ماكينات تعبئة السوائل في عبوات من شركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : باش مهندس منسي إن شاء الله

المهندس منسي : أيوه

العميل : يا مرحب بحضرتك يا باش مهندس والله بقلب في النت كده على مكن تغليف فلقيت حضرتك عامل منتج رهيب جداً، فكنت عايز أستفسر أقل عبوة تبدأ من كام العبوة ، وآلية التغليف طاقة ممكن تعمل غطا برشام أو غطا قفل آلي، الفكرة العامة بتاعتها بحيث إن عايز مكنة عبوات تطلعلي 50 مللي سائل، هنحط 50 مللي و100 مللي و150 مللي

المهندس منسي : عايز مكنة تصنيع عبوات، ولا عايز مكنة تعبئة وتغليف

العميل : لأ تعبئة وتغليف أنا عايز.. لو في عندك تصنيع العبوة شغال آخد المكنتين

المهندس منسي : هوه حضرتك هتعبي إيه؟

العميل : والله سائل تنظيف بس مش سائل جيلي

المهندس منسي : اللزوجة بتاعته زي الشامبو كده؟

العميل : لا خفيف خفيف جداً، تقدر تقول زي المياه تقريباً

المهندس منسي : هتعبي في عبوات ولا في إيه؟

العميل : والله الفكرة الخاطرة بالي دلوقتي أعبي في عبوات زي الجيل كده مثلاً، خدت بالك، عبوة كده ظريفة وجميلة جداً

المهندس منسي : أكياس يعني؟

العميل : آه أكياس قوية متحملة

المهندس منسي : آه.. هوه في مكنة نص أتوماتيك وفي مكنة أتوماتيك كاملة

العميل : تكلفة دي كام ودي كام؟

المهندس منسي : النص أتوماتيك بتبدأ من 430 4300 جنيه مصري، والأتوماتيك يعني 45000 جنيه مصري

العميل : طيب إيه هوه الشق اللي فيها النص أتوماتيك، المانويل فيها إيه هوه بيختص بإيه؟

المهندس منسي : النص أتوماتيك إن حضرتك بتديلها الكيس هي بتعبي وبعد كده بتحطه على مكنة لحام، مكنة اللحام بتاخده وبتلحمه وتوديه الناحية التانية، يعني مش تتسنى لغاية لما تلحم، لأ هي بتعبي وتودي الناحية التانية

العميل : تمام… يعني الأتوماتيك كامل هي بتملا وبتعبي وكل حاجة…

المهندس منسي : كل حاجة ما بتمدش إيدك العامل الواحد يقدر سابورت على 6 ماكينات

العميل : إنت بتتكلم في النص أتوماتيك ولا الأتوماتيك كامل؟

المهندس منسي : لا الأتوماتيك، النص أتوماتيك كل مكنة عليها عامل

العميل : آه.. تمام

المهندس منسي : أما الأتوماتيك كاملة ديت ممكن 10 مكنات كمان يقدر عامل واحد يشغلها

العميل : الأتوماتيك الكاملة تكلفتها بالجنيه المصري تطلع بكام؟

المهندس منسي : يعني 45000 جنيه مصري

العميل : متوفرة دي موجودة عندك ولا لسه…

المهندس منسي : آه موجودة بضاعة حاضرة

العميل : تمام… برده بتاخد 3 فاز كهرباء 380 فولت

المهندس منسي : كل المكن بتاعنا متصمم على 220 أما لو إنت عايز 360 ده نقدر نعملهولك

العميل : لأ خلينا في 220 زي الفل، محتاجة مساحة أد إيه؟

المهندس منسي : هوه عادي عملية تغيير الفولت بالنسبة لنا سهلة جداً يعني، إحنا مصنعين مش تجار

العميل : تمام..

المهندس منسي : هي الفكرة بتغير ماتور الحركة، بدل ماتور 220 بتنقله ماتور 380 صح أو ممكن نركب إنفنتر

العميل : آه…

المهندس منسي : عموماً لو إنت عندك الكهرباء 220 مافيش عندك مشكلة خالص

العميل : خليني في 220 أفضل لأنه اللي عندي 220

المهندس منسي : إن شاء الله

العميل : تقريباً المساحة اللي محتاجاها المكنة أد إيه؟

المهندس منسي : هي مساحتها 1.25 متر × 1.25 متر × ارتفاع 1.60 متر

العميل : إحنا بنتكلم في الكاملة

المهندس منسي : آه الأتوماتيك الكاملة آه

العميل : طيب بالنسبة للأكياس التعبئة، هي نفسها بتطبع وبتعمل كل حاجة، أنا بحط….

المهندس منسي : لأ.. لأ.. إنت بتطبع الخامة وبعد كده بتركبها عليها

العميل : تمام.. عندك المكنة بتاعت الطباعة دي جاهزة بردك

المهندس منسي : لا ما هوه مكنة الطباعة ده مشروع كبير

العميل : مشروع كامل

المهندس منسي : آه…

العميل : طب فيه هنا مصدر إن أطبع أقدر أتفق مع مصنع ….

المهندس منسي : آه.. في عندنا آه

العميل : عندك موجود الكلام ده

المهندس منسي : عندنا أو عند غيرنا، إحنا بالنسبة لنا لو جيبتلنا الرولات مش هنقولك لأ عادي

العميل : تمام.. تمام.. ممتاز جداً جداً، يفضل عندي نقطة واحدة عشان أتخيل المنتج اللي أنا عايز أعمله، طريقة القفل بتاعته ممكن أعملها بغطا من فوق زي لامو آخذه باكيت اللبن جهينة أو بخيره، الغطا بيلف ده أركب عليه بخاخ من فوق مثلاً

المهندس منسي : لا هوه بيطلعلك أكياس، أكياس ملحومة إما من 3 جهات أو من 4 جهات أو من الظهر ومن فوق ومن تحت

العميل : آه… آه… يعني حسب الخامة اللي هركبها

المهندس منسي : آه

العميل : تمام، حضرتك إمتى هتبدأ أول يوم بعد العيد

المهندس منسي : يوم السبت إن شاء الله

العميل : السبت إن شاء الله طيب أستأذنك العنوان صح أعرف أوصلك إزاي

المهندس منسي : هبعتهولك في رسالة دلوقتي في تليفونات المبيعات تابع معاهم

العميل : تمام.. تمام وإن شاء الله بإذن الله بعد العيد إن شاء الله بعد السبت بعدك زيارة لو وفعلاً بدي آجيلك

المهندس منسي : تيجي تنورني

العميل : طيب قطع الغيار والصيانة والكلام ده…

المهندس منسي : إحنا اللي مصنعين المكن، لحسابنا…

العميل : ممتاز.. ممتاز يعني تصنيع محلي 100% المكنة

المهندس منسي : لأ 75%

العميل : ممتاز قطع الغيار متوفرة، نسبة الأعطال بتاعت الماكينة كل أد إيه؟ يعني الأعطال الشائعة

المهندس منسي : والله إحنا بنراهن على إن صاحب المكنة يبقى مهندس مكنته خلال 6 أشهر

العميل : يهندس مكنته يعني إيه مش فاهم

المهندس منسي : يعني يبقى هوه اللي فاهم مكنته وفاهم كل حاجة فيها، يعني إحنا بنحاول بقدر الإمكان إن إحنا نسهلها ونسهل الدنيا بحيث إن هوه يعرف يصين مكنته خلال 6 أشهر، وإحنا قاعدنله عادي، إحنا بالنسبة لنا قسم الصيانة في 16 فني، أو 20 فني

العميل : ما شاء الله تمام

المهندس منسي : ولكن هوه ما بنحاولش نبتذ العميل اللي خد من عندنا مكنة كل شويه نطلعله يعني

ينصر دينك إنت جيبت المفيد، برافو عليك، ينصر دينك، يعني المقصود إن أنا بشتري المكنة بلاقي نفسي إن أنا فعلاً قادر أصينها في فترة…

بندرب عليها كامل التدريب، وبنلزم التكنيكال بتاعنا اللي همه الفنيين عندنا إن همه يدربوك عليها ويعملولك شرايط فيديو عليها بكل الاستفسارات بكل حاجة، بحيث إن حضرتك تاخد مكنتك وتبقى مبسوط يعني

العميل : طيب كلام جميل، تقريباً تقريباً تقريباً تكلفة العبوة بتطلع عليا كام، في الساعة 1500 عبوة

المهندس منسي : هوه إحنا بالنسبة نقول مثلاً زي كيس العطور، كيس العطور كان بيتكلف في حدود 3.5 صاغ

العميل : تمام… ممتاز جداً جداً جداً جداً

المهندس منسي : طبعاً احتمال يعلا مع ارتفاع ال، إدعي ربنا يستر ما يرفعوش ال

العميل : طبعاً ما هوه لازم أيوه ما هوه الموازين والمقاييس التجارية بال، هوه الجنيه اللي بيقل مش ال اللي بيطلع، أنا فاهم الكلام ده، أنا تاجر وليا محل تجاري وفاهم الكلام ده كويس

المهندس منسي : لكن بصفة عامة لو من 3 صاغ بقى 5 صاغ برده ممتاز معقول جداً، خدت بالك

العميل : طب تقريباً يا باش مهندس، معلش استحملني شويه، تقريباً المكنة بترجع تكلفتها في ظرف أد إيه؟

المهندس منسي : ده حسب المنتج اللي حضرتك عامله وحسب تسويقه، كل دي ليها اعتبارات، المنتج اللي إنت عامله إيه، ما هوه ممكن يكون منتج قليل وسعره بيعه عالي، فهمتني، مثلاً منتج زي منتج العسل ما تجيش تقارنه مثلاً زي منتج الكاتشب

العميل : لا مستحيل

المهندس منسي : دي عايزه دراسة جدوى وحضرتك اللي بتقوم بيها بنفسك بناء على تكلفة الخامة وتكلفة المنتجات وإيه التسويق بتاعك والبلاسيس بتاعك اللي هي المنطقة اللي إنت هتسوق فيها

العميل : تمام

المهندس منسي : ما هوه الأول بتسوق لوكل، بتسوق محلي، في المحافظة اللي إنت فيها، وبعد كده تبدأ تتوسع في المحافظات التانية، وبعد كده تبدأ تصدر…

العميل : تمام.. كلام جميل 100%

المهندس منسي : تبقى بدايتها إن إنت تشوف المنطقة بتاعتك إيه

العميل : كلام ممتاز، سؤال تاني يا باش مهندس، لو فرضنا إن إحنا خدنا المكنة دلوقتي، وجينا بعد كده ربنا كرمنا والموضوع حلو معانا واشتغلنا فيه، تمام، كم لو فرضنا.. معلش هوه سؤال رخم شويه ربنا يزيدك من وسع، العميل اللي اشترى منك مكنة قبل كده بعد أد إيه اشترى مكنة تانية؟

المهندس منسي : لأ دي أنا مش مبيعات أنا استشاري هندسي فدي اللي يعرفها بتوع المبيعات، إنما أنا شايف الحمد لله في ناس كتيرة نجحت

العميل : وفعلاً في ناس كتيرة نجحت في الموضوع ده صح؟

المهندس منسي : آه… لما نيجي نقول نسبة الناس اللي نجحت أعلى بكتير من الناس اللي قاله لأ مش هنشتغل

العميل : آه.. آه.. كلام جميل

المهندس منسي : لما نيجي نتكلم كده مثلاً نقول حوالي 2% يعني في 98% نجحوا، ده حقيقي…

العميل : برافو عليك ده سؤالي، أنا بكالريوس اقتصاد وعلوم سياسية، والأسئلة اللي بسألهالك هي تقييم دراسة مشروع، خدت بالك

المهندس منسي : آه…

العميل : هوه ده النسبة اللي عايز أعرفها

المهندس منسي : هوه أغلب العملاء اللي أنا لاحظتهم عملاء بيدرسوا الموضوع من كل الجوانب بحيث إنهم ما يخشوش مشروع إلا إذا كان ناجح 100%

العميل : تمام…

المهندس منسي : بعدين في بقى ميزة في المكن إن المكن نفسه فليكسبورتي يعني مرن، مرن إزاي؟ يعني مثلاً نفترض إن إنت واخدها هتعبي بيها مثلاً شامبو

العميل : تمام

المهندس منسي : فتقدر تعبي عليها مثلاً شاور، تقدر تعبي عليها مثلاً مسحوق غسيل، لو إنت غيرت النظام كله..

العميل : تمام.. تمام

المهندس منسي : فعايز تغيرها من سوائل مثلاً لحبيبات، دي ميزة في المكنة عندنا إنك تقدر تاخد فيدينج بتاع حبيبات وتركبه عليها

العميل : ممتاز

المهندس منسي : فهنا نسبة نجاح المشاريع نجحت بالطريقة دي

العميل : ممتاز جداً جداً جداً جداً

المهندس منسي : لو ما كنش فيه الإمكانية دي أعتقد إن نسبة النجاح كانت تبقى أقل، لكن نسبة النجاح عليت لأنه إحنا عملنا…

العميل : في مرونة في تغير المنتج

المهندس منسي : أيوه في مرونة في تغيير المنتج نفسه ممكن أخلي شيء مادة صلبة، سائلة، بودر، حبيبات…فيقدر يحور المكنة لأي اتجاه تاني فالبنسبة له كده الدنيا بقت سهلة

العميل : ممتاز، نقطة تانية المهمة، الإحكام في الإغلاق والتقفيل محكم جداً يعني يستحمل ضغط، يعني لو عملنا مثلاً زي أكياس الشامبو…

المهندس منسي : ما هو بنعمل عليها تجربة إسقاط

العميل : آه.. آه.. تمام

المهندس منسي : يعني بترفع الكيس 175 سم وتوقعه

العميل : تمام.. تمام… ممتاز بإذن الله تعالى إن شاء الله تعالى هكون عندك بعد العيد مباشرة وشكراً ليك يا باش مهندس

المهندس منسي : العفو

العميل : وياريتك كمان تبعتلي العنوان فعلاً

المهندس منسي : إن شاء الله هبعتهولك

العميل : الله يبارلك يا رب الله يبارلك شكراً ليك يا باش مهندس، اتفضل، مع السلامة

المهندس منسي : ، مع السلامة