تصنيع اسطمبات اللمبات الليد من شركة المهندس منسي
مهندس منسي : السلام عليكم
العميل : عليكم السلام ورحمة الله وبركاته يا باش مهندس
مهندس منسي : أيوه يا غالي
العميل : مهندس أحمد عبد الباسط معاك
مهندس منسي : أهلاً وسهلاً اتفضل
العميل : أهلاً بحضرتك، إحنا مصنع في القاهرة الجديدة بتاع لمبات ليد
مهندس منسي : آه
العميل : فكنا عايزين نسأل حضرتك بالنسبة للاسطمبات دي إنتم بتعملوها…
مهندس منسي : آه.. آه.. نقدر نصنعها لك، طب حضرتك اتحرك في منطقة يكون فيها شبكة شويه
مهندس منسي : ألو…
العميل : أيوه يا باش مهندس
مهندس منسي : معلش أنا عمال بكلمك والخط…
مهندس منسي : يا ريت تتحرك في مكان يكون فيه شبكة بعد إذنك
العميل : والله أنا قاعد في البيت أروح فين؟
مهندس منسي : أقف في البلكونة
العميل : طيب الشبكة عند حضرتك ضعيفة يعني؟
مهندس منسي : لأ الشبكة عند حضرتك هي اللي عماله تقطع
العميل : طيب أنا أهوه هطلع على البلكونة، بقول لحضرتك إحنا مصنع جديد بتاع لمبات ليد
مهندس منسي : آه
العميل : مش عارف أنا جيبت تليفونك من الكتيب بتاع المصانع المصرية…
مهندس منسي : حضرتك هتحتاجني في المصانع الليد، إنت ممكن تحتاجني في القاع بتاع اللمبة، وممكن تحتاجني في اللمبة نفسها اللي هي عمله بديل الإزاز معمولة من خامة بولي ايثيلين
العميل : أيوه، في ناس بيعملوها من بولي إيثيلين، وفي ناس بيعملوها من بولي بروبلين، ولكن الصح بتاعها من خامة البولي آميد
العميل : عشان الهيت يعني، الحرارة
مهندس منسي : عشان الهيت آه، وعشان الاستمرارية، وعشان التكسير والصلاحية
العميل : أيوه كويس.. تمام.. تمام.. يعني حضرتك ممكن تعملنا الخامتين دول، بتاعت القاعدة البلاستيك اللي تحت ده، ومادة البلاستيك…
مهندس منسي : آه أنا ممكن أصنعهم لك بالطلب، وممكن أسلمك المكنة اللي تصنعهم لك ومعاها الاسطمبات، يعني براحتك إنت، إنت بتقول أنا عايز أحط نفسي في المنطقة دي، يعني تقولي مثلاً لأ أنا عايزك تصنعلي وتسلملي وماليش فيه، طيب، واحد تاني يجي يقولي لأ أنا عايز أصنع عندي، أنا عايز أوفر حق التصنيع وأصنع أنا عندي
العميل : في الحالتين إنت الخدمة بتقدمها يعني
مهندس منسي : إن شاء الله
العميل : حتى توريد المكن بتاع الإندكشن الكلام ده بتوردوه ولا…
مهندس منسي : ده أوردي موجود بضاعة حاضرة عندنا
العميل : طب والاسطمبات والكلام ده، أنا عايز اسطمبة خاصة يعني عشان …
مهندس منسي : إحنا فيرست في العالم في الاسطمبات، إحنا بنعمل الاسطمبات بتاعتنا بالـ سي إن سي ثري دايمنشن و بروجر وليزر، وفي نفس الوقت أرخص أسعار على مستوى العالم
العميل : طب كويس ممتاز إحنا محتاجينك، يعني إحنا بنحاول نتكامل مع المصانع المصرية على أساس ده بالنسبة لي أحسن من جيب من بره يعني
مهندس منسي : أكيد.. أكيد.. أكيد
العميل : يعني أتشرف لو حددتلنا معاد ونجيلك هناك إحنا ما عندناش مشكلة يعني، أجيلك أنا…
مهندس منسي : إنت تيجي تنورني، أنا موجود طول أيام الأسبوع في الفرع بتاع باب الشعرية، ويوم السبت والثلاثاء بكون في الفرع بتاع مدينة نصر
العميل : طب مدينة نصر أحسنلي مدينة نصر
مهندس منسي : كله من 5-11 مساء
العميل : طب آخد العنوان بعد إذن حضرتك؟
مهندس منسي : في مكرم عبيد قدام عمر أفندي مباشرة، هتدي ظهرك لعمر أفندي بزاوية 15 ْ
العميل : إنت جاي في مكان أنا كنت فيه
مهندس منسي : طب كويس هبعتلك أنا الداتا دلوقتي بتاعت فرع مدينة نصر في رسالة، حضرتك هتكلمه وتتابع معاه وتاخد منه العنوان بالضبط
العميل : يا ريت، طب كويس.. ممتاز.. ممتاز
مهندس منسي : ماشي يا غالي
العميل : إن شاء الله هيبقى في بينا تعاون يا باش مهندس
مهندس منسي : إن شاء الله
العميل : أشكرك
مهندس منسي : ماشي يا غالي مع السلامة
العميل : مع السلامة
