رولات سيلف من شركة المهندس منسى
العميل : السلام عليكم
المهندس منسى : عليكم السلام ورحمة الله وبركاته
العميل : شركة إم تو باك
المهندس منسى : أيوه
العميل : الله يخليك، معاك أبي عبد الله
المهندس منسى : أهلاً بيك اتفضل
العميل : ربنا يخليك يا باشا، كنت عايز أستفسر بالنسبة لموضوع السليف، شفت إعلان على الإنترنت في كتابة على البلاستيك، في كتابة على الألومنيوم، في رولات سليف كده يعني
المهندس منسى : آه موجودة آه
العميل : حضرتك مصنع ولا شركة…
المهندس منسى : هوه حضرتك عايز إيه بالضبط؟
العميل : والله أنا كنت بستورد معطرات جو من تركيا، كنت وكيل لمصانع هنا في مصر، اللي هوه 300 مللي الغاز، كذا حاجة كنت بستوردها من تركيا، إنت عارف موضوع الاستيراد واقف، فأنا عايز أصنع الموضوع ده هنا في مصر يعني
هوه إحنا عندنا سليف، بنطبع السليف، بنصنعه للناس
المهندس منسى : آه.. مافيش عندك الماكينة اللي بتلصقه على العبوات؟
العميل : عندنا
المهندس منسى : موجود آه المكنة اللي بيلصقه، وموجود مكن التعبئة، وموجود مصانع التعبئة والتغليف بجميع أنواعها، يعني عندنا الآلات اللي… يعني إحنا سبورت على مصانع التعبئة والتغليف، يعني إنت مثلاً عايز تفتح مصنع تعبئة وتغليف، بنديلك المكن من الإيه تو زد، من أول نص أتوماتيك لغاية أتوماتيك كامل
العميل : آه… يعني إنت عبارة عن شركة بتعمل الماكينة
المهندس منسى : آه الماكينات والخامات، يعني خامة السليف عندنا، خامة الأكياس عندنا، الرول بتاع الأكياس برده عندنا، الرول بتاع الخامات كلها عندنا، العبوات… كل ما يشمل التعبئة والتغليف
العميل : العبوات الألومنيوم عندك ولا الصاج؟
المهندس منسى : لأ العبوات البلاستيك بس
العميل : آه…. يعني عبوات زي عبوات ، عبوات الشاور، عبوات الصابون… دي موجودة عندك
المهندس منسى : آه أي عبوة بلاستيكية إن شاء الله عندنا
العميل : آه وبالنسبة للسليف ده برده موجود عند حضرتك، يعني بالنسبة لو هنعمل عبوات الألومنيوم ده في مصنع تاني وعوزنا نغلفه عندك في إمكانية يعني
المهندس منسى : لأ هوه إحنا بنديلك المكنة ونديلك الخامة
العميل : مش إنت اللي بتشتغلها بنفسك يعني؟
المهندس منسى : ما هوه إحنا بنديلك الخامة والمكنة، وبنقولك إزاي تعملها
العميل : آه.. آه… هو الماكينة دي بتكلف كام تقريباً؟
المهندس منسى : في حدود ، يعني في حدود 7200 جنيه مصري
العميل : طب في إمكانية أصور الماكينة ديت؟
المهندس منسى : ابعتلنا طلب استفسار على الميل وهما هيتواصلوا معاك
العميل : إنفو آد
المهندس منسى : أيوه إنفو آد إم تو باك دوت كوم
العميل : طيب خلاص مافيش مشكلة، إنما مافيش عندك مصنع إنت بتغلف بنفسك يعني
المهندس منسى : هوه أنا مش فاهم، أنا عندي مصانع، بس أنا مش عارف إنت محتاج مصنع إيه؟ يعني إنت عايز تعبئة للغير، عايز تغليف للغير، العملية بسيطة مش أكتر من إنك بتاخد مكنة بـ وتغلف عليها منتجك، إنما هتغلف للغير غلط، غلط إنك تتطلع منتجاتك تغلفها عند حد
العميل : آه.. آه..
المهندس منسى : غلط إزاي إنت مصنع وتطلع منتجاتك تغلفها عند حد، شايفها مقبولة؟؟!!!!
العميل : والله مش قصة، أنا بالنسبة ليا أنا عندي مصنع كامل مناديل مبللة، أما الأصناف التانية أنا بنصنع لدى الغير، تمام اللي هي السبريهات، البرفانات، معطرات الجو
المهندس منسى : بيني وبينك النهاردة مش عارف… ما أعتقدش أنها… يعني المفروض إنك تصنع لنفسك، جرب.. جرب… بس هتبقى تقول الباش مهندس منسي قال
العميل : والله هي الفكرة عارف مافيش عندنا ناس… مافيش عندنا إنتاج أساساً
المهندس منسى : لأ في إنتاج بس هوه في الآخر مش عارف أقولك إيه؟؟؟ عملية إن أنا أشغل لدى الغير في التعبئة والتغليف، أصل التعبئة والتغليف ده حاجة بسيطة جداً يعني، ده أبسط ما في العملية، أروح أعملها عند الغير
العميل : قصدك يعني ماكينة تلصق استيكر، ماكينة تلصق سليف، الحاجات دي كلها بسيطة
المهندس منسى : حاجة بسيطة قوي قوي قوي… أروح أعملها عند الغير، ليه العملية مش كيمياء…
العميل : يعني هي مش عايزه خط إنتاج كامل عشان خاطر العبوات كتير
المهندس منسى : مش عايزه خط إنتاج ولا حاجة، ده هي مكنة سير كده بتحط الحاجة عليها وبترميها الكرتونة تروح معبيها خلاص اتغلفت، 10 متر في الدقيقة
العميل : آه… طب أنا عايز ميديا للحاجات دي أعرف بتشتغل إزاي وكده
المهندس منسى : مافيش مشكلة
العميل : لو في إمكانية عندك صورة الماكينة، العمل عليها بيبقى إزاي؟ أو في إمكانية فيديوهات على اليوتيوب أو الواتس آب
المهندس منسى : لو تقدر تيجي تشرفنا بالزيارة تبقى الدنيا لايف قدامك أحسن
العميل : فين المكان بتعاكم؟
المهندس منسى : إحنا عندنا حدائق القبة، مدينة نصر، باب الشعرية، 6 أكتوبر
العميل : في أكتوبر عندكم مكان؟
المهندس منسى : آه
العميل : طيب تحب أرتب ميعاد على إمتى مثلاً ممكن نتقابل
المهندس منسى : والله يستحسن لو حضرتك شرفتنا بنفسك
العميل : مافيش مشكلة عادي بس شوف الوقت اللي يناسب حضرتك
المهندس منسى : تشوف الدنيا فيها إيه، تشوف العملية التشغيلية بتم إزاي
العميل : السليف ده مش عايز مكنة عشان يطلع يعني
المهندس منسى : لا إنت ممكن تاخده متقطع جاهز
العميل : آه… بس إنتم عندكم مصنع سليف، مصنع بتطلعوا السليف ده، اللي هوه زي السليف اللي بيتحط على أزايز الورنيش
المهندس منسى : آه عندنا مصنع سليف، وعندنا مصنع بيطلع رولات التغليف الحديث، وعندنا مصنع بلاستيك… مصانع كتيرة قوي
العميل : تمام…
المهندس منسى : إنت لما تروح برده أكتوبر هتتفرج على مصنع منهم، أو مصنعين
العميل : طيب مافيش مشكلة
المهندس منسى : ممكن لو عايز تتفرج على عدد من المصانع وإنت هناك قوله فرجني على المصانع التانية
العميل : آه… وبالنسبة للاستيكر اللي بيتلصق على عبوات الشاور والشامبو موجود عندك منه متاح
المهندس منسى : موجود آه بنصنعه، بنصنع الاستيكر وعندنا المكنة كمان اللي بتلصقه، مكنة بسيطة مش محتاجة مجهود يعني
العميل : قلتلي المكنة السليف بكام تقريباً؟
المهندس منسى :
العميل : والمكنة بتاعت الستيكر بتاع الشامبو
المهندس منسى : في حدود ـ 1100 كده يعني
العميل : آه…
المهندس منسى : أرخص أسعار في العالم كله
العميل : المكن دي صيني ولا…؟
المهندس منسى : لأ دي ماركة.. براند… اسمها ماركة المهندس منسي، براند عالمي
العميل : آه.. دي حضرتك بتصنعها هنا يعني الماكينات دي؟
المهندس منسى : إحنا بنصنع أغلب قطع الغيار بره مصر وبنجمعها هنا في مصر، زي مثلاً لما تيجي تقول عربية شيفرليه بيقولوا عليها مصري، هي مصري؟؟؟
العميل : آه هي تجميع أساساً هنا
المهندس منسى : آه بس، أما عملية قطع الغيار جبناها منين؟؟؟ جبناها من إني ووي.. عدد من البلاد
العميل : أنا عارف آه، مش تصنيع عبارة عن تجميع يعني
المهندس منسى : تجميع على جزء فيها تصنيع بسيط كدة
العميل : آه… وفي عندك عبوات كمان بلاستيك
المهندس منسى : وفي عندنا عبوات بلاستيك… كل ما يخطر على بالك في خدمة التعبئة والتغليف
العميل : آه… باش مهندس محمد
المهندس منسى : لا ما تقلقش
العميل : الويت وايف عارفه صح؟
المهندس منسى : آه…
العميل : في المنديل المبلل ذات غطا بلاستيك
المهندس منسى : آه ده نقدر نصنعهولك آه
العميل : ده بيتصنع هنا ولا عندك الماكينة بتاعته؟
المهندس منسى : الـ 2
العميل : الماكينة بتاعته تعمل كام تقريباً مثلاً؟
المهندس منسى : وإنت هناك قوله فرجني على مكنة حقن البلاستيك اللي عندك، نشوف بس الغطا نمسكه، لأني شفته معمول مرة بطريقة حقن البلاستيك، ومرة معمول بطريقة الفاكيوم سترموفورم
العميل : هوه اللي أنا أعرفه إن هي عبارة عن اسطمبة معينة بتتحط وبتطلع.. عبارة عن اسطمبات
المهندس منسى : في كل الأحوال اسطمبات، الأولانية اسطمبة، وفي التانية برده اسطمبة، نبص على الغطا وإن شاء الله خير
العميل : أنا ممكن أجيبلك منه أنا عندي منه
المهندس منسى : هات منه
العميل : طيب خلاص مافيش مشكلة، ماشي أنا هحاول أرتب ميعاد
المهندس منسى : أنا هبعتلك العنوان ولما تيجي تتصل بالعنوان على طول
العميل : فى استفسار آخر المعطر الـ 300 مللي اللي هوه الصاج عارف العبوات بتاعتها
المهندس منسى : أنا شغلي في البلاستيك
العميل : لأ مش بلاستيك هي عبوات صاج
المهندس منسى : ما هوه إحنا بنصنع العبوات البلاستيك، أما إنت لو عايز…
العميل : ماشي.. ماشي، أنا عايز السليف بتاعها، أنا عايز ألصق السليف، أصل العبوات دي …
المهندس منسى : آه.. آه.. عندنا السليف آه
العميل : تمام.. فالسليف ده هيتحط على عبوات 300 مللي
المهندس منسى : مافيش مشكلة
العميل : السليف ده تكلفته كام مثلاً، بيتحسب بالمتر ولا ايه
المهندس منسى : هيبقى صعب علينا نحسبلك تكلفة السليف كده، لازم نشوف الديزاين، وبناء على الديزاين هنبدأ نحسبلك التكلفة
العميل : ديزاين العبوة نفسها قصدك يعني
المهندس منسى : لأ الديزاين اللي إنت عملته بتاع السليف سفت شرينك
العميل : السليف اللي هيتلصق على العبوة نفسها قصدك
المهندس منسى : آه
العميل : يعني أنا أجيبلك عبوة من عندي عشان تشوف مقاساتها ماشية إزاي يعني؟
المهندس منسى : إنت مش عملت تصميم للسليف نفسه؟
العميل : والله بص يا أ/ محمد أنا العبوات دي كنت بجيبها من تركيا معبئة وجاهزة…
المهندس منسى : كنت بتجيبها من تركيا والاستيراد قفل
العميل : أيوه، فدي كانت مطبوعة..
المهندس منسى : كل العملية إن إحنا عايزين نعمل الديزاين نفسه اللي إنت عمله عشان خاطر نقدر نحسب عدد الألوان وحاجات من دي ونشوف الكمية المطلوبة أد إيه؟
العميل : ما هو أنا معنديش الديزاين، أنا عندي العبوة وعايز أعمل ديزاين زيها هنا
المهندس منسى : آه.. آه… يعني عايز نعملك إحنا الديزاين
العميل : أيوه آه، بس نفس الديزاين اللي أنا كنت بجيبه من هناك
المهندس منسى : آه.. آه… طب هات العبوة، إنت عايز كمية أد إيه؟
العميل : والله ما تفرقش الكمية أنا هشتغل في كميات كبيرة عموماً
المهندس منسى : آه… لا إحنا عايزين نعرف الكمية
العميل : أنا كنت بشتغل تقريباً بـ 3000 قطعة تقريباً يعني، 3000 كرتونة × 24 قطعة
المهندس منسى : آه… قولي العدد
العميل : 3000× 24 يعني ممكن نتكلم في 74000 قطعة
المهندس منسى : قولي بقى العدد بالضبط عشان أقولك آه ده هيبقى كذا، حضرتك شرفنا بالزيارة وإن شاء الله خير
العميل : آه… يعني هي عايزه زيارة مش هتعرف تحسبلي موضوع التكلفة لغاية ما تشوف الديزاين على بعضه يعني
المهندس منسى : آه لا ما هو لازم تجيبلي الديزاين ونقعد مع نشوف الكمية، ولازم الكميات تكون متحددة مش نقول قول كذا، لأ، لازم تكون متحددة بالضبط
العميل : إنت أكيد عندك مينيمام أوردر يعني
المهندس منسى : آه… في همه هناك أول ما تروح هناك هتلاقي في برايس ليست كده فيها الكمية كذا بكذا، والكمية كذا بكذا… حوالي 10 حاجات يعني، فإنت هتختار منهم الكمية اللي هتعجبك
العميل : آه… بس هوه عموماً السليف ده بيتلصق على العبوة اللي هوه الصاج ده؟
المهندس منسى : آه.. بتلصق آه، مش بتلصق بتشفط عليها
العميل : يعني بيتغلف حواليها قصدك
المهندس منسى : هوه بيبقى هوه والعبوة قطعة واحدة
العميل : كأنها مطبوعة
المهندس منسى : آه كأنها مطبوعة آه
العميل : والماكينة دي بتطلع كام قطعة تقريباً لو هاخدها؟
المهندس منسى : 10 متر في الدقيقة
العميل : يعني كام؟؟ ما أعرفش أحسبها إزاي؟
المهندس منسى : لازم نمسك القطعة ونحسبها لك
العميل : عموماً كله عايز زيارة في الأول عشان نقدر نحدد كل الاتجاهات بتاعتنا
المهندس منسى : آه…
العميل : طيب على خير إن شاء الله
المهندس منسى : ماشي مع السلامة
العميل : ماشي شكراً لحضرتك شكراً
المهندس منسى : مع السلامة
