خامات شرينك سليف للعبوات من شركة المهندس منسي

العميل	:	السلام عليكم
المهندس منسي	:	عليكم السلام ورحمة الله وبركاته
العميل	:	شركة المهندس منسي
المهندس منسي	:	أيوه
العميل	:	مع حضرتك أيمن معوض مدير مشتريات شركة أديكو للمنظفات
المهندس منسي	:	أهلاً بيك
العميل	:	أهلاً بحضرتك، أنا كنت بسأل على شرينك سليف اللي هو بيكافر العبوات البلاستيك مطبوع، يعني أنا عايز أعمل الديزاين هو أوردي موجود عندي، هل ده حضرتك بتعمله؟
المهندس منسي	:	آه بنعمله آه
العميل	:	جميل، ده بيطبع أوفست ولا على سلندرات؟
المهندس منسي	:	بيطبع روتوجرافيك
العميل	:	مش محتاجين سلندرات يعني
المهندس منسي	:	آه ما هي سلندرات
العميل	:	لازم آه.. أصل أنا كمياتي في حاجات معينة قليلة، ممكن تبقى 5000 ليبول، 8000، 20 ألف… في الرينج ده، فهل ده ممكن يبقى ملائم ولا تكلفته عالية ولا إيه بالضبط؟
المهندس منسي	:	طب أنا هبعت لك تليفون المبيعات وحضرتك تابع معاهم، هي كميات قليلة قوي مش هتنفع في الروتوجرافيك، بس هبعت لك برده ممكن تشوف يدخلولك أوردر مع أوردر كده يعني
العميل	:	طيب يبقى كتر خيرك يا فندم
المهندس منسي	:	يسحسن لو حضرتك شرفتنا بالزيارة اتفرجت على الحاجة
العميل	:	أنا في الإسكندرية مكانكم فين؟
المهندس منسي	:	إحنا عندنا باب الشعرية، حدائق القبة، مدينة نصر، 6 أكتوبر، غمرة، العبور
العميل	:	آه.. طيب أحاول أشوف نزلة كده وأكلم حضرتك أوكيه، ولو في حد من المبيعات تديني رقمه وأتابع معاه يبقى كتر خيرك
المهندس منسي	:	هبعتهولك حالاً دلوقتي
العميل	:	خلاص يا فندم، متشكر جداً