طبات العبوات البلاستيك من شركة المهندس منسي

العميل : السلام عليكم

مهندس منسي : عليكم السلام ورحمة الله وبركاته

العميل : لو سمحت كنت بتكلم على موضوع الطبات

مهندس منسي : آه

العميل : مش عارف حضرتك اللي كنت بتكلمني ولا حد تاني؟

مهندس منسي : لأ حد تاني

العميل : آه… أنا كنت عايز طبات لعبوات فأنا اتكلمت مع حد إمبارح فقالي قيس الفوهة بتاعت الإزازة فأنا قيستها لقيتها 4.2 سم فهو قالي مش عارف 42 أو حاجة استاندر مافيش حاجة كده يعني، فأنا كنت كلمته…

مهندس منسي : إحنا يلزمنا إن إحنا نمسك العبوة بإيدنا ونعرف الكمية أد إيه، ما ينفعش الكلام من بعيد لبعيد ما ينفعش، لازم العبوة تبقى في إيدنا عشان أقدر أحسبلك كل حاجة… معايا

العميل : أنا… قيستها 4 سم أنا اللي متحمل في الموضوع مش…

مهندس منسي : طب العبوة نوعها إيه؟ نوع خامة البلاستيك إيه؟

مهندس منسي : أنا ما أقدرش أقولك حاجة لأن الطبات دي أنواعها كتير والعبوات البلاستيكية أنواعها كتير، أهم حاجة دلوقتي العبوة البلاستيكية بتاعتك نوعها إيه؟

العميل : إنت عارف حضرتك العبوات اللي هي فيها مبيدات…

مهندس منسي : آه ما هي العبوات المبيدات…. في عبوات بولي إيثيلين، وفي عبوات بي إي تي، واخد بالك، فأنا ممكن أديلك عبوة بولي إيثيلين تطلع بي إي تي

العميل : العبوة اللي هي لونها أبيض مسمط اللي بيتعبا فيها مبيدات…

مهندس منسي : يا سيدي والله كله أبيض مسمط، في بي إي تي أبيض مسمط، وفي بولي إيثيلين أبيض مسمط، ولا أديلك أي طبات وإنت تتصرف… ما هي لو ما لحمتش في الآخر كل ده عشان خاطر إنت مش عايز تبعت عبوة، ما هي لو ما لحمتش أنا اللي هتسأل، إنت هتقولي الطبات بتاعتك مش عارف إيه…

العميل : لا أصل هي…

مهندس منسي : يا هندسة الله يرضى عليك الشغل الصح مافيش أحسن منه، إنتم بتستقربوا في الآخر إحنا اللي بنشيل المشاكل، بعد إذنك ابعتلي عبوة من اللي إنت هتلحم عليها أنا من العين دي قبل العين دي، ولو عايز كمان أوردلك العبوة برده من العين دي قبل العين دي، وعندنا أكياس، عندنا عبوات، وعندنا مكن تعبئة… وعندنا كل حاجة

العميل : طيب صلي على النبي، ده كويس خالص، حضرتك عند حضرتك العبوات اللي هي المستوردة البلاستيك اللي يببقى الغطا بتاعها أحمر…

مهندس منسي : يا بيه أي حد النهاردة يقولك بستورد عبوات يبقى راجل بيكذب، في حد بيستورد عبوات؟؟؟ أصلاً ما يقدرش يستورد عبوات لو جيه يدخلها مصر يدخلوه سياسات على طول

العميل : طب قولي السؤال بقى بطريقة تانية، طب إنت حضرتك عندك عبوة تكون نظيفة اللي هي شبه اللي بتيجي مستوردة… أصل أنا شفت الحاجات دي في المبيدات والأسمدة الزراعية…

مهندس منسي : هاتلي عبوة نبص عليها

العميل : برده.. طيب ماشي، أنا شاكر جداً، السلام عليكم

مهندس منسي : مع السلامة