خامات سليف شرينك لتغليف أغطية زجاجات المياه من شركة مهندس منسي
العميل: السلام عليكم.
المهندس منسي: وعليكم السلام ورحمة الله وبركاته.
العميل: باشا شركة المنسي؟
المهندس منسي: أيوا؟
العميل: طيب بعد إذن حضرتك كنت عايز أسال علي الشرينك للتغليف.
المهندس منسي: اتفضل
العميل: اللي هو يافندم أنا بفتح خط إنتاج أزايز بلاستك، الإزازة تبقى 1 لتر
المهندس منسي: آه.
العميل: ماشي؟ والغطا حيبقى واسع شوية من فوق، يعني حوالي بيقولوا عليه غطا 32.
المهندس منسي: أيوا.
العميل: أوكيه؟ فأنا كنت عايز أعمل عليها طبقة نازلة حوالي 10 سم، مب بعد الغطا نازلة عالإزازة كأنها البرشامة، تحلي لي شكل الإزازة، فاهمني يا باشا؟
المهندس منسي: أيوا معاك، آه اللي هي الـ..
العميل: هي آه الطبقة البلاستك دي اللي بتنزل فبتسيح، أجيبلها بلاور مثلاً بيتسخن عليها كدا حواليها فبتسيح فبتمسك في الإزازة.
المهندس منسي: هي مش بتسيح هي بتشبك عليها بتنكمش
العميل: بتنكمش آه بالظبط كدا فبتمسك فيها
المهندس منسي: بتعمل زي عملية شرنقة على الحاجة.
العميل: آه دي أنا شفتها عالإزايز قبل كدا وكنت شايفها قدامي بيعملوها ببلاور، بس البتاع دا زي الجلد حضرتك، أو نوع من أنواع الجلد.
المهندس منسي: آه هو مش جلد هو خامة اسمها سلوفان الشرينك.
العميل: ممكن.
المهندس منسي: آه.
العميل: هل هي موجودة عند حضرتك؟
المهندس منسي: موجودة آه.
العميل: بس هس بتنزل كلها؟، أصل أنا سألت قالولي بتنزل بتبقى مخرومة من فوق من عند الغطا.
المهندس منسي: أو بتبقى تيوب.
العميل: بتبقى إيه؟
المهندس منسي: تيوب قطعة
العميل: بتبقى قطعة بس مبتبقاش مفتوحة من فوق يا باشا؟، يعني بعد ما بنلحم وبعد ما بنسخن عليها وكدا.
المهندس منسي: لا بتبقى تيوب مفتوحة من فوق ومفتوحة من تحت.
العميل: ماشي ما أنا عايزها تبقى مقفولة من فوق.
المهندس منسي: مقفولة من فوق؟
العميل: آه تبقى مدارية الغطا كله مداري باللي تحتيه، تحت البتاع
المهندس منسي: لا، دا دي حيبقى لها طلبية خاصة، إنما هو الطبيعي بتبقى مفتوحة من فوق ومفتوحة من تحت.
العميل: آه، مفتوحة من فوق ومفتوحة من تحت.
المهندس منسي: مم..
العميل: طيب قولي لو سمحت لو مفتوحة من فوق.
المهندس منسي: زي إزازة المية؟
العميل: آه بتبقى مفتوحة من فوق، الله ينور على حضرتك.
المهندس منسي: آه ما هي نفس دي
العميل: آه آه آه، طيب، طب قولي حضرتك لو هتبقى مفتوحة من فوق، هتبقى جلد ولونها أسود، أنا عايز لونها أسمر.
المهندس منسي: آه.
العميل: دي تعملها كام؟
المهندس منسي: دا بيتحدد بقى بناء على بعض الأشياء، حضرتك بتقولي الكمية، أول حاجة الكمية، تاني حاجة السماكة، السماكة اللي انت عايزها.
العميل: لا أنا عايز سماكة خفيفة جدا وفي نفس الوقت تبقى بسيطة جدا على اعتبار يلزق على طول، أوكيه؟، وفي نفس الوقت متشفش.
المهندس منسي: الكمية قد إيه؟
العميل: يعني مثلاً لو قلت طلبية بـ 3 آلاف، بجرب بس كدا بـ 3 آلاف
المهندس منسي: أقل كمية مليون، 200 ألف، كدا يعني
العميل: يا نهار أبيض! لا والله؟ 200 ألف إزازة؟
المهندس منسي: ممكن يكون في موجود بضاعة حاضرة 10، 15 ألف، إنما 3 آلاف دي يعني مش تبعنا خالص
العميل: 10، 15 ألف؟
المهندس منسي: مم.
العميل: ماشي، لو قلت 10 آلاف هتبقى عاملة كام؟
المهندس منسي: حضرتك تيجي تشرفنا بقى تختار الملزمة اللي هتعجبك وخير يعني.
العميل: مفيش مشاكل أجيلك يا باشا إنتو فين دلوقتي؟
المهندس منسي: هو في باب الشعرية، حدائق القبة، ومدينة نصر، والمواعيد من 11 لـ 9.
العميل: طب اللي ينجز معايا يا باشا ويعرف يدلني عالصح؟ هو حضرتك..
المهندس منسي: يا باشا زي بعض.
العميل: آه، باب الشعرية وإيه تاني؟
المهندس منسي: حدائق القبة، ومدينة نصر.
العميل: حدائق القبة… مدينة نصر، طب باب الشعرية دا فين؟ ولا هو..
المهندس منسي: هبعتهولك في رسالة حالاً.
العميل: طب ممكن حضرتك تديني ولو نبذة بس عن السعر، بيتراوح من كام مثلاً، لو حتى مثلا حاجة خفيفة..
المهندس منسي: مهو حضرتك على حسب كام في كام، والسعر في حدود أقل حاجة الألف بأربعين جنيه، يعني مثلاً..
العميل: حضرتك بتظبطها يعني؟
المهندس منسي: للألف، بس دا كميات، إنما انت هتروح لو لقيت حاجة جاهزة تاخدها السعر حيبقى أعلى طبعاً
العميل: السعر حيبقى أعلى؟
المهندس منسي: مم، عشان كمية قليلة
العميل: اللي هم الـ 10 آلاف مثلاً؟
المهندس منسي: آه.
العميل: طب لازم من وجهة نظرك كدا..
المهندس منسي: مهو لو كنت أعرف صدقني كنت قلتلك على طول، هو كل العملية إن حضرتك بتروح تشوف الخامات اللي موجودة اللي جاهزة دلوقتي..
العميل: آه
المهندس منسي: لأنه مش هيعملك طلبية خاصة، فهيقولك السماكة دي..، يعني حضرتك هتنقي السماكة، هيقولك دي أو دي أو دي، وانت تختار هيقولك دي سعرها كذا، فكون أن أنا أقولك أسعار أنا عايز ليست list أتكلم منها.
العميل: آه آه آه، طيب معلش حاجة تانية..
المهندس منسي: مم.
العميل: البامبات، عارف حضرتك البامب، اللي بيتحط على الإزازة بيضغط فينزل؟
المهندس منسي: آه البامبات آه
العميل: دي حضرتك ليك علاقة بيها مثلاً، لها طلب…
المهندس منسي: آه دي لها طلب، هي مش طبيعة شغلنا، لكن إحنا ممكن نستورد لك عن طريق شركتنا اللي في الصين.
العميل: آه وبرضو لما أروح هناك باب الشعرية مثلاً ولا حاجة، حد يعرف يدلني عليها
المهندس منسي: أكيد
العميل: آه بمواصفات معينة مثلاً المواصفات اللي أنا عايزها
المهندس منسي: إن شاء الله
العميل: خلاص ماشي ماشي، ماشي يا أستاذ ماشي، أشكرك أشكرك، أنا هستنى بس من حضرتك الرسالة اللي فيها العناوين.
المهندس منسي: إن شاء الله
العميل: وياريت لو في أرقام تليفونات يبقى انت ريحتني.
المهندس منسي: ماشي يا باشا
العميل: شكراً يافندم، شكراً شكراً
