اسطمبات عبوات 5 لتر من شركة المهندس منسي
العميل : سلام عليكم
المهندس منسي : أيوه يا فندم
العميل : شركة المهندس
المهندس منسي : أيوه
العميل : كنت عايز أسأل على العبوات الـ 5 لتر المادة اللي هتبقى جوه مبيد
المهندس منسي : هوه حضرتك عايز كمية أد إيه؟
العميل : يعني أنا عايز طن أو طن ونص
المهندس منسي : طن إزاي؟
العميل : يعني عايز حوالي 200 جركن أو 250 جركن
المهندس منسي : آه لأ إحنا بنشتغل على الكميات الكبيرة بس
العميل : كميات أد إيه؟
المهندس منسي : يعني مثلاً مش أقل من 10000 جركن
العميل : تمام.. طب للكمية دي هل بيبقى في استايل معين بتحددلي شكل معين لوجو الشركة أو كده
المهندس منسي : مضبوط آه.. لأنه إحنا بنحاول بقدر الإمكان إن إحنا نحمي منتجك، أو نحمي المنتج اللي هوه… يعني ما بنشتغلش لكل مين هب ودب يعني، يعني بحيث إن إحنا بنشتغل بس بالاسطمبة بتاعتك، يعني أنا دلوقتي بعمل لحضرتك الاسطمبة، وبعد ما بعمل الاسطمبة بعملك أي كمية أياً كانت
العميل : تمام
المهندس منسي : فهنا النهاردة سعر الاسطمبة هيبقى في حدود 2، يعني 24000 جنيه، يعني أنا لو قلتلك أنا همعملك اسطمبة الأول بـ 2 عشان تاخد في الآخر 60 جركن إنت هتقلي كلام وحش، هتزعل مني يعني
العميل : تمام…
المهندس منسي : عشان كده بقولك كميات كبيرة، إنما هي مش كميات كبيرة ولا حاجة
العميل : حتى في الأغطية وفي الحاجات ديت مافيش برده أغطية بألوان معينة ولا حاجة
المهندس منسي : أغطية إزاي
العميل : الغطا بتاع الجركن، ممكن أجيب الجركن وأجيب غطا مميز
المهندس منسي : آه.. آه.. هوه برده نفس العملية بنصنع برده، لو إنت عايز غطا مميز الغطا المميز ده إحنا بنصنعه، أما لو عايز أي أغطية في شركات كتيرة بتبيع الأغطية جاهزة
العميل : طب ممكن حضرتك معلش تدلنا على شركة
المهندس منسي : لا صدقني معرفش أي حد في السوق المصري ريحت دماغي، لأن أنا بعتمد على المراسلات وبعتمد على شغل الاستيراد والتصدير وكده يعني، لأن أنا أوردي شركتنا ليها فرعين بره
العميل : تمام..
المهندس منسي : هنا زي ما تقول الناس شويه…
العميل : طب حضرتك بتقولي أقل كمية 100 ألف ولا كام؟
المهندس منسي : لأ مش أقل كمية، لو إنت دفعت حق الاسطمبة نعملك الاسطمبة وبعد تاخد الكمية اللي إنت عايزها، إن شاء الله حتى تاخد 50 براحتك
العميل : بيتحسب بقى الجركن نظامه إيه؟
المهندس منسي : بيبقى بالكيلو، عشان برده يبقى إيه، بيبقى بالكيلو، تمسك الجركن وتوزنه على ميزان جواهرجي واخد بالك وهوه فاضي، يطلع مثلاً نفترض 100 جرام، الـ 100 جرام تضرب × 3 صاغ، واخد بالك 3 قروش يعني أو 3.5 قروش، يعني الكيلو فوارغ بـ 35 جنيه، يعني الجرام 3.5 صاغ، طب 250، طلع 120.. وهكذا
العميل : تمام..
المهندس منسي : يعني بص حضرتك تمسك الجركن وهوه فاضي، معايا
العميل : مع حضرتك آه
المهندس منسي : تروح وزنه على ميزان جواهرجي، مش على ميزان جبنة
العميل : تمام
المهندس منسي : لأن ميزان الجبنة الحساسية بتاعته 50 جرام فممكن يضيعلك الدنيا
العميل : طبعاً
المهندس منسي : واخد بالك على ميزان جواهرجي، بعد ما وزنته على ميزان جواهرجي تروح جاي تعرف الميزان طلع أد إيه، الميزان مثلاً طلع 100 جرام أو 70 جرام، تضرب الـ 70 جرام × 3.5 صاغ، يطلعلك سعر العبوة
العميل : تمام.. الاسطمبة برده حضرتك كده بتتكلم معايا أولاً إن إحنا نجيب الاسطمبة، الاسطمبة عند حضرتك بتتكلف 24000 صح كده
المهندس منسي : مثلاً آه 2، دي بتبقى بتاعت حضرتك ومعمول عليها اللوجو بتاعك على أساس إن محدش في يوم من الأيام يقلدلك منتجك، يبقى تصعب شوية عملية تقليد المنتج
العميل : تمام.. تمام.. على العموم إن شاء الله بإذن الله هيبقى في تعامل بإذن الله، بس ربنا يصلح الحال إن شاء الله
المهندس منسي : قول يا رب يا ما ناس كانوا بادين كان في ناس كتير قوي قوي مصانع اتعملت على إيدنا ما تقلقش
العميل : ما شاء الله
المهندس منسي : آه مصانع كتير يعني ما تقلقش، مصانع كتير كتير يعني
العميل : ربنا ييسر الحال
المهندس منسي : اللي كانوا بدايتهم إيه، كان بدايتهم مثلاً جايبين حق الاسطمبة بالقسط ، آه… فربنا ييسرلك أمورك، ولو احتجت….
العميل : إنتم بتقسطوا تمن الاسطمبة ولا الكلام ده كان زمان؟
المهندس منسي : ما هوه بديلك 50% و 50% عند التسليم
العميل : تمام…
المهندس منسي : وما تقلقش ربنا ييسر أمورك، وبرده عندنا لو احتجت مكن التعبئة والتغليف، وعندنا الأكياس بتاعت الألومنيوم فويل لو احتجت، وعندنا الأكياس…
العميل : هوه المقر بتاعكم فين؟
المهندس منسي : إحنا عندنا حدائق القبة، مدينة نصر، باب الشعرية
العميل : تمام.. ماشي يا باشا
المهندس منسي : ماشي يا غالي
العميل : ألف شكر يا حبيبي شكراً
المهندس منسي : سلام عليكم
