اسطمبات عبوات 1 لتر لتعبئة بودر الحبر من شركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : شركة المهندس منسي
المهندس منسي : أيوه
العميل : لو سمحت كنت بسأل على العبوات الـ 1 لتر بتاعت الزيت دي، ينفع أحط فيها بودر؟
المهندس منسي : ينفع آه
العميل : تمام دي تكلفتها كام اللي موجودة على الموقع عندكم على الصفحة؟
المهندس منسي : هوه إحنا سياسة شركتنا إن إحنا بنصنع الاسطمبة الأول وبناء عليها بنبدأ ننفذ العبوات، الاسطمبة بتتكلف في حدود أو ما يعدلها بالجنيه المصري
العميل : يعني لازم نعمل الاسطمبة الأول؟
المهندس منسي : آه
العميل : تمام، يبقى 1200 اسطمبة، ؟
المهندس منسي : آه
العميل : وبعد كده؟
المهندس منسي : بعد كده بنصنع عليها الكميات اللي إنت عايزها
العميل : طيب أقل كمية يكون سعرها تقريباً أد إيه؟
المهندس منسي : ما هو مش أقل كمية، هي بعد كده بنوزن لك العبوات فاضية بالكيلو، يعني نمسك العبوات كده نوزنها فاضية، الكيلو فاضي عبوات فاضية بيبقى في حدود 35 جنيه، مش عبوة الكيلو بكذا لأ، الكيلو وهي عبوات فاضية….
العميل : يعني الجراكن الأزايز وهي فاضية الكيلو منها بـ 35 جنيه
المهندس منسي : أيوه الجرام بـ 3.5 صاغ
العميل : آه.. آه.. تمام، بس الاسطمبة ما تنزلش عن كده؟
المهندس منسي : لا ده السعر… ده إحنا شغالين فيه بقالنا دلوقتي 10 سنين
العميل : طب سواء الاسطمبة دي في أي حاجة أنا أختارها يعني
المهندس منسي : آه براحتك إنت بتجيبلي الشكل وتقولي أنا عايز زي ده
العميل : آه سواء حتى لو العبوات الرمادي برده، هي في السعر واحد بـ 35 جنيه الكيلو، يبقى السعر ثابت لأي حاجة؟ أي شكل إحنا هنعمله؟
المهندس منسي : آه أي شكل في أي خامة
العميل : طيب عملنا الاسطمبة وعملنا الشكل ونيجي بقى….
المهندس منسي : إلا بقى لو ال علي يبقى البلاستيك هيعلى معاه
العميل : مافيش مشكلة زي ما إحنا ماشيين في السوق مافيش مشكلة
المهندس منسي : آه يعني بيبقى على الكل
العميل : آه.. آه.. طيب ده حاجة، طب الألف إزازة من دي ممكن يعملوا كام كيلو؟
المهندس منسي : ما هو أنا لو عارف كنت قلتلك سعر الإزازة هيتكلف كذا، إنما أنا دلوقتي….
العميل : الوزن بتاعها إحنا نقدر ننتحكم فيه ولا ده حاجة بتبقى تبع المصنع؟
المهندس منسي : أيوه.. أيوه إحنا بنتحكم في الوزن، يعني إحنا دلوقتي عملتها لك 25 جرام مثلاً وجيت إنت قلتلي لأ أنا عايزها 20 عشان التكلفة، أقولك ماشي
العميل : طيب ينفع في الأول نخليها تقيلة وبعد كده نخففها؟
المهندس منسي : عادي براحتنا ما الاسطمبة بتاعتنا بقى
العميل : تمام.. طيب، دي نقطة، نيجي للغلاف اللي هي الألومنيوم اللي من فوق
المهندس منسي : الـ إيه؟؟
العميل : الإندكشن اللي من فوق، الألومنيوم دي
المهندس منسي : آه.. موجودة عندنا آه
العميل : دي بيكون سعرها كام الألومنيوم دي؟
المهندس منسي : الألومنيا دي بتحدد بناء على المقاس وبناء على الكمية، يعني إنت شفت مثلاً المقاس بتاعك كام والكمية أد إيه، ونبدأ….
العميل : إديني متوسط سعر عشان أقدر أحسبها؟
المهندس منسي : لأ ما هو في قوائم أسعار كتيرة، يعني مثلاً اللي بيطلب 10000 غير اللي بيطلب… فمقدرش إن أنا أمشي….لأ ممكن يكون يا ألف يا ألفين في أول حاجة، أول شهر
العميل : لا ألف وألفين ديت… مقاس كام بقى؟
المهندس منسي : المقاس اللي متعارف عليه لو الإزازة يكون بقها كبير
العميل : آه ما هو بقها كبير مقاسها كام؟
المهندس منسي : يعني إحنا…. أقول لحضرتك على حاجة…عملية الصناعة غير العمليات.. غير الحاجات العامة، يعني ممكن آجي أقولك مثلاً أنا عايز أروح شارع في أوله عمارة كده معمولة جديد، إنت ممكن تفهمها، إنما في الهندسة والصناعة لازم تحطلي جنبين أجيب التالت، لما نيجي نقول 10 + 5 = 15، طب لو جبتلي الـ 15 وجبتلي الـ 5 يبقى أنا هجيب الـ 10، طب ينفع تجيب الـ 15 وتقولي شوف هل تنفع كام؟؟؟ ما هي تنفع بقى حاجات كتيرة قوي، فهمتني
العميل : بس أنا بسأل….
المهندس منسي : ما هو إحنا بالنسبة لنا ما ينفعش نحط أرقام في أي… يعني حاجات أقولك آه في ناتج واحد بس أنا هطلعوا، إنما لما تيجي تقولي حاصل ضرب 42 كام × كام؟؟ ما ينفعش، لازم تقولي حاصل ضرب 7 = 42 أقولك 6، أنا بقى عليا إن أقولك 6 فهمتني، فلازم تديني 2 مكون عشان أطلعلك التالت، فإنت أقعد مع نفسك وادرس العملية وحدد حدود واللي ناقصك أنا هكملهولك
العميل : يعني أقيسلك الغطا اللي أنا محتاجه، يعني بق الإزازة اللي أنا عايزه
المهندس منسي : أيوه.. أيوه..
العميل : مافيش مشكلة هقيسهولك، إحنا كده كده لسه ما حددناش الشكل بس البق الفتحة دي متعارف عليها لأن إحنا هنحط حاجة بودر جواها
المهندس منسي : إن شاء الله
العميل : طيب لحاجة تانية إن شاء الله مشكلة النهاردة، أنا بس كنت عايز أعمل دراسة تقريبية للحاجة
المهندس منسي : ما هو أعمل دراسة تقريبية بناء على إيه؟؟؟ ما هو إنت بتقولي أي مقاس كده في أي حاجة
العميل : لا مش أي مقاس يعني لو حضرتك عارف الجركن الكيلو بتاع الزيت يبقى أده مرة ونص
المهندس منسي : آه ما هو أده مرة ونص، أنا ما أعرفش أشتغل كده، حضرتك اضطبها وشوف البق كام، امسك عبوة وشوف البق كام وشوف الحاجات ديت وقولي وأنا تحت الأمر
العميل : طيب مافيش مشكلة، طب نيجي للمكنة اللي هي بتعمل البرشامة الألومنيا
المهندس منسي : آه دي موجودة بضاعة حاضرة سعرها بيبدأ من
العميل : بيبدأ، يعني في فرق بين رخيص وغالي؟
المهندس منسي : آه.. ما هو إنت لازم تيجي تشوف المكن بقى وتشوف…
العميل : أنا شفت عندك في حاجات أتوماتيك وفي حاجات كده يدوي
المهندس منسي : آه.. آه.. في عندي مكنة بـ ، وفي مكنة تانية بـ 350 ، وسعرها ما يطلعش أكتر من كده، أكتر من كده لو هطلعهولك أطلعهولك فهلوة
العميل : آه.. آه.. تمام، نيجي لنقطة تانية معلش أنا كنت نسيتها، الإزازة لازم نحط عليها اسم الشركة، هيتكلف كتير ولا نفس الاسطمبة؟
المهندس منسي : نفس الاسطمبة بنحفرها وناخد حفرها ونحفرهالك ونعملها لك
العميل : الـ هتزيد ولا هتبقى ثابتة؟
المهندس منسي : بس لما تنوي بس لما تنوي إن شاء الله…
العميل : لأ.. لأ.. لا هجيلك إن شاء الله بإذن الله
المهندس منسي : سعر الحفر بيبقى بناء على الكلام، يعني ممكن يتكلف 200-300 جنيه يعني مش كتير
العميل : مش مشكلة.. مش مشكلة، أصل الحاجة بتتشحن فأنا عايز أأمن العبوات قبل ما تيجي
المهندس منسي : ييسرلك ربنا
العميل : فربنا ييسر الحال بإذن الله، طيب كنت هسأل حضرتك على إيه… خلاص مافيش مشكلة، أدي المكنة عرفناها والطبات مش مشكلة سعرها، تمام
المهندس منسي : آه…
العميل : ماشي يا فندم أوكيه خلاص…
المهندس منسي : إنت هتعبي إيه؟
العميل : هعبي بودر تونر حبر
المهندس منسي : آه.. آه… هوه إنت ليك في المكن الريكو؟
العميل : آه محتاج حاجة فيه؟
المهندس منسي : آه عندي مكنة عايز أضبطها يعني
العميل : طيب على العموم أنا حالياً كل تشغيلنا الخطة الحالية على الزيروكس
المهندس منسي : هي الزيروكس أحسن ولا الريكو ولا الكانون
العميل : لأ الزيروكس أفضل، بس لو حد يجبهالك تكون مستوردة بحالة كويسة
المهندس منسي : طب اللي همه سبورتد قوي فيها يعني لما نيجي إن خدمة ما بعد البيع…
العميل : لأ ما هو حضرتك هشتغل مع الشركات الخاصة، مش هتشتغل مع اللوكال، لأن اللوكال هتبقى غالية جداً، يعني دلوقتي بيجيلك زيارة بـ350 جنيه
المهندس منسي : آه….
العميل : أما الشركات الخاصة لما ببعت زيارة مثلاً بـ 100-150 جنيه النص، نفس القصة في الأحبار
المهندس منسي : طب الفنيين موجودين ومواعيدهم حلوة ولا…
العميل : لا حسب الشركة، يعني شركة ملتزمة معاك هتلاقيه بيجيلك على طول
في أنواع أنا شفت في أنواع أحبار، وفي أنواع اللي هي واتس كده نظام واتس
المهندس منسي : نظام إيه؟
العميل : أنا شفت الزيروكس في حاجات كتيرة، في منها أحبار، وفي منها نظام واتس اللي هوه بكرة الحبر، الحبر بكرة كده
المهندس منسي : لأ الحبر بكرة دي مكنة الكروت
العميل : آه…
المهندس منسي : مكنة الكروت الـ آي دي زي كرت ميلادي، شبه البطاقة كده، الحاجات اللي شبه البطاقة
العميل : آه… وفي البودر
المهندس منسي : الغالب دلوقتي كله بيكون بودر، خلاص بقى السايل ده بتبقى الحاجات البطيئة، دي خلاص انتهينا منها خلاص بقت قليلة قوي في السوق
طب البودر اللي على الـ إيه فور تعملها في حدود كام؟ جديدة كام ومستعملة كام؟
العميل : المكنة؟
المهندس منسي : آه
العميل : المكنة حسب السرعة، تلاقي مكنة مثلاً سرعتها 30 ورقة في الدقيقة، 35 ورقة، 75 ورقة
المهندس منسي : مش عايز سرعة كبيرة قوي
العميل : هتوصلها على البرنتر ولا مش عايزه؟
المهندس منسي : آه على البرنتر آه
العميل : كذا واحد
المهندس منسي : لا أنا جايبها برنتر بس مش أكتر من كده برنتر على كمبيوتر
العميل : يعني ممكن تاخد حاجة موجودة وفي حاجة اسمها 123128 ده موديل يعني لا عالي ولا منخفض جميل، متوسط وسعره كويس هتكون عامله حوالي 5000 جنيه
المهندس منسي : اسمها إيه؟
العميل : 123128
المهندس منسي : ماشي
العميل : تمام
المهندس منسي : آه
العميل : ودي حبرها رخيص ومافيهاش أحبار
المهندس منسي : بتشيل بقى التونر بتاعها كام كيلو ولا؟
العميل : آه التونر حوالي 900 جرام يعمله حوالي من 12-15 ألف نسخة، و في يعمله 20-22 ألف نسخة
المهندس منسي : وجديدة بكام بقى؟
العميل : جديدة تلاقيها حوالي 32.5 تقريباً
المهندس منسي : فرق كبير
العميل : آه عشان هي زيروكس
المهندس منسي : آه…
العميل : ده مديلك المتوسطة ده لو قلتك التانية العالية هتلاقيها بـ 85 ألف
المهندس منسي : طب أنا ممكن أفتح على توكيل زيروكس ألاقي مليون واحد توكيل زيروكس ما أعرفش مين توكيل زيروكس بالضبط
العميل : لا هي واحدة بس
المهندس منسي : مين بقى؟
العميل : شركة نايل سيتي، بس كله بيضربها عشان الأسعار، فرق الأسعار طبعاً الوكيل طبعاً في أي دولة بيبقى مرتفع جداً
المهندس منسي : شركة اسمها نايل سيتي
العميل : لأ في عمارات النايل سيتي، شركة اسمها إيه مش متذكرها اسمها إيه بالضبط
المهندس منسي : عمارات النايل سيتي دي فين؟ في 6 أكتوبر؟
العميل : دي ناحية الكورنيش ليهم مكتب كده هناك صغير كده
المهندس منسي : ماشي يا غالي، لكن ما تعرفش اسم الشركة إيه؟
العميل : لا والله ما أعرفش لأن أنا مش فاكره، لأن كده كده إحنا بنستورد الحاجات بتاعتها من بره
المهندس منسي : طب ما تخدمني الله يرضى عليك وتجيبلي اسم الشركة بتاعتهم الله يرضى عليك يا رب
العميل : حاضر والله لو عرفتها هكلمك وأقولك أو أبعتهالك في رسالة
المهندس منسي : أنا قابلتهم في أمريكا وهمه كل ما.. يعني المشكلة كانوا يقولك إحنا لينا وكلاء في.. يعني مثلاً تقوله إنت من بلد إيه ، فالوكيل عندك معطلك إنك تعرف تبادله
العميل : لأ همه الفكرة إن همه شركة إنترناشيونال إن همه في أي دولة عملية احتكار
المهندس منسي : ما أنا فاهم آه إن هوه بيقولك أنا مش هدوش نفسي مع العامة أنا هعمل إيجنت في كل بلد والليجنت بقى أنا معاه هديلوا شروط إن هوه يبيعلي كذا وأنا مش محتاج من البلد دي أكتر من كذا
العميل : لا خلاص همه كلهم.. كل العالم الإيجنت كله معظمهم منتهي والدليل إن إحنا بنشتغل الشغلانة مع نفسنا، خاصة بينا، سواء مكن جديد لما بنحتاج حد عايز جديد بنستورده من بره، ما نخدوش منهم لأنهم هنا بيدهولنا غالي
المهندس منسي : آه.. آه…
العميل : يعني بالكبير قوي يدونا 10% خصم، ولا أقول 5 % يعني مثلاً حد زي حضرتك عايز منهم مكنة يقولهم يقولوا 33000 أقوله خلاص أنا أجيبهالك 30000 إلا 5%
المهندس منسي : آه.. آه.. صح
العميل : عشان أنا شركة خاصة فهو يديني خصم عليها
المهندس منسي : آه…
العميل : ده الحل الوحيد، بس في الغالب قطع الغيار الأصلية بنستوردها، الأحبار بنستوردها أصلية أو تقليد الأصلية، نفس الحبر بس ما بيكونش في الكارتج، بيكون في إزازة فل في إزازة بتعبي حضرتك زي الإزازة اللي إحنا عايزين نعملها كده، بس من نفس المصنع بتاعها، لأن المصنع مش بتاعهم همه، همه بيصنعوا في مصانع تانية
المهندس منسي : ماشي
العميل : فإحنا بناخد من نفس المصنع اللي هوه بيعمل الحبر بتاعهم، لأنه ما ينفعش تاخد مكان حاجة هتبوظ منك
المهندس منسي : ماشي يا جميل
العميل : ماشي وتحت أمرك في أي حاجة
المهندس منسي : الله يبارك لك
العميل : ماشي وخير إن شاء الله…
المهندس منسي : معلش الموديل تاني اسمه إيه؟
العميل : 123128
المهندس منسي : في حاجة أبطأ من كده، مش مهم عندي السرعة؟
العميل : أبطأ من كده هتلاقيها تكلفة أحبارها غالية
المهندس منسي : آه… آه…
العميل : بس زيروكس هتلاقيها غيروا المدويل ده، هي هي نفس المكنة بس سموها 5223
المهندس منسي : يعني دلوقتي لأ أنا بتكلم على الشعبي اللي الدنيا كلها فاهمه فيها
العميل : الدنيا كلها فاهمه فيها، والله هوه في الغالب المكنات كلها بيجيبوا ريكو، بس حضرتك لو احتجت زيروكس مافيش مشكلة، هبعتلك زيروكس والصيانة موجودة وكل حاجة موجودة، هوه مكان حضرتك فين؟
المهندس منسي : أنا عندني حدائق القبة، مدينة نصر، باب الشعرية
العميل : خلاص مافيش مشكلة، الصيانة عندنا بتبقى تاني يوم على طول لو في عطل، بس في الغالب مافيش حاجة بتحصل عندنا بإذن الله
المهندس منسي : إن شاء الله، ماشي يا غالي
العميل : ماشي يا فندم، سلام عليكم
المهندس منسي : مع السلامة
العميل : الله يسلمك
