ماكينة تعبئة وتغليف الحلاوة الطحينية من شركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : لو سمحت أنا كنت بتصل بشركة المهندس، إم تو باك
المهندس منسي : أيوه
العميل : تمام كده
المهندس منسي : معاك
العميل : حضرتك معلش إحنا شباب جديد وعايزين نبدأ مشروع تصنيع الحلاوة، فكنت بسأل عن كل حاجة
المهندس منسي : تصنيع الـ إيه؟
العميل : الحلاوة الطحينية
المهندس منسي : آه…حضرتك بتقولنا على المكن اللي إنت عايزه وإحنا بنقولك عليه، أما أنا عايز دراسة جدوى مثلاً فنية وهندسية، ولا دراسة جدوى تجارية؟
العميل : لأ هوه أنا عايز كل حاجة…
المهندس منسي : بص إحنا تخصصنا إن إحنا نبيعلك مكن
العميل : تمام
المهندس منسي : واخد بالك، الشغل بقى إن المشروع ده يتكون من إيه ده مش تخصصنا إحنا، فهمتني
العميل : هوه حضرتك معندكش مثلاً مهندسين أو كده يعمله الشغل أو كده
المهندس منسي : لأ إحنا بنفتح مكتب قريب علشان خاطر يبقى استشارات هندسية وتسويقية وتنمية
العميل : طب حضرتك لو أنا عايز أتعاقد معاك على المكن وكده يعني، نبدأ إزاي
المهندس منسي : نعم؟
العميل : تنصحني أبدأ إزاي؟
المهندس منسي : ما هوه أنصحك إن إنت تعرف الخط بتاعك الأول إن إنت هتصنع إيه؟ ما هوه إنت لو معدكش خبرة تشتري مكن تعمل بيه إيه؟ ما هوه إنت لازم تتعلم الأول يعني مكن دوت، تعرفه، المكن ده إيه؟ على الأقل، واخد بالك
العميل : تمام..
المهندس منسي : ما تبقاش عرضة للصنايعية يشتغلوك.. أما بالنسبة لمكنا إحنا التعبئة والتغليف ده بضاعة حاضرة، إحنا نعلمك فهمتني..
العميل : تعلمني الشغل على المكنة يعني..
المهندس منسي : آه.. ده عادي بندرب وبنعملك فيديوهات تدريب وحاجات من ديت إن إنت إزاي تشغل المكنة، لو إنت مكنة تعبئة وتغليف دي مش محتاجه لصنعة ولا محتاج حاجة، كل العملية إن إنت بتروح تجيب المنتجات بتعتك اللي إنت عايز تعبيها، وات إيفر أياً كانت يعني، يعني مثلاً دلوقتي لنفترض إن أنت عايز تعمل إيه، الكلام اللي أنا هقولهولك ده نصيحة مش…
العميل : تمام…
المهندس منسي : نفترض إن أنا دلوقتي عايز أعمل إيه، عايز أبيع حلاوة بار مثلاً، الحلاوة الطحينية البار مثلاً، فأروح رايح متعاقد مع شركة حلاوة طحينية بتصنع هي الحلاوة الطحينية، قبل ما أخوض التجربة وأدفع مبالغ كبيرة أرجع بعد كده أزعل…
العميل : آه.. يعني أعرف الأول أجيب المنتج….
المهندس منسي : أنا دلوقتي دلوقتي مكسبي 5 مكسب، هخلي مكسبي مش 5 مكسب، نص المكسب بس وأعمل إيه؟ أروح أتعاقد معاه هقوله إنت ببيع الحلاوة البار بكام؟ هيقولك ساي بـ جنيه أو بـ نص جنيه، هتقوله طيب أنا عايزه بلاس مش عايزه بار عايزه بلاس، بلك 10 كيلو أو بلك 5 كيلو
العميل : تمام..
المهندس منسي : وأروح جايب البالك دوت وأروح جاي مقطعه أنا بارات، بأداة يدوية أو نص أتوماتيك أو وات إيفر، المهم إن أنا أقطعه وبس
العميل : تمام…
المهندس منسي : بعد ما أقطعته أروح حاطه على مكنة التغليف وغلفته التغليف اللي هوه المحترم ابن الناس دوه…
العميل : اللي هوه البار دوه
المهندس منسي : لإن التغليف هوه اللي هيبيع، بص من الآخر التغليف هوه اللي هيبيع، معايا
العميل : إن أنا أبدأ صغير الأول في مكنة بار تصنع البار وكده
المهندس منسي : آه مكنة الأول تروح مصنع البار، بتغلف البار وبس، بدل ما تكسب جنيه اكسب نص الجنيه، أنا أقصد يعني بدل ما تكسب 100% من المكسب هكسب دلوقتي 50%، أنا ببدأ، ببدأ لسه ولسه قدامي الدنيا طويلة، فببدأ، هكسب الـ 50% بعد ما أكسب الـ 50% على أمل إن أنا أكسب الـ 100% في يوم من الأيام، معايا
العميل : أيوه معاك يا فندم، طيب حضرتك بس عشان أعمل الحلاوة البار محتاج مكنة واحدة بس اللي هي التغليف، سواء كانت أتوماتيك أو نص أتوماتيك
المهندس منسي : أيوه، إنت غلفت وبعد ما غلفت نزلت سوقت منتجك لقيت التسويق والسوق طالب، آه.. طب اعملنا كذا، لأ الطعم، مش عارف إيه تبدأ ها.. لا أجيب صنايعية يطبخولي الحلاوة الطحينية، لا أجيب صنايعية مش عارف إيه، طب الصنايعية هيقلولك أنا محتاج أداة كذا، يعني الأداة اللي أنا هصنع بيها كذا وكذا وكذا، كل واحد هيقولك… هتبدأ إنت تعمل مشروعك.. إنما من أولها كده تقولي أنا عايز أعمل مصنع للحلاوة الطحينية ما إنت هتبقى يا ابن الحلال عرضة لسيئيي الضمير، فهمتني إزاي
العميل : تمام يا فندم.. تمام
المهندس منسي : وبعدين أنا هتلاقيني أنا بتكلم كلامي صناعي ودغري شوية، في ناس هتلاقي كلامهم ناعم ولذيذ وجميل وهيريحوك…
العميل : لا.. لا.. لا إنت كده حضرتك الله ينور عليك، أنا ما تشرفتش باسم حضرتك؟
المهندس منسي : مع حضرتك المهندس منسي
العميل : تمام يا هندسة، معلش أنا شايف إن حضرتك بتعاملني كأخ صغير يعني وأنا مبسوط من مكالمة حضرتك يعني
المهندس منسي : ده شرف ليا
العميل : الله يكرمك يا فندم
المهندس منسي : نصيحة لوجه الله زي ما بقول لحضرتك كده ابدأ الأول، جبت منتجك، شوف منتجك تسويقه إيه، بعد كده خدت الخطوة ابدأ الهرم من فوق مش من تحت
العميل : تمام يا فندم
المهندس منسي : بعد كده عرفت تسويقك وعرفت منتجك وعرفت دنيتك نبدأ نخش المرحلة اللي بعد كده إن إحنا هنعمل إيه؟ هنعمل الحلاوة الطحينية، بعد ما عملنا الحلاوة لأ ده إحنا هنخش مرحلة تانية، إن إحنا هنجيب الأساسيات بتاعت الحلاوة الطحينية، يعني هنجيب إحنا السمسم ونعمل الطحينة
العميل : وصنع أنا بنفسي
المهندس منسي : مثلاً.. ما هي مراحل
العميل : تمام.. تمام
المهندس منسي : هوه ده صدقني بما يرضي الله أسلم وأنجح وسيلة بإن إنت تخش مشروع وربنا ييسرلك أمورك
العميل : الله يكرمك يا فندم، طب معلش سؤال أخير بقى، أسعار المكن الأتوماتيك والنص أتوماتيك
المهندس منسي : هي مكنة الفلوباك الأتوماتيك، مكنة اسمها فلوباك بتعمل، النص أتوماتيك بتعمل يعني 2000 جنيه مصري، والأتوماتيك الكاملة بتعمل 1… في حاجة دلوقتي عملناها فعلاً بـ 9 يعني 95000 جنيه
العميل : معلش يا فندم برده الفرق بيبقى في قوة الإنتاج بس ولا الفرق في إيه؟
المهندس منسي : آه بيبقى في قوة الإنتاج وسرعته آه
العميل : طيب النص أتوماتيك…
المهندس منسي : يعني هوه نفس الإنتاج بس في الأتوماتيك بتروح تعملك عدد أكبر وبتشيل نفسك من تحت إيد العمال، والعمال مش عارف غابه النهاردة، وجم يحكولك قصص، وجم يحكولك حكاوي.
العميل : تمام… طب حضرتك ….
المهندس منسي : معاك يا غالي
العميل : بقول لحضرتك بس النص أتوماتيك بيوصله المنتج لحد فين يعني؟
المهندس منسي : هوه كل العملية إن إنت بتفتح الكيس تحط القطعة بإيدك وتحطها عليها، هي بتاخدها تلحمها وترميها الناحية التانية
العميل : تمام.. مكنة لحام يعني
المهندس منسي : زي مكنة لحام بس مش مكنة لحام عادية، اللحام العادية اللي إنت بتشوفها في البيوت دي لأ، دي مكنة بتاعت الإنتاج
العميل : تمام…
المهندس منسي : يعني مكنة البيوت مثلاً إنت بتقعد تستنى لغاية لما تتلحم وبعد كده تحطها، إنما التانية إنت كل العملية إن إنت بتحطلها الحاجة ترميها عليها هي تاخدها وتلحمها وتوديها الناحية التانية، يعني وفرتلك عامل
العميل : تمام…
المهندس منسي : فهمتني والعامل النهاردة تكلفته عالية
العميل : طيب حضرتك…
المهندس منسي : يعني مثلاً العامل النهاردة بتقولي بديله 1000 جنيه، إنت مش بتديله 1000 جنيه بتديله أكتر من كده بكتير، بتديله عطلة إنتاج، وبتديله بدلات، وبتديله إدارتك إنت اللي مانتش حاسبها، إحنا هنا في مصر ما بنحسبش مقابل لإدارتنا إحنا، إحنا بندير العامل، فهمتني..
العميل : تمام يا فندم
المهندس منسي : ويستحسن المشروع في أوله ما تجيبش عمال ولا بتاع، يستحسن في أوله يبقى إنت كل حاجة، يبقى إنت العامل والمدير والغفير والصنايعي وكل حاجة
العميل : طب حضرتك يا فندم بترشحلي أبدأ بنص أتوماتيك ولا أتوماتيك؟
المهندس منسي : ما هوه حسب الإمكانيات المادية
العميل : آه…هوه إحنا معانا فلوس والحمد لله
المهندس منسي : هوه رأس المال موجود..
العميل : آه..
المهندس منسي : والله يا مسهل يا رب، ادرس التسويق الأول وتوكل على الله، شوف إنت هتسوق
العميل : إحنا برده معانا عربيات دبابات وبنوزع بيها حاجات تانية يعني
المهندس منسي : لا ده إنت كده كويس ، لا مادام معاك عربيات وعارف تسويقك فين لأ خش في المشروع
العميل : آه… آه.. إحنا معانا سوق آه…
المهندس منسي : لا خلاص يا عم خش في المشروع بقلب جامد…
العميل : يعني حضرتك برده رشحلي الأتوماتيك ولا…
المهندس منسي : لا أتوماتيك بقى، إنت بتتكلم في تسويق وعربيات وانتشرت، يبقى مستني إيه بقى؟ مستني لسه هتجس النبض
العميل : تمام..
المهندس منسي : أصله أنا ببقى خايف أقعد أرشح للناس حاجة يعني أخاف من ربنا شويه، بقول مثلاً مش عايز أرشحلك مكنة تيجي بعد كده تدعي عليا إن أنا شورت عليك وكده، فإنت معاك التسويق، فإنت محتاج إيه تاني، خلاص، افتح بقلب جامد وعلى الآخر
العميل : أيوه يا فندم
المهندس منسي : النت بيفصل عند حضرتك
العميل : اه طيب تمام، طب حضرتك المكان والمساحة اللي أقدر بيها يبقى مخزن…
المهندس منسي : مساحة عادية جداً، متشغلش بالك بالمساحة يعني، يعني مساحة مثلاً 20 متر مربع مافيش فيها مشكلة يعني
العميل : حضرتك بس المكنة الأتوماتيك قلتلي سعرها كام؟
المهندس منسي : والله هوه في واحدة عملناها بـ 9، وإن شاء الله خير يعني
العميل : 9
المهندس منسي : 9 آه… علماً بأن اليوم ال نحسبه اليوم بـ 10 جنيه مصري
العميل : تمام… بقول لحضرتك أنا متشكر جداً على المعلومات دي
المهندس منسي : لا.. لا تحت أمرك في أي وقت
العميل : طب حضرتك الشركة بتاعتكم فين؟
المهندس منسي : إحنا عندنا حدائق القبة، مدينة نصر، باب الشعرية، 6 أكتوبر، العبور
العميل : كام فرع يعني
المهندس منسي : آه… آه.. وفي فروع عالمية كمان، في هونج كونج والصين وإيطاليا قريب إن شاء الله يعني
العميل : تمام يا فندم.. تمام.. أشكرك جداً شكراً
المهندس منسي : تحت أمرك يا باشا
العميل : شكراً يا فندم.. شكراً
