جميع ماكينات وخامات التعبئة والتغليف من شركة المهندس منسي
العميل : السلام عليكم
مهندس منسي : عليكم السلام ورحمة الله وبركاته
العميل : إزيك يا باشا
مهندس منسي : أهلاً بيك
العميل : هو سيادتك عندك المكن اللي هوه بيصنع طبع الكشري اللي هوه الورق ده يا فندم
مهندس منسي : طبق الكشري الورق؟
العميل : اللي هوه بتاع الكشري
مهندس منسي : طبق الكشري الورق
العميل : آه طبق الكشري
مهندس منسي : آه.. طبق الورق اللي هوه غوطه أد إيه وقطره أد إيه؟
العميل : اللي هوه بيمشي في الطاجن والكشري
مهندس منسي : إنت قصدك على ورق الألومنيا ولا ورق الورق؟
العميل : لأ الورق يا باشا
مهندس منسي : هوه الورق في ورق عليه ألومنيا كده وفي ألومنيا وفي ورق ورق
العميل : لأ اللي هوه ورق ورق يعني
مهندس منسي : آه.. آه.. طب أستسمحك في عينة ملموسة أمسكها وأقولك دي هيبقى وضعها كذا؟
العميل : يعني إنت عاوز مثلاً تاخد منه عينة يعني؟
مهندس منسي : أيوه
العميل : أنا يا بيه عايز أعمله وأوزعه على المحلات، عايز أجيب منه وأصنع وأوزع…
مهندس منسي : ما هو أنا فاهم آه، يعني في عينة عايز تعمل زيها ولا هي فكرة في دماغك…
العميل : لأ فكرة واحد قالي عليها إن هي ماشية وكويسة يعني
مهندس منسي : ما هو لازم نبص على رسمة، لازم نبص على صورة، على عينة… كده يعني
العميل : طب هوه إيه اللي بياخدوه منك يا بيه اللي عليه ألومنيا ولا اللي عليه…
مهندس منسي : كله
العميل : طب اللي هوه عليه ألومنيا مثلاً عامل كام؟
مهندس منسي : ما هو عامل كام في مقاس إيه في غوط إيه في ارتفاع إيه في الخامة نفسها تكنيكها إيه؟؟؟؟ كده يعني، هوه في ورق عليه طبقة ألومنيا بيبقى في حاجة اسمها مقاس السنية ومقاس مش عارف إيه والطاجن… حاجات كتيرة قوي، فإحنا بنعمل العملية وننساها، ويجيلنا عملية تانية نعملها وننساها.. وهكذا
العميل : هوه المكن بتاعه إيطالي ولا صيني يا بيه؟
مهندس منسي : هوه إنت عايز المنتج ولا المكن
العميل : لأ المكن
مهندس منسي : المكن واحد دارس في ألمانيا بيعمل التصميمات بتاعته وبنصنعها في أي بلد أياً كانت وبعد كده بنجمعها هنا في مصر
العميل : يعني بيتكلف في حدود كام يا بيه معلش بعد إذنك؟
مهندس منسي : ما هو أنا هيتكلف في حدود كام في إيه × إيه؟ ما هو لسه ما رسيناش على حل، شوف بص في السوق كده وهاتلي عينات وإن شاء الله خير يعني
العميل : خلاص.. طب الكهربا بتاعته بيشتغلي عادية ولا…
مهندس منسي : كل كهربا المهندس منسي بيشتغل على 220 إلا إذا العميل طلب غير ذلك
العميل : خلاص ماشي.. طب يحتاج مساحة كبيرة يعني..
مهندس منسي : كل مكن المهندس منسي لا يحتاج إلى مساحة إن شاء الله كل المكن اللي بصممه بصممه على أساس إن أنا عارف إن في ضيق في المساحة في مصر، هوه مافيش ضيق في المساحة ولكن إحنا اللي مضيقنها على نفسنا، ملمومين حوالين نفسنا مش عارفين نطلع بره
العميل : هوه اللهم صلي على النبي بالنسبة لواحد عايز يبدتي زي سيادتي ممكن مشروع كويس يا بيه؟
مهندس منسي : ما هو أنا ناجح في الهندسة والصناعة ولكن في التسويق المنتج يعني ربنا ماداش مواهبه لكل واحد وإلا كان كل واحد استغنى عن التاني
العميل : تمام
مهندس منسي : أنا ناجح في الصناعة والهندسة وأعتقد إن مافيش حد زيي في مصر ولا العالم، أنا كده عندي غرور في نفسي في علمي، الحمد لله ربنا ادهولي، إنما لو قعدت بقى أتجه لكل حاجة مش هنجح في حاجة
العميل : الحمد لله… طب هوه بدايته إن هوه مشروع… ولا ما تعرفش حاجة؟
مهندس منسي : ما هو أنا بقول لحضرتك أهوه، أنا أعرف أصنعه بأقل التكاليف وبجودة عالية جداً وبحسب ما العميل يطلبه، إنما تسويقه بالنسبة لي زي المفاعلات النووية كده لما أقول لحضرتك اعملي مفاعل نووي ما أعرفش فيه حاجة
العميل : آه… طب في مكن يا بيه طلع اللي هوه بيعمل زيت الطعام ده عند سيادتك فكرة عنه؟
مهندس منسي : بيعمل إيه بقى في زيت الطعام؟
العميل : بيعمله مواد زي الطاقة كده بديلة للطاقة
مهندس منسي : يعني هيجبوا مواد تانية ويخلوها زيت
العميل : لا زيت الطعام يا بيه هوه بياخده ويحوله كمثيل زي نظام ديزل كده شايفها على النت برده
مهندس منسي : آه يعني بياخد الزيت ويعمله طاقة
العميل : آه…
مهندس منسي : يشغله لحاجة تانية
العميل : أيوه
مهندس منسي : لما أتعرض لمشروع لحاجة اطلبت مني، ولكن أوعدك لو حد طلب مني حاجة زي كده يعني أكون سباق فيها وماحدش يسبقني فيها يعني، بس دي أول مرة حد يطلب مني إنه ياخد زيت الطعام يشغله وقود بديل للزيوت المعدنية، هي عموماً الزيوت المعدنية أرخص بكتير من الزيوت النباتية، هوه زيت الطعام…
العميل : لأ الزيت المستعمل يا بيه
مهندس منسي : آه المستعمل ده بيستخدم في إنتاج الصابون وممكن يدور وممكن يتعمل حاجات تانية، ولكن ممكن نقول المستعمل ممكن يشتغل وقود إيه المانع؟؟؟ بس وقود لإيه، ما هو المشكلة بقى وقود لإيه؟؟ إيه المعدة اللي هتتكيف على أنها تشتغل بالزيت ده هو؟؟؟ لأنه هوه زيت الطعام عموماً يعني القوة الحرارية المنبعثة منه أقل من الزيوت المعدنية، دي معروفة إن الزيوت المعدنية أقل من الزيوت النباتية إلا في أنواع تانية زيت مثلاً زيت الكاتروفا، القوة الحرارية بتاعته أعلى، واخد بالك من الزيوت المعدنية
العميل : طب هوه في مكن يا بيه بيكرر زيوت الطعام المستعمل ده يخليه جديد يعني؟
مهندس منسي : آه بيتعمله إعادة تدوير آه
العميل : موجودة عند سيادتك دي؟
مهندس منسي : لأ هي مش موجودة بضاعة حاضرة ولكن إنت ممكن تكلف الشركة يعملولك دراسة ليها، الدراسة دي هتتكلف 15000 مبدئياً وهمه بيعملولك دراسة ويشوفوا اتكلفت كام ويقوللك عليها
العميل : تمام.. الشركة عند سيادتك؟
مهندس منسي : آه الشركة عندي آه
العميل : يعني الزيت المستعمل ويطلعوه جديد تاني؟
مهندس منسي : أيوه تاخد المستعمل تعمله إعادة تدوير وتطلعلك ترسب الهالك منه وتطلعلك النظيف منه
العميل : وبيطلع بنفس الجودة اللي هي الأولانيه؟
مهندس منسي : لأ.. بيطلع درجة تانية
العميل : طب والدرجة التانية بتروح لإيه طيب؟
مهندس منسي : بياخدوها برده نفس العملية مطاعم وحاجات من دي بس ما بتبقاش درجة أولى
العميل : طب بيتكلف كام الخط ده يا بيه بعد دراسة الجدوى طيب
مهندس منسي : ما هوه دراسة الجدوى بقى إنت بتيجي تدفع فلوسها وهمه بيقول لك تتكلف كام، أما إني أتكهن بتتكلف كام وأديلك أي رقم في أي كلام يبقى إحنا بنهري على الفاضي
العميل : آه…
العميل : طب مشروع كويس يا بيه يعني أتكل على الله ولا…
مهندس منسي : أرجع تاني وأقولك
العميل : أنا بصراحة أنا باخد كلام سيادتك ثقة بس عايز حاجة أبتدي بيها
مهندس منسي : هوه أنا بالنسبة لي مش في التسويق أنا بالنسبة لي في الهندسة الصناعية، اسألني في الهندسة الصناعية واخد بالك إن شاء الله أجاوبك، أما بالنسبة للتسويق مش مزاجي يعني
العميل : آه… طيب مش ممكن تديني نصيحة أبتدي بيها يعني
مهندس منسي : والله في عدد من المشاريع الصغيرة كويسة قوي بس ده حسب المنطقة اللي إنت فيها، يعني إنت في أنهي منطقة مثلاً؟
العميل : في ديارب نجم في الشرقية
مهندس منسي : آه.. أنا سامع جنبك صوت مكنة ري شغاله
العميل : أيوه
مهندس منسي : إنت قاعد بقى في الغيط ومزاجك في السحاب يا ريس
العميل : لا الله يخليك
مهندس منسي : أنا من بلد جنبكم اسمها ميت مسعود تبع ميت غمر
العميل : أيوه مرحباً يا بيه
مهندس منسي : أهلاً بيك، المشروع اللي هيلاقمك في منطقتك إنت مشروع العبوات البلاستيك عشان خاطر البلد اللي عندكم ناس كتيرة بتعبي زيت
العميل : تمام
مهندس منسي : فإنت تعملهم بقى إيه العبوات اللي يعبوا فيها زيت، وشويه كده وتعبيلهم الزيت راخر
العميل : ما هو هنا مصانع كتيرة يا بيه بتاعت الأزايز ديت
مهندس منسي : ولا أي حاجة عادي، إيه المصانع الكتير، مثلاً الحاج عبد اللطيف أبو المنسي عنده 10 فدادين، جيه واحد عند الحاج عبد اللطيف أبو المنسي راح رايح شاري حته أرض جنبه، هل الحاج عبد اللطيف أبو المنسي هيقوله لأ ما إنتش زارع، أنا اللي هزرع لوحدي
العميل : لأ طبعاً
مهندس منسي : ده شمس وطالعه للكل
العميل : المكن ده موجود عند سيادتك اللي بيصنع الأزايز دي؟
مهندس منسي : عندنا آه
العميل : صناعته إيه يا بيه؟
مهندس منسي : ما هو أنا قلت لحضرتك بقى، إحنا ماركة، براند، يعني إحنا عملنا زي المهندس الألماني والإيطالي، لما تيجي مثلاً لما تروح مثلاً إيطاليا وتجيب مكنة من إيطاليا هوه المكنة الإيطالي ديت متصنعه في إيطاليا؟
العميل : لأ
مهندس منسي : أنا راجل دارس الهندسة في ألمانيا، فأخذت نفس الأسلوب بتاعهم وبقيت أصنع قطع الغيار بتاعتي في البلد اللي تعجبني، ولكن هوه إنت في الآخر بتسأل ماركة إيه؟؟ هي دي الماركة الوحيدة اللي في جمهورية مصر العربية إلا من رحم ربي، أنا ما أعرفش في تاني ولا لأ، بس أنا اتخذت الأسلوب العالمي في التطوير والتصنيع، إن إحنا مش هنعيش لوحدنا، فالنهاردة أي بلد بتحط 30 أ, 25% من منتجها في قلب المعدة بتتسمى باسم البلد نفسها فأنا اتخذت النظرية ديت واشتغلت عليها، زيي زي المهندس الألماني والإيطالي، والحمد لله يعني إحنا كنا عارضين في معرض الصين الدولي اللي هوه في شهر 10 اللي فات وأثبتنا جودة عالية جداً وتفوقنا على المنتجات الصينية وأثبتنا جودة عالية جداً، تفوقنا من حيث السعر، تفوقنا من حيث الجودة، وتفوقنا من حيث تبسيط التشغيل
العميل : طب وعمله كام دي يا باش مهندس؟
مهندس منسي : دي عامله اضرب ال × 18
العميل : وبتنتج كام مثلاً…
مهندس منسي : أنا عارف إنك ماعكش ورقة ولا قلم دلوقتي، امسك شطاية كده واكتبها كدهوت 7 × 18 الناتج بقى هوه ده سعرها
العميل : طب وبتنتج كام إزازة مثلاً في …
مهندس منسي : ما هو بتنتج كام إزازة الربع لتر ولا النص لتر ولا لتر
العميل : لأ لتر يا بيه
مهندس منسي : أنا ممكن أقولك على أقصى إنتاج ولما تيجي تسألني أقولك آه ما هو إنت ما سألتنيش لتر ولا 100 مللي، فهمتني إزاي…
العميل : طب المكنة اللي بتعمل البوليفورم دي يا بيه، اللي بتعمل الأنبول الصغير…
مهندس منسي : ما تشغلش نفسك بيها لوجه الله ما تشغلش نفسك بيها دي فيها فطاحل وناس أقوياء جداً فإنت هتروح تحرت في المحروت
العميل : آه صح كده
مهندس منسي : يعني اللي بتصنع البوليفورم ديت رأسمالها كبير، فالنهاردة وصلوا إنهم بياخدوا بالكيلو، إنت بقى هتروح تحرت في المحروت، إنت راجل صاحب مشروع صغير، عايز الحاجة اللي تبذل فيها مجهود وتبيعه، مش عايز الحاجة اللي تبذل فيها فلوس وبعد كده تكسب منها
العميل : آه
مهندس منسي : يعني فهمتها إزاي، يعني النهاردة صاحب المشروع الصغير عايز حاجة يبيع فيها مجهوده + فلوس قليلة، فهنا التانية فلوسها كتيرة ولكن مجهودها قليل، فإنت اشتري البلفورم وكل اللي عليك إنت هتسخنه وتنفخه وتبيعه، وهتحط لنفسك هامش ربح زي المخاليق اللي عايشه وخلاص، والأرزاق…
العميل : ودي كهربا عادية برده يا بيه
مهندس منسي : آه كله كهربا عادية، والأرزاق بإيد ربنا
العميل : وبتحتاج مساحة أد إيه دي يا بيه؟
مهندس منسي : هي المكنة نفسها حجمها بيبقى 2 × 3 متر، هي بتبقى وحدتين جنب بعض
العميل : خلاص ماشي يا باش مهندس
مهندس منسي : تحت الأمر يا غالي
العميل : ماشي يا باشا اتفضل
