كيس فندق أو كيس مشفوط منه الهوا؟
العميل : آه…
مهندس منسي : هي دي الخامة دي
العميل : تمام.. تمام…
مهندس منسي : هي الخامة دي مادة قوية
العميل : يعني لو في 2 بيرفعوا الشكارة قصاد بعض مش هتقطع؟
مهندس منسي : تقطع إيه، أنا همسكك الخامة وخلي 2 يشدوا قصاد بعض وبعزم قوتهم، إذا قطعتها بحق
العميل : سعر الشيكارة كام بقى…
مهندس منسي : ده بالكيلو
العميل : الطن يعمل كام شيكارة تقريباً؟
مهندس منسي : هنحسبها بقى لسه ما…. دي أول مرة حد يطلب مننا شكاير، همه دايماً بياخدوها مننا عشان يعبوا فيها منتجات
العميل : طب بتوقعك عشان أنا بصراحة عايز أحسم الموضوع يا إما تبقى بلاستيك يا إما ورق، الشكاير أنا جايب الشكارة بـ 2 جنيه بالنسبة دي غالية قوي، فطبعاً في الكميات 20 ـ 30 ألف شيكارة تبقى مكلف جداً، فأنا عايز بدأت أفكر في سكة البلاستيك، وعايز أشوف هيوفر معايا أد إيه يعني
مهندس منسي : آه هوه في عندنا حاجة اسمها ستوكات على فكرة
العميل : آه…
مهندس منسي : بيبقى سعر الستوكات ده سعر رخيص جداً، لو إنت محتاج حاجة سعرها رخيص يعني
العميل : آه عايز حاجة سعرها رخيص وفي نفس الوقت قوية وتستحمل الهبد…
مهندس منسي : هوه الخامة بتاعتنا أقوى من الورق أكيد، لازم تكون أقوى من الورق، واخد بالك، ليه؟؟؟ لأنك النهاردة بتتكلم في مواد متعددة الطبقات فلازم تكون أقوى
العميل : آه… فاوبر… فاوبر
مهندس منسي : في عندنا استوكات ممكن حضرتك تيجي تتفرج عليها وتفصلها أكياس كده هيوفر معاك في السعر جامد
العميل : طيب أنا عايز حاجة كده تقريباً أنا مش عايز حاجة بالضبط يعني قولي مثلاً الطن يعمل تقريباً ألف شكارة وسعره كذا
مهندس منسي : المشكلة أنا دي ما أقدرش أحسبهالك أنا موجود في البيت مش موجود في المكان دلوقتي، فكوني إن أنا أتكهن بوزنها دلوقتي هيبقى صعب عليا
العميل : آه… طب هي هتبقى أكتر ولا أقل من 2 جنيه تقريباً؟
مهندس منسي : حضرتك بقى اتصل بيا بكرة أو بعده… يوم السبت يستحسن لأن إحنا هنبدأ الشغل يوم السبت، أو هبعتلك دلوقتي تليفون مدير فرع أكتوبر قوله خليه يوزنلك متر × متر كده، هي الشيكارة بتاعتك كام × كام؟
العميل : يعني زي شكاير الأسمنت يعني مثلاً 12 سم…..
مهندس منسي : إنت عارف لو تعبت شويه ورحتلي ومسكت في إيدك شيكارة ووزنتها وشفت كل حاجة، هتبقى الدنيا أحسن بكتير
العميل : طيب هوه مكانه فين طيب؟
مهندس منسي : في 6 أكتوبر
العميل : آه… مافيش فرع تاني أقرب؟
مهندس منسي : في بقى في حدائق القبة، مدينة نصر، باب الشعرية
العميل : فين في مدينة نصر؟
مهندس منسي : في مكرم عبيد
العميل : فين في مكرم عبيد؟
مهندس منسي : قدام عمر أفندي، هبعتلك الداتا بتاعته دولقتي حالاً، هتروحله تقوله في عندكم 25 طن خامة بولي آميد على بولي إيثيلين عايز أعمل شيكارة، فصلي شيكارة ووزنها ونقعد مع بعض ونشوف تكلفتها إيه؟
العميل : يعني أقوله إنت عندك 25 طن من المادة ديت إحنا عايزين نفصلها كذا كذا عايزين نعرف الشيكارة سعرها أد كذا صح كده؟
مهندس منسي : آه قوله أنا كلمت المهندس منسي وقالي إن في عندنا 25 طن من خامة البولي آميد بولي إيثيلين أشد قوة، قوية جداً، واخد بالك، وفي كل الأحوال هتلاقي البلاستيك أقوى الورق
العميل : أنا يهمني حاجتين يبقى قوي وفي نفس الوقت يبقى أرخص من الورق
مهندس منسي : هتعبي فيه رمل؟
العميل : رمل وسن، خليط مع بعض
مهندس منسي : سن اللي هوه معمول من حجارة بتشيني
العميل : السن اللي هوه الجير، من الحجر الجيري، السن الأبيض بتاع الخرسانة ده
مهندس منسي : آه… ما هوه معمول من حجارة اسمها بتشيني
العميل : طب ده إيه هيأثر على حاجة ولا ده إيه؟؟
مهندس منسي : لا عادي دي أصلاً اللي إنتوا بتحطوها في الصبة غلط، هي المفروض حجارة تانية، ولكن عندنا هنا بيروحوا مكسرين بتشينو ويروحوا مستخدمنها زي الزلط
العميل : آه.. آه.. هوه الزلط طبعاً أحسن طبعاً، بس ما بقاش حد بيشتغل بالزلط
مهندس منسي : في نوع حجارة معين اللي هوه حجارة سينا، وفي حجارة تانية، في أنواع أنا فاكرها يعني، هي المفروض إنها تبقى كويسة يعني
العميل : تمام.. تمام… بقول لحضرتك الفرع هناك هيبقى فاتح إمتى؟
مهندس منسي : فاتح السبت إن شاء الله
العميل : طب حضرتك هتبعتلي الرقم بتاعهم
مهندس منسي : هوه حضرتك إحنا كده بنحل معادلة، يعني حضرتك عايز خامة سعرها أرخص من الورق وتكون أقوى من الورق
العميل : تمام…
مهندس منسي : ما المفروض إنك زدت في القوة المفروض تزيد في السعر شوية
العميل : آه.. مش قصدي أقوى ورق، أنا عايز حاجة لما تتشال ما تتفتحش بس، ما قلتش أقوى…
مهندس منسي : في كل الأحوال البلاستيك هيبقى أقوى من الورق
العميل : مش طالب قوة لأ أنا طالب بس إن الواحد بيشيل ما يتفتحش منه فقط، وإحنا بنحمل هنجيب من على الأرض
مهندس منسي : آه…
العميل : فإن هي ما تتفتحش بس، ده اللي أنا طالبه يعني
مهندس منسي : لأ الورق هتتفتح أكيد، إنما دي عمرها ما تتفتح
العميل : وبعدين وقت ما أجيب كميات كبيرة شكارة الورق 2 جنيه للشكارة، طبعاً بالنسبة لي مكلفة جداً يعني، العبارة فلوس في الأرض يعني، الشيكارة وخلاص غالية وفلوسها مكلفة بالنسبة كمان، بديل تاني قوي زي الورق، مش شرط أقوى منه، بس قوي زي الورق وفي نفس الوقت تكلفته يا ريت تبقى نص تكلفة الورق تبقى أقل يعني
لا نص إيه… ده إذا جيبنا الورق يبقى من الله
مهندس منسي : ممكن تبقى أقل من الورق شوية، إنما نص تكلفة الورق ليه يعني؟؟؟!!!!!
العميل : آه… يعني عموماً أنا هاجي فرع مدينة نصر وأشوف بالضبط والسعر كام وحضرتك هتديهم فكرة ولا أنا أكلمهم…
مهندس منسي : عادي ما تقلقش إنت هتقوله 25 طن عندكم من خامة البولي آميد بولي إيثيلين واخد بالك همه هيفهموا على طول
العميل : تمام.. تمام… خلاص يا باش مهندس منسي متشكر جداً والله، خلاص العميل : هستنى حضرتك تبعتلي بس الرقم عشان بس أبقى أكلمه إن شاء الله
مهندس منسي : إن شاء الله
العميل : ماشي شكراً جداً يا باش مهندس
مهندس منسي : مع السلامة
العميل : سلام عليكم
