مكن تغليف الصابون بالسلوفان كود 802 ماركة مهندس منسي

العميل	:	السلام عليكم
المهندس منسي	:	عليكم السلام ورحمة الله وبركاته
العميل	:	شركة المهندس منسي إم تو باك
المهندس منسي	:	أيوه
العميل	:	حضرتك بتصنعوا مكن تغليف صابون؟
المهندس منسي	:	إن شاء الله
العميل	:	أنا جبت رقم حضرتك من على جوجل، أنا محتاج مكنة تغليف الصابون الورق الحراري، فستفسر عن سعرها، وإمكانياتها وقدرتها
المهندس منسي	:	في حاجة بـ ، وفي حاجة بـ
العميل	:	هو مستورد يا باشا؟
المهندس منسي	:	لا إحنا ماركة، براند عالمي
العميل	:	ما شاء الله، هل هي يدوي ولا أتوماتيك؟ أصل أنا شفت اللي اليدوي على اليوتيوب، دي مش مناسبة ليا خالص
المهندس منسي	:	مافيش حاجة اسمها يدوي، مادام مكنة يبقى نص أتوماتيك، هي مكنة سير إنتاجي، تاخدها و تلحمها و توديها الناحية التانية، دي تعتبر أوتماتيك كمان
العميل	:	هي معلش هي دي متاحة عند حضرتك، احكيلي بقى عن الـ إيه وضعها يا باشا
المهندس منسي	:	دي حضرتك حد بيقعد يرص الصابونة على السير وهي بتاخد الصابونة تلفها في الكيس وتقصها وتحطها الناحية التانية
العميل	:	ده يا باشا  تغليف الفلوباك
المهندس منسي	:	أيوه
العميل	:	لا أنا بتكلم على الورق
المهندس منسي	:	آآآآه يبقى إنت كده بتتكلم على الورق الحراري اللي هو متطبق تطبيق
العميل	:	الله ينور عليك
المهندس منسي	:	لا همه أصلهم بيسموا السلوفان ورق حراري، وبيسموا التغليف ورق حراري، بص الدنيا عندنا متلخبطة في المسميات
العميل	:	آه ممكن آه، أنا قصدي على الورق بقى
المهندس منسي	:	الورق دي الأتوماتيك بتاعتها تعمل 22
العميل	:	ده قدرتها كام قطعة في الساعة؟
المهندس منسي	:	في حدود 4200 في الساعة
العميل	:	دي الأتوماتيك اللي فيها شاشة ديجيتال
المهندس منسي	:	دي ما تشغلش بالك بيها، إحنا بنسهل عليك الدنيا على الآخر، لأنك ابن بلدنا، يوم ما يحصل مشكلة هنلاقيك ناطط قاعد جنبنا
العميل	:	يا باشا ما شاء الله  سمعة حضرتك يعني… ربنا يزيدك ومن نجاح لنجاح، أنا قصدي المكنة اللي حضرتك بتقول عليها دي، بشاشة ديجيتال وإنت بتحط البكرة فوق وهي بتقطع على حجم الصابونة
المهندس منسي	:	دي اللي أنا بكلمك عليها، بشاشة ديجتال بترص لها الصابون في عامود وهي بتاخد الصابونة ترك.. ترك… كله ورا بعضه
العميل	:	الله ينور عليك، بس أنا كنت سمعت من الناس اللي في الصناعة إن الحاجة دي بتيجي مستوردة مالهاش مصري هنا هل الكلام ده مضبوط
	:
العميل	:	تمام.. بس هي نفس الديزاين يا باش مهندس، بنفس الميكانيكا بتاعتها مثلاً
المهندس منسي	:	أنا غيرت في الميكانيكا كتير، حطيت فكر المهندس منسي جوا، وبعدين ما خفتش من حد وفتحتها  من جوه وشرحت المكنة ولا همني إن حد هيقلدني ولا أي حاجة من الحاجات دي
العميل	:	ما شاء الله يا باشا ربنا يزيدك، طب هل في إمكانية لو في فيديو توضيحي أو حاجة، أو الرقم ده قابل للتفاوض
المهندس منسي	:	الأسعار بتاعتنا نهائية يعلم ربنا
العميل	:	تمام.. في فيديوهات توضيحية ولا حاجة؟
المهندس منسي	:	بص هي هياها مكنة تغليف المعسل، هي نفسها مكنة تغليف العطور الثري دي، هي مكنة واحدة، كل اللي عليك إنك بتغير الماتيريال
العميل	:	بس بالنسبة .. أهم حاجة للصابون عندنا هي التغليف، لأنه العميل إيده مش هتتمد على حاجة غير التغليف الكويس، هو ده أول حاجة عينه بتيجي عليها
المهندس منسي	:	أنا إن شاء الله قادر عليها
العميل	:	خلاص مافيش مشكلة، فيديو مش  متاح برده؟
المهندس منسي	:	لا متاح ده إحنا مغرقين الدنيا فيديوهات، ده إحنا رافعين أكتر من ربع مليون فيديو
العميل	:	طب أنا بحثت عنك كتير على اليوتيوب، وعلى الموقع بتاع حضرتك
المهندس منسي	:	المكنة دي موديل 802 ماركة المهندس منسي
العميل	:	طب مالهاش لينك ولا حاجة لو في إمكانية تبعتلي على الواتس ولا حاجة
المهندس منسي	:	ممكن لو راسلتنا بقى على الإيميل
العميل	:	أنا اسمي محمد شمس، حضرتك اللي بتطلع على الإيميل ولا لازم أبعت بالتفصيل
المهندس منسي	:	لا أصل قسم المراسلات اللي بيتابع الإيميلات
العميل	:	أطلب منه المكنة 802 ماركة المهندس منسي، تمام، ولو في إمكانية لو أنا في القاهرة آجي أعاينها ولا حاجة ولا صعب؟
المهندس منسي	:	لا تيجي تنورني في أي وقت
العميل	:	ربنا يخليك يا باشا، أخيراً معلش إن أنا أطلت على حضرتك، التغليف دلوقتي عشان أنا داخل في الصابون جديد فهشتري خط اتعاقدت عليه  تمام، عندي مشكلة التغليف حضرتك حلتها لي كده تمام، التغليف اللي هو بالسلوفان يعني مثلاً 4 في جزء واحد هل ده متاح عند حضرتك
المهندس منسي	:	آه السلوفان الشرينك، موجودة
العميل	:	ده ليه مكنة خاصة بيه برده
المهندس منسي	:	سعرها بي، يعني 7200 جنيه مصري، هو حضرتك بتصنع الصابون من أول مرحلة التصبن؟
العميل	:	لا من المكرونة، مكرونة ماليزي، التصبن ده صعب هنا في مصر شويه
المهندس منسي	:	ليه ده سهل جداً
العميل	:	بالعكس، اللي وصلي إن التصبن أنا سألت ناس كتير قالوا إن التصبن ما بيتطلعش بنفس الكواليتي بتاعت المكرونة السوبر وايز الماليزي دي، رغم إني سمعت التصبن هيوفر أرقام خيالية في الطن مثلاً، يعني يوفر 3-4 آلاف في الطن
المهندس منسي	:	آه
العميل	:	بس هل بيطلع بنفس الكواليتي؟
المهندس منسي	:	هي مشكلتنا هنا في مصر إن أنا سمعت دي، النهاردة كل واحد ينصحك بما هو يستفيد
العميل	:	والله حضرتك أفادتني جداً في المكالمة دي، هل حضرتك عندك أو ممكن توصلني بكيميائي مثلاً يوصلني لنفس المكرونة دي
المهندس منسي	:	يا باشا إحنا لينا فرع في باب الشعرية ورانا على طول شارع اسمه شارع الجيش ده شارع الكيميائيين في مصر، لو همه مش فاضيين هيدلوك على كيميائيين الدنيا والآخرة
العميل	:	يعني لو أنا في إسكندرية ممكن حد يتواصل معايا
المهندس منسي	:	آه ممكن يجيلك ويتعاون معاك، ويبيعلك التضريبة، وبعدين هي مش محتاجة يعني، ده كل العملية…
العميل	:	يعني رأي حضرتك إن أنا أشتغل بالتصبن
المهندس منسي	:	والله عشان توفر في التكلفة، بعدين ما المكرونة موجودة في مصر
العميل	:	بس محلي بقى، يعني في معناه بيطلع فيها حموضة زيادة، رطوبة زيادة
المهندس منسي	:	لا.. لا.. أنا هفهم حضرتك الوضع إيه؟؟؟ في مصانع محترمة وفي مصانع بتدبر نفسها
العميل	:	في ناس تحت السلم
المهندس منسي	:	مصانع وكل حاجة ولكن درجة ثالثة، زي أي حاجة في الدنيا درجات، في أي بلد في الدنيا، طب أنا بعمل حاجة اسمها طبات إندكشن سيل، أنا عندي فرع في الصين، بصدرها للصين، وأخوانا العرب بيروحوا يشتروها من الصين
العميل	:	حاجة غريبة، ما هو الثقافة ضعيفة شويه، طب حضرتك تقدر إن شاء الله هنتعاقد مع حضرتك لأنك أكتر حد ثقة كشركة بعد ما عملنا دراسات جدوى وكده، فلو كده إن شاء الله نتعاقد مع حضرتك يبقى التسليم خلال أد إيه؟
المهندس منسي	:	ممكن تكون بضاعة حاضرة، لو مش بضاعة حاضرة ممكن تيجي خلال 45 يوم
العميل	:	حضرتك بتصنعها هنا يا باشا؟
المهندس منسي	:	والله كنت أتمنى أصنعها كلها هنا
العميل	:	يعني تعتبر شبه مستوردة يعني
المهندس منسي	:	بص البلد اللي تعيش لوحدها وتقفل على نفسها تبقى بلد فاشلة، يعني إحنا  أحسن من اليابان وأمريكا، افتح التليفون الأيفون وشوفه، ميد إن تشاينا، همه بيحطوا بس السوفت ويير بس مش أكتر من كده
العميل	:	آه.. آه…
المهندس منسي	:	طب ما أنا زملائي في ألمانيا، ببعت لهم مكن سي إن سي ليزر راي متفكك، همه بيجمعوه ويحطوا السوفت ويير بس، فهنا إحنا بنعمل اللي نقدر عليه، حتة في البودي، مش عارف إيه
العميل	:	لا ربنا يزيدك يا باش مهندس ومن نجاح إلى نجاح، وأنا بإذن الرحمن بعد ما أتعاقد مع حضرتك لازم أنال شرف إن أنا أقعد مع حضرتك أكيد يعني، المهندس منسي معايا؟
المهندس منسي	:	أيوه
العميل	:	خلاص أنا إن شاء الله هكلم الشركاء بتوعي وبإذن الرحمن نتواصل مع حضرتك في القريب العاجل
المهندس منسي	:	إن شاء الله
العميل	:	شكراً يا باش مهندس، مع السلامة
المهندس منسي	:	مع السلامة