خامات بي في سي للخشب من شركة المهندس منسي

 

العميل: سلام عليكم

المهندس منسي: عليكم السلام ورحمة الله وبركاته

العميل: شركة المهندس

المهندس منسي: أيوه

العميل: إزي حضرتك

المهندس منسي: الحمد لله

العميل: كنت بسأل على خامات الـ بي في سي اللي هي بتاعت الخشب

المهندس منسي: آه

العميل: موجودة عند حضرتك؟

المهندس منسي: إحنا بنعملها بالطلب، هوه حضرتك متعود إنك بتشتريها، بس هوه النظام عندنا إن إحنا بنجيب خامة الـ بي في سي وبعدين نطبعه، وبعد ما نطبعه نروح مديينه طبقة اللاكر بتاعته عشان يلحم على الخشب

العميل: آه… يعني الألوان المتاحة

المهندس منسي: ما هي ألوان متاحة إيه، ده ألوانك إنت

العميل: آه…

المهندس منسي: إحنا بنشتغل كاستومايز يعني إعدادات خاصة، يعني ألوان حضرتك إنت

العميل: الألوان اللي أنا بطلبها

المهندس منسي: أيوه، وبعدين بيبقى بهايند أو فرونت، يعني إيه؟ يعني من الأمام أو من الخلف، يعني عايز طبقة لامعة قوي بنعمله من الخلف، لو عايزه من شرط يكون واخد طبقة لامعة قوي يبقى من الأمام، يعني إعدادات خاصة بتاعتك إنت

تمام.. تمام… طب أسعاره بتتراوح من كام.. تبتدي من إيه عند حضرتك؟

المهندس منسي: صدقني لو كنت متذكر أي أسعار كنت قولتهالك على طول بسرعة يعني

تقريباً كده بس…

المهندس منسي: تقريباً الطن في حدود 5-6 آلاف

العميل: إنت ما تبيعش حضرتك غير بالطن؟

المهندس منسي: لو عايزنا نبيع بأي وسيلة تانية نبيع، ما هوه كلها محصله بعضها

العميل: لأ كميات أقل من كده ما ينفعش على أساس إن أنا لسه مبتدئ وكده…

المهندس منسي: آه ممكن ربع طن

العميل: ماشي، والربع طن ده ممكن أشكله ألوان زي ما أنا عايز

المهندس منسي: لغاية 50 سم

العميل: طيب ماشي، ده العنوان بتعاكم اللي هوه 168 شارع السودان المهندسين

المهندس منسي: لأ، هوه إحنا عنوان 1 شارع المنسي خلف رئاسة حي باب الشعرية

العميل: لحظة واحدة أكتبه معلش عشان أنا كاتب العنوان اللي على النت

المهندس منسي: لأ العنوان ده.. طب ممكن تبعتلي الرابط بتاع العنوان ده لأنه في خطأ في العنوان

العميل: حاضر على عيني حاضر

المهندس منسي: لأ ده هوه اللي هتبعتهولي ده رابط العنوان لأنه في خطأ في العنوان ده

العميل: معنديش فكرة يعني الرابط بصراحة

المهندس منسي: الرابط بص يا سيدي، هتلاقي في برواز فوق كده هتلاقي فيه كلام أول ما تحط الماوس عليه يزرق

العميل: آه…

المهندس منسي: ده هتخدوا كله كده كوبي وتبعتهولي في رسالة

العميل: على عيني حاضر

المهندس منسي: أو ممكن تعمل برنت اسكرين للشاشة وتبعتهالي في رسالة

العميل: حاضر

المهندس منسي: أو ممكن تلاقي حاجة اسمها شير ابعتها برده في رسالة

العميل: خلاص ماشي، قولي بقى العنوان من تاني

المهندس منسي: 1 ش المنسي خلف رئاسة حي باب الشعرية القاهرة

العميل: تمام

المهندس منسي: في برده عندنا في مدينة نصر، وفيه في غمرة، وفيه في 6 أكتوبر، وفيه في العبور

العميل: فين في غمرة قريب مني في غمرة

المهندس منسي: هبعتلك غمرة دلوقتي حالاً

العميل: طيب ماشي، ماشي وفي مدينة نصر

المهندس منسي: أبعتلك الـ 2

العميل: طب ياريت ماشي

المهندس منسي: طب حاضر

العميل: ماشي يا باشا، مواعيدكم من كام لكام؟

المهندس منسي: من 11-9 ماعدا الجمعة

العميل: خلاص ماشي، ما اتشرفتش باسم حضرتك؟

المهندس منسي: المهندس منسي معاك

العميل: ماشي يا باش مهندس.. ماشي، شكراً يا باش مهندس.. سلام