تصنيع العبوات البلاستيك بجميع احجامها من شركة المهندس منسي

العميل : السلام عليكم

مهندس منسي : عليكم السلام ورحمة الله وبركاته

العميل : شركة منسي

مهندس منسي : أيوه

العميل : أنا اللواء محمد عبد الفتاح من وزارة الداخلية شركة أمان تبع وزارة الداخلية

مهندس منسي : أهلاً بيك

العميل : قطاع المؤسسات في وزارة الداخلية للصناعة، إحنا كنا عايزين نعمل عبوات كده، إحنا ماسكين زي جهاز الخدمة الوطنية كده، هيبقى تبع وزارة الداخلية اسمه أمان

مهندس منسي : آه

العميل : فكنا عايزين نعمل عبوات بحيث إن إحنا هنعبي طحينة وعسل، فكنت عايز أعمل عبوة بلاستيكية نص كيلو وكيلو للطحينة والعسل

مهندس منسي : آه

العميل : هل عندك

مهندس منسي : للأسف إحنا شغالين عشان خصوصية العميل فبنعمل الاسطمبة الأول، إزاي؟؟ ده حضرتك بنعمل العبوات بناء على طلب العميل، على أساس إن ما حدش يضرب المنتج يعني

العميل : طيب.. لكن إنت ما عندكش      عبوات..

مهندس منسي : آه بتاعتي أنا، ما عنديش عبوات بتاعتي أنا ببيعها للناس، يعني مثلاً نفترض إن حد مثلاً جاي ياخد شامبو معين، عبوة لشامبو معين، ما ينفعش إن أنا أديله عبوة الشامبو ديت وأديها لأمة لا إله إلا الله….

العميل : لأ.. لأ… يعني في ناس بتاخد البرطمانات دي وتحط عليها الليبول

مهندس منسي : أيوه.. ده غلط، عالمياً غلط

العميل : عارف.. عارف

مهندس منسي : عندنا هنا في مصر شغال بشكل كويس

العميل : طيب.. طيب.. يبقى إنت لازم تعمل العلامة التجارية بتاعتي

مهندس منسي : أيوه الاسطمبة وحفر اسم منتج حضرتك عليها، بالعلامة بتاعت حضرتك بحيث إنك تمسك عبوتك في أي مكان وتشوفها متقلدة ولا لأ

العميل : طيب… القصة دي تتكلف أد إيه ولا…

مهندس منسي : الاسطمبة بتتكلف ، يعني في حدود 25000 جنيه أو 24000

العميل : إذن أنا أفضل العمر كله أشتغل معاك علشان أوفر قصة الاسطمبة أم 25000 جنيه دي

مهندس منسي : لا معقول؟؟؟ ليه؟؟؟ ده بييجوا في أول ضربة، ده مواد غذائية، يعني باسم الله ما شاء الله واصله واصله

العميل : لا جامدة قوي، يمكن إحنا عشان لسه باديين والعملية معانا برده لسه بسيطة شويه

مهندس منسي : آه…

العميل : فدي مرحلة تانية، طيب…

مهندس منسي : طب أقدر أفيد حضرتك في المراحل اللي بعد كده، أقدر أفيد حضرتك في تعبئة المنتج لو حضرتك عايز مكن تعبئة، في تغليف المنتج

العميل : أيوه… ماشي، أنا على العموم يا ريت يبقى تسجلني عندك من العملاء وأنا برده آخد تليفون معاليك

مهندس منسي : هوه بس التليفون اللي ده …..

العميل : الاسم بقى

مهندس منسي : المهندس منسي

العميل : طيب… باعتبارك في المجال ده، وأنا لسه بادئ برده وإمكانياتي فيها نوع من العساكر شوية مافيش خبرة مع العمال اللي أنا بجيبهم، فأنا عايز أبتدي بعبوات عادية وألصق عليها الليبول بحيث إن أنا بعد ما أنزل بشويه أبدأ أجيب مكن أتوماتيك حاجة كبيرة وأجيب العبوات بقى اللي محفور عليها اللي حضرتك بتقول عليها دي مرحلة لاحقة

مهندس منسي : آه…

العميل : ولكن أنا أجرب نفسي في البداية مع عبوات عادية وألصق عليها الليبول وكميات بسيطة

مهندس منسي : آه

العميل : أجيب العبوات العادية دي منين

مهندس منسي : صدقني علاقتي بالسوق المصري ضعيفة جداً، يعني… اكتب على النت عبوات بلاستيك بس، إنما أنا بالنسبة لي بيكدبوا كتير وحاجة تقرف، وبعدين تدل واحد على واحد تطلع إنت اللي وحش، ولو حبوا في بعض خلاص إنت… علاقتي عموماً بالسوق المصري ضعيفة جداً

العميل : ماشي يا باش مهندس، المهم ده تليفوني مع حضرتك وأنا هسجل حضرتك معايا بحيث إن لو في أي حاجة… طب مكان حضرتك فين بقى؟

مهندس منسي : إحنا عندنا حدائق القبة، مدينة نصر، باب الشعرية، 6 أكتوبر

العميل : فين في حدائق القبة؟

مهندس منسي : شارع الخليج، هبعتلك العنوان دلوقتي حالاً

العميل : يا ريت.. لأني أنا جنبك في كوبري القبة إذا كان كده نيجي نشرب الشاي عندك

مهندس منسي : إن شاء الله

العميل : ماشي يا معالي الباشا

مهندس منسي : مع السلامة

العميل : السلام عليكم