خامات بي فى سى من شركة المهندس منسى

 

العميل: سلام عليكم

المهندس منسى: عليكم السلام ورحمة الله وبركاته

العميل: شركة المهندس منسي معايا

المهندس منسى: أيوه

العميل: معاك محمد بيومي من المنصورة

المهندس منسى: أهلاً وسهلاً

العميل: أهلاً يا باشا، أنا كنت بسأل على ألوان للـ بي في سي

المهندس منسى: ألوان؟؟؟

العميل: آه… ألوان ماستر باتش الـ بي في سي

المهندس منسى: آه لا مش عندنا

العميل: أنا عارف إن مش عندكم، بصراحة أنا بتصل لأني أنا دايخ عليها ومش لاقي، لو حد.. لو عندكم مثلاً تخدموني فيها، أو تعرفوا حد بيبيعها يبقى كتر خيركم

المهندس منسى: أنا ممكن أجيبهالك بالطلب من الصين

العميل: من الصين؟

المهندس منسى: آه…

العميل: طبعاً عشان تجيبها بالطلب من الصين هتحتاجوا كميات

المهندس منسى: آه شوف الكمية اللي إنت عايزها إيه وإحنا نشوفها كده

العميل: إيه يا باشا؟

المهندس منسى: شوف الكمية اللي إنت عايزها إيه وإحنا ممكن نجيبها معانا في شغلنا

العميل: آه… طيب ده متاح يعني، متاح إن أنا ممكن أتفق معاك إنك تجيبلي شكارة من كل لون فتجيبهالي

المهندس منسى: ممكن…

العميل: يبقى كتر خيرك، طب مين معايا بقى عشان أسجل الاسم؟

المهندس منسى: المهندس منسي

العميل: حضرتك المهندس منسي بنفسه، أهلاً يا باش مهندس

المهندس منسى: أهلاً بيك

العميل: أنا مبسوط إن أنا كلمت حضرتك، أنا بصراحة متابع الشركة عندكم من زمان، الطبات اللي بتعملوها وشغل الكبس الحراري ما شاء الله مفيدة جداً ومهمة ومحدش شغال فيها كتير، ربنا يعينكم أنا مبسوط إن في حاجة زي كده موجودة في مصر يعني

المهندس منسى: هوه إنت عندك مصنع حقن ولا مصنع إيه؟

العميل: إحنا كان عندنا مصنع حقن بتاع أدوات منزلية وإحنا بيعنا، دلوقتي إحنا بنعمل منتج جديد بتاعنا بي في سي ومحتاج منها ألوان، لأنه اللي في السوق هنا مش متوفر ده، هوه لون أخضر وعسلي

المهندس منسى: آه… إنت بتعمل ايه

العميل: فأنا عاوز بقى إيه؟؟ عاوز موف وعاوز بامبي وعاوز أحمر.. عاوز الألوان اللي هي تشد الناس دي

المهندس منسى: بتعمل مبيدات الأسمدة كده

العميل: لأ إزازة مياه في التلاجة

المهندس منسى: آه.. ماشي، هوه عندي 120 اسطمبة بي بي تي لو احتجتهم

120 العميل:  اسطمبة بي بي تي

المهندس منسى: آه دول كنت واخدهم استوك من مصنع في بلغاريا

العميل: دول أزايز مياه معدنية وكده ولا دول إيه؟

المهندس منسى: أزايز مياه وزيت وسمنة وحاجات كتير قوي

العميل: آه دول بقى أشوفلك حد شغال فيهم لأني أنا بعمل إزازة مياه تقيلة بتاعت تلاجة زي دورق كده يعني مش معدنية

المهندس منسى: زي دورق، إنت بتعمله حقن بقى

العميل: لأ بعمله نفخ بي بي تي بس بعمله لحمية شويه

المهندس منسى: آه اللي بيتباع في السوبر ماركت

العميل: الصوت بينغوش بس شويه

المهندس منسى: آه.. ماشي ماشي يا غالي

العميل: أنا مبسوط إني كلمت حضرتك، طب مافيش حد هنا شغال في الـ بي بي تي هنا تعرفه، عشان أنا بلف بقالي كتير مش لاقي حد شغال في الـ بي بي تي، غريبة جداً يعني

المهندس منسى: ما هوه قلت معرفتهم أحسن، أنا عن نفسي ما بحبش أتعامل مع حد آخد منه حاجة، حاجة تتعب يعني

العميل: إيه يا باش مهندس

المهندس منسى: بقولك حاجة تتعب، يعني إنعدام الأخلاق النهاردة بقى صعب قوي، مش مخلينا عارفين نعرف حد يعني

العميل: معلش هوه الصوت وحش جداً، نبقى نتكلم مرة تانية إن شاء الله

المهندس منسى: ماشي يا غالي

العميل: ماشي يا باش مهندس كتر خيرك

المهندس منسى: سلام عليكم

العميل: عليكم السلام