برطمان شفاف لتعبئة العسل من شركة المهندس منسي

العميل: السلام عليكم

المهندس منسي: عليكم السلام ورحمة الله وبركاته

العميل: إزيك يا باشا

المهندس منسي: أهلاً بيك

العميل: معاك الحاج حامد من بني سويف

المهندس منسي: أهلاً بيك

العميل: كنا عايزين برطمانات

المهندس منسي: عايز برطمان

العميل: آه برطمان اللي هوه الكيلو شفاف

المهندس منسي: هوه حضرتك كنت عايز كمية أد إيه

العميل: 25 ـ 30 زي ما يطلع على العربية

المهندس منسي: 25 أو 30 برطمان؟

العميل: يا حاج العربية تشيل 25 برطمان بس يا حاج؟؟

المهندس منسي: ما هو أنا مش عارف إنت عايز كمية أد إيه؟

العميل: حسب العربية اللي هتشيل، العربية هتشيل 25 ـ 30 ـ 22 اللي موجود عند حضرتك يعني

المهندس منسي: هوه إحنا بنصنع بالطلب، يعني حضرتك بنعملك البرطمان بتاعك بالطلب، يعني على الأقل خالص 25000 برطمان بنصعهم لحضرتك بالطلب، بنصنع الأول الاسطمبة وبعدين نبدأ ننفذ عليها

العميل: طب السعر بتاعه كام؟

المهندس منسي :ما هو حضرتك بقى اللي بتحدد، بتقول أنا عايز بطرمان شكله كذا وقطره كذا…

العميل: اللي هوه المربع والمثمن

المهندس منسي: آه بتجيبلنا شكل وإحنا نشتغلك عليه..آه لأ إحنا ما بنعملش استاندر، ما بنعملش حاجة موجودة في السوق، إحنا بنعمل بضاعة خاصة بالعميل، يعني الشكل بتاع العميل ما نقدرش نعمله لحد تاني، عشان خاطر الخصوصية

العميل: طيب ماشي يا فندم، يعني أشوف شكل معين أقولك عليه وإنت تصنعه

المهندس منسي: مضبوط يا عم حامد

العميل: يعني المثمن ده ليه حد معين برده

المهندس منسي: ما هو بقول لحضرتك ممكن نجيب شكل ونغير في شكله عشان يبقى ده الشكل بتاع حضرتك ماحدش يصنعه غيرك

العميل: طب برده سعره كام برده؟

المهندس منسي: حسابه إزاي؟

العميل: البطرمان يعني أنا هاخد على أساس إيه نظام إيه، على حساب الاسطمبة ولا على حساب إيه؟

المهندس منسي: إنت بتقولي عايز السعة بتاعته كذا ووزنه في حدود كذا

العميل: هوه اللتر اللي بياخد كيلو عسل

المهندس منسي: آه…

العميل: أنا كان معايا عينة دلوقتي شفتها عجبتني فاتصل بالتليفون جبته من على الفيس بوك وكلمتك يعني

المهندس منسي: ده إنت شرفتني

العميل: الله يبارك لك

المهندس منسي: هوه بناء على كده إحنا بنبدأ نشوف الشكل اللي إنت عايزه، يعني أنا ما ينفعش أعملك الشكل بتاع التمساح، ولا إيزيس

العميل:لا ده برطمان العسل العادي

المهندس منسي: ما هوه لأ إحنا بنعمل خاص بالعميل يعني على أساس إن يبقى دلوقتي عبوة إيزيس بتاعت إيزيس وبس، عبوة التمساح بتاعت التمساح وبس، بحيث إنها تبقى مميزة

العميل: طب ماشي، هي دي مش شركة يا حاج؟

المهندس منسي: ما إحنا شركة آه إحنا بنحافظ…

العميل: لأ أنا مش شركة، أنا ببيع للجماعة بتوع العسل اللي بيبيعوا عسل عندنا في البلد وكده

المهندس منسي: آه… إحنا بقى نعملك إيه؟؟ إنت بتاخد العبوات تبيعها لبتوع العسل؟

العميل: آه..

المهندس منسي: إحنا ممكن نعملك كذا شكل والكذا شكل دول يبقوا بتوع حضرتك بس، ما حديش ياخدهم مننا غيرك

العميل: ماشي يا فندم

المهندس منسي: مع السلامة

العميل: شكراً السلام عليكم

المهندس منسي: عليكم السلام ورحمة الله وبركاته