رولات فاكيوم لتغليف المنتجات مقدمة من شركة المهندس منسي

 

العميل : سلام عليكم

المهندس منسي : عليكم السلام ورحمة الله وبركاته

العميل : شركة المهندس منسي

المهندس منسي : أيوه

العميل : مع حضرتك ضياء من المنطقة الصناعية في أوسنا

المهندس منسي : أهلاً وسهلاً

العميل : إزي حضرتك

المهندس منسي : الحمدلله

العميل : إحنا بندور على فاكيوم 350 جرام موجود عند حضرتك؟

المهندس منسي : إنت عايز إيه في الفاكيوم، عايز المكنة ولا عايز….؟

العميل : لأ عايز الرول

المهندس منسي : آه… رول فاكيوم 350 ميكرون

العميل : آه 350 ميكرون معلش أصلي واخد على الورق معلش، أنا آسف

المهندس منسي : لا ولا يهمك، آه عندنا آه

العميل : طب عامل كام يا فندم؟

المهندس منسي : 32 جنيه الكيلو

العميل : طيب ده يا فندم عرض رول كام؟

المهندس منسي : العرض اللي إنت عايزه، بتقولي قصولي مقاس كذا

العميل : آه يعني حضرتك بتديني بالفرخ بالمقاس اللي أنا عايزه

المهندس منسي : أيوه

العميل : يعني الكيلو يعملي مثلاً….

المهندس منسي : إنت عايزه أفرخ ولا عايزه رول؟

العميل : أنا والله هشوف الكمية اللي مطلوبة مني أد إيه، هوه الرول بيعمل كام كيلو تقريباً؟

المهندس منسي : لأ إنت بتشوف الكمية بتاعتك أد إيه المطلوبة، إنت عايز كام كيلو؟ عايز عرض كام؟ الحاجات دي إنت اللي بتقولي عليها وأنا أعملهالك

العميل : حضرتك بتديهالي مقصوصة؟

المهندس منسي : أيوه مقصوصة جاهزة آه

العميل : تمام يا فندم.. تمام.. تمام، وآخرها 32 جنيه، خلاص إحنا هنعمل المقاس وأستأذنك هرجع أكلمك تاني علي الواتس وأبلغ حضرتك

المهندس منسي : ماشي يا غالي

العميل : سلام عليكم

المهندس منسي : عليكم السلام ورحمة الله وبركاته

العميل : حضرتك رديت علينا عملت إيه في البتاع الفاكيوم اللي إحنا كنا قايلين عليه ده

المهندس منسي : فاكيوم إيه؟

العميل : اللي هوه الشيت 55 × 40

المهندس منسي : آه أنا قلتلك إيه بقى؟

العميل : قلتلي على الساعة 7 كده هتكون عرفت الحسبة بتاعته

المهندس منسي : أنا قلتلك على الساعة… ده قلتلي هشوف كده وهكلمك علي الواتس تاني

العميل : إنت كنا الخلاف بس على السعر تحددلنا سعر الشيت الواحد أو تحددلنا الكيلو عامل كام شيت

المهندس منسي : لا عامل كام شيت ديت إنت تاخد الكمية وتوزنها بقى مع نفسك

العميل : يا باشا أصل إحنا دلوقتي بنسعر، إحنا دلوقتي ما نعرفش سعر… ما نعرفش الكيلو فيه كام شيت عشان نسعرف وندي سعر للعميل

المهندس منسي : آه… إنت بتعمل عرض أسعار يعني

العميل : آه…

المهندس منسي : إنت عايزه كام ميكرون

العميل : ما أنا قلت لحضرتك 350

المهندس منسي : طب تعالى على نفسك وقول تاني معلش، يعني إنت عايزه 350، عرض كام؟

العميل : عرض 40 × 55، وعايز 12000 شيت

المهندس منسي : بص اضرب 0.40 × 0.55 الناتج اللي يطلعلك اضربه × 1.3 ده الوزن النوعي للـ بي في سي

العميل : يقوم يديني إيه بقى

المهندس منسي : يقوم يديك وزن الشيت نفسه

العميل : وزن الشيت الواحد

المهندس منسي : أيوه

العميل : طالما إنت طلعت الوزن هتعرف تتطلع السعر، ما أنا قلتلك على سعره 36

إنت قلتلي 32 الكيلو

المهندس منسي : آه 32 للكميات الكبيرة، إنت كمية صغيرة

العميل : يعني كميتي كده صغيرة، طب كميتنا هتحاسبني عليها بكام؟

المهندس منسي : هحسبك عليها بـ 36 عشان كمية صغيرة

العميل : آه.. يعني أضرب دلوقتي 0.55 × 0.40 × 1.3 يقوم يديني كده وزن الشيت

المهندس منسي : آه وزن الشيت آه

العميل : آه… بعد كده أضرب سعر….

المهندس منسي : ده الوزن النوعي لخامة الـ بي في سي 1.3، الوزن اللي يطلع، هيطلع في حدود 286 ده اضربه بقى × 36 لو كميات صغيرة، × 32 لو كميات كبيرة

العميل : أضربه × 36 آه.. ماشي

المهندس منسي : ماشي يا غالي

العميل : هشوف لو في خلاف برده هرجع لحضرتك برده تاني، عشان بس ما أديش للراجل سعر غلط

المهندس منسي : ماشي

العميل : أنا عملت زي ما حضرتك قلتلي طلع 0.286 ضربت × 36 طلعلي الناتج 10 وشويه كسور كده، يبقى بـ 10 قروش الشيت

المهندس منسي : 10 جنيه

العميل : الشيت الواحد 10 جنيه

المهندس منسي : آه

العميل : ياه… الشيت الواحد

المهندس منسي : آه الشيت الواحد آه

العميل : غالي يعني هوه كده الكيلو بيطلع 3 شيتات، يطلع 3 مقاسات بس

المهندس منسي : آه… إحنا كده بنتكلم في 350 ميكرون يعني تقيل مش خفيف، اتأكد بقى إذا كان 350 ميكرون ولا 35 ميكرون

العميل : لأ 350 ميكرون

المهندس منسي : إنت هتقدمه أشكال

العميل : لأ ده أنا هاخد الشيت ده هكسره على مكنة تكسير

المهندس منسي : هتعمله علبة

العميل : آه بحيث إن هوه يتقفل ويتعمل زي غطا كده لعلبة

المهندس منسي : لأ ده كفاية عليه قوي إنك تعمله 150-180 ميكرون، 350 ده تقيل قوي، عارف 350 يعني إيه، يعني ثلث مللي

العميل : آه.. آه.. هوه فعلاً محمل

المهندس منسي : طب أنا هقولك على حاجة كويسة، ابعتلي عينة من اللي إنت عايز زيها وإحنا نحسبهالك تاني

العميل : أصل أنا مستغرب كده 10 جنيه كتير قوي، يعني أنا حاسس إن الحسبة كده يمكن أنا أكون معرفش أحسبها، فأنا قلت حضرتك هوه إحنا مشتغلناش في البتاع ده قبل كده أول مرة نشتغل فيه، فبندي سعر بس للعميل وهوه راجل كده كده عايز يشتغل، يعني هوه راجل حبيبنا عايز يشتغل

المهندس منسي : وإحنا برده عايزين نشتغل برده، بس الله يلعنه ال

العميل : بس 10 جنيه حاسس إن في مشكلة

المهندس منسي : ده إحساس بس، إنما هوه الحسبة مضبوطة بناء على كلامك إن هي 350 ميكرون، ولكن أنا أشك إنها 350 ميكرون

العميل : آه… إنت بتقول إنها ممكن تكون 180

المهندس منسي : آه 180 آه

العميل : ما هو أنا بقولك إن هوه بيتقفل زي بيتحط غطا كده لعلبة بتاع منسوجات اللي هي المفارش، واخد بال حضرتك، يعني بتلبس في قاعدة، يعني بيحط المفرش في قاعدة….

المهندس منسي : لا.. لا.. دي تقيلة جداً عليها، إنت قصدك اللي هي العلبة الاسطوانية ديت؟

العميل : آه.. آه.. آه…

المهندس منسي : لا ده كده تقيلة جداً عليها، ده كده 150 ميكرون كفاية عليها قوي، قولي هاتلي عينة من اللي إنت عايز زيها عشان خاطر نحسبهالك

العميل : نجيبهالك يعني ونحسبها يعني

المهندس منسي : آه.. أنا هحسبلك كام ميكرون، وهحسبلك وزنها وأقولك دي هتكلفك كذا

العميل : طب خلاص.. خلاص, لو كده هبقى أجيب العينة نفسها وأجي لحضرتك وتحسبهالنا، عشان بس يبقى إيه حساباتنا مع الراجل دقيقة يعني

المهندس منسي : إن شاء الله عشان بس الاتفاق يبقى زي ما هنشتغل بالضبط يعني

العميل : ماشي، ماشي يا باشا كتر ألف خيرك، متشكرين جداً

المهندس منسي : مع السلامة

العميل : اتفضل في رعاية الله