خامات بي في سي لتغليف العلب والبرطمانات من شركة المهندس منسي
العميل : سلام عليكم.
المهندس منسي : عليكم السلام.
العميل : شركة إم تو باك يا باشا.
المهندس منسي : أيوه.
العميل : معاك المهندس عبد العزيز يا باشا، كنت باسأل على الرولات بي في سي.
عايز خامات بي في سي هاعمل بيها علب وبرطمانات وحاجات زي كده.
المهندس منسي : آه اتفضل.
العميل : عايز حاجة لو عندك رولات 220 250 ميكرون واخد بالك سيادتك.
المهندس منسي : عايز العرض كام؟
العميل : والله يا باشا أنا عايز عرض 37، 36.5، 38.
المهندس منسي : في دلوقتي 37 أما التاني ممكن نستوردهولك بالطلب.
العميل : الموجود عندك كام يا باشا؟
المهندس منسي : بي بي تي.
العميل : كام ميكرون عندك يا باشا بي إيه تي؟
المهندس منسي : 250و300.
العميل : بس بي تي ما بيلحمش ما فيش لحام ليه صح.
المهندس منسي : لأ، لحام ألتراسونيك.
العميل : طب عندك 250 يا باشا عايز عينة 250 ما أنا عندي ماكنة ألتراسونيك بس برده كان 250 تقيل عليها، كان أقل ميكرون 200 تلحم.أقل ميكرون 200 بس.
المهندس منسي : آه بتلحم عندي المكنة على 200 لكن متلحمش 250.
العميل : طب أجيبلك عينة كده تجربها؟ طب إنت مكانك فين يا باشا أبعتلك مندوب طيب.
المهندس منسي : يعني لسه هجيبلك من المخزن الأول.
العميل : إيه؟
المهندس منسي : إحنا مكانا في باب الشعرية وحدائق القبة ومدينة نصر..بس هوه زي ما تقول هي موجودة في المخزن هجيبهالك من المخزن خلال يومين.
العميل : آه.
المهندس منسي : خلال يومين هجيبهالك من المخزن.
العميل : مافيش مشكلة… مافيش مشكلة، أنا في العاشر من رمضان، يعني شوف نتواصل إزاي؟
المهندس منسي : أما لو حضرتك عايز بي بي تي أنا ممكن أجيبهالك بالطلب.
العميل : أنا عايزه إمبارح.
المهندس منسي : لا ده ياخد معانا وقت.
العميل : إيه؟
المهندس منسي : يعني اللي بنستورده بالطلب ده بياخد وقت.
العميل : الاستيراد بياخد وقت، طب الطن بكام عندك الاستيراد؟
المهندس منسي : في حدود 18.
العميل : 18؟
المهندس منسي : آه.
العميل : أنا مش فاهم إنت غالي علينا كده ليه، أنا بشتغل مع مصنع مواد تعبئة برده بس هي مش موفرة لي الشغل باستمرار يعني.
المهندس منسي : آه.. بيدولك جزء.
العميل : بـ16.5 والله ويحيات ولادك، غير شامل.
المهندس منسي : غير شامل؟
العميل : غير شامل آه.
المهندس منسي : ندرسها مع بعض ومع تقلقش يعني.
العميل : طب مافيش أي حاجة جاهزة حتى رول أقطعه.
المهندس منسي : هوه اللي جاهز عندي كله بي إيه تي.
العميل : آه.
المهندس منسي : حضرتك بتعمل العلب اللي هي بتاعت الملابس الداخلية؟
العميل : لا لا دي علب تانية للحلويات والسبوع والحاجات دي.
المهندس منسي : آه. بس دي بيبقى ارتفاعها مش 37 .
العميل : لا ده أنا عندي علب تانية للحاجات دي مقاسات مختلفة وأنا بضبط عندي أنا عندي مقص أصلاً.
المهندس منسي : طب تسيبني كده أشوفلك المخازن كده عندنا مقاسات إيه كده؟
العميل : طيب اسم الكريم إيه عشان…
المهندس منسي : المهندس منسي.
العميل : المهندس مين…
المهندس منسي : منسي م ن س ي.
العميل : منجي؟
المهندس منسي : منسي م ن س ي.
العميل : منسي.. ماشي يا باش مهندس.
المهندس منسي : ماشي يا باشا.
العميل : طب أنا هكلم حضرتك امتي
المهندس منسي : يعني يومين بالضبط.
العميل : يا باشا كتير يومين إحنا واقفين أصلاً.
المهندس منسي : طب هاحاول كده أدبرلك الدنيا حاضر.
العميل : إنت هتشوفلي المقاسات طب ما تشوف وكلمني.
المهندس منسي : حاضر عنيا حاضر.
العميل : طب مافيش حد تعرفه يا باشا أكلمه لو إنت ما عندكش حد أتواصل معاه؟
المهندس منسي : لو كنت أعرف حد كنت قولتلك لوحدي.
العميل : ماشي يا باشا، أنا ممكن أديك تليفون بالليل كده تديني الدنيا فيها إيه على الأقل تكون راجعت اللي عندك؟
المهندس منسي : بكره إن شاء الله.
العميل : بكره؟
المهندس منسي : آه.
العميل : ماشي يا معالي الباشا.. اتفضل يا باشا.
