أكياس تغليف مطبوعه بالروتوجرافيك من شركة المهندس منسي

العميل: سلام عليكم

المهندس منسي: عليكم السلام ورحمة الله وبركاته

العميل: إزي حضرتك

المهندس منسي: الحمد لله

العميل: الحمد لله أنا أحمد الناجي حضرتك مدير مشتريات مجموعة مطاعم شوارمجي ستارز

المهندس منسي: أهلاً وسهلاً

العميل: إزي حضرتك

المهندس منسي: الحمد لله

العميل: أنا عايز أبدأ شغل معاك إن شاء الله في حاجات التغليف عندي تكون كلها باللوجو

المهندس منسي: آه..

العميل: فكنت عايز قائمة الأسعار، وكده كده بناء عليها أعرف من حضرتك الكميات اللي أنا هطلبها من حضرتك أد إيه؟

المهندس منسي:  ما هو المشكلة إنتم كمحلات الحاجات بتاعتكم إنتاجية هتبقى كمياتها قليلة على الشغل الإنتاجي والصناعي، يعني إنت مثلاً يوم ما هتتكلم هتتكلم في ألف ألفين بالكتير قوي

العميل: لأ.. لأ… ده أنا هطلب منك يعني كل فترة، يعني هطلب منك أوردر دلوقتي بكميات كبيرة

المهندس منسي:  آه…

العميل: واخد بالك، قبل ما يخلص من عندي هبغلك بكميات كبيرة برده، إنت فاهمني….

المهندس منسي:  اه

العميل: زي الشغل اللي بشوفه كده في إيطاليا وألمانيا وكده

المهندس منسي:  تمام…

العميل: بلاقي المطاعم عامله أوفر ستوك عندهم وبيسحبوا منه… أنا عايز أعمل معاك كده

المهندس منسي:  لا تحت الأمر حاضر

العميل: واخد بال حضرتك، عشان خاطر مش هينفع أطلب منك كل شهر تبعتلي ألف في ألف ونص في 500، الكلام ده ما ينفعش خالص

المهندس منسي:  آه.. بص حضرتك أنا موجود في الفروع بتاعتنا من 5-11

العميل: تمام…

المهندس منسي:  هوه أنا استشاري الشركة مش المبيعات

العميل: أهلاً وسهلاً

المهندس منسي:  فأنا هقعد معاك نسستم العملية وبعد كده أوجهك بقى لفرد المبيعات اللي هيتابع مع حضرتك على طول

العميل: طيب تمام

المهندس منسي:  يعني نقعد نهندل العملية وسستمينج العملية تمام خلاص أبدأ أقولك خلاص تابع هيبقى مع حضرتك على طول

العميل: طب ما ينفعش حضرتك تبعتلنا حد من المبيعات ييجي يقعد معانا هنا ولا يبقى صعب؟

المهندس منسي:   هوه العملية.. أنا يشرفني طبعاً وييجي… وممكن أجيلك بنفسي عشان أدوق وأتشرف بمطاعمكم الجميلة

العميل: أهلاً وسهلاً.. أهلاً وسهلاً

المهندس منسي:   النظرية إن وجود حضرتك أول مرة ده مهم جداً بحيث إنك هتلاقي عدد من المعروضات موجود، هتلاقي في شاشة 55 بوصة بنعمل برومشن عليها وبنعمل الحلول بتاعتنا عليها، إنما عندك هنبقى قاعدين في مكتبك جاست التكييف اللي إحنا شايفينه مافيش أكتر من كده

العميل:  طيب كويس قوي … طب آجي لحضرتك فين بالضبط؟

المهندس منسي:  أنا موجود النهاردة في الفرع بتاع باب الشعرية، إحنا عندنا حدائق القبة، مدينة نصر، باب الشعرية، 6 أكتوبر، العبور

العميل:  طب يا سلام ده مدينة نصر يبقى كويس قوي، يبقى جنبي يعني

في مدينة نصر هبقى موجود يوم السبت ولكن السبت والثلاثاء ده أنا في سفر في الخارج رايحين نعرض منتجات بره مصر

العميل:  آه…

المهندس منسي:   يعني إحنا من الشركات الرائدة اللي طالعين يمثلوا مصر

العميل:  آه أهلاً وسهلاً، ده شرف لينا طبعاً إن إحنا نشتغل معاكم يعني

المهندس منسي:   الله يبارك لك، والله وعملوها الرجالة

العميل: طيب أنا دلوقتي بصراحة اللي أقدر أروحلها فرع مدينة نصر، يبقى أقرب حاجة بالنسبة لي، إنما باب الشعرية

المهندس منسي:  نأجلها لغاية 1/11 أكون جيت من السفر

العميل: هيبقى بعيد قوي

المهندس منسي:  خلاص إنت شوف تقدر تنزل تقابل مدير فرع مدينة نصر المدير هناك اسمه المهندس أحمد

العميل: تمام…

المهندس منسي:  واخد بالك، وهوه هيضبط معاك العملية وهيبقى أون لاين معايا

العميل: طب أستأذن حضرتك العنوان؟

المهندس منسي:  هبعتلك الداتا بتاعته في رسالة حالاً، هوه آخر شارع مكرم عبيد

العميل:  طب جنبنا برده على طول، طب أستأذن حضرتك تبعتلي العنوان تفصيلياً وأنا إذا كان كده هكلمه النهاردة إن شاء الله وأقعد معاه

المهندس منسي:  تمام

العميل:  أوكيه متشكر جداً لحضرتك

المهندس منسي:  مع السلامة