عبوات بى فى سى من شركة المهندس منسى
العميل: سلام عليكم
المهندس منسى: عليكم السلام ورحمة الله وبركاته
العميل: شركة المهندس منسي
المهندس منسى: أيوه
العميل: أقدر أكلم حد من المبيعات لو سمحت
المهندس منسى: مع حضرتك الاستشاري الهندسي أأمرني
العميل: أتشرف باسم حضرتك؟
المهندس منسى: المهندس منسي معاك
العميل: آه إزيك يا باش مهندس أخبار حضرتك إيه
المهندس منسى: الحمد لله
العميل: مع حضرتك وائل علاء من شركة الصفوة فكنا بصينا على… إحنا شغالين في مكسبات الطعم يا فندم
المهندس منسى: شركة الصفوة إيه؟
العميل: للاستيراد والتصدير والتوكيلات التجارية يا فندم
المهندس منسى: اسم شركتكم إيه؟
العميل: الصفوة يا فندم
المهندس منسى: أهلاً بيك
العميل: أهلاً بيك يا باش مهندس منسي،والله يا باش مهندس إحنا كنا مهتمين بالأزايز الـ بي في سي الـ 30 مللي والـ 15 مللي والـ 10، وشوفنا إعلان على الإنترنت إنتوا حاطين صور كده تتناسب معانا، واضح إن الصور كمية بولي إيثيلين مش بي في سي فكنا عايزين نعرف…
المهندس منسى: إحنا شغالين في الـ 2، ولكن إن في مشكلة بس إن إحنا بنحافظ على حقوق الملكية، يعني بمعنى، يعني ساي مثلاً صنعنا عبوات، ما نصنعش عبوات لكل من هب ودب، يعني مثلاً شركة سيليكو جات قالتلنا إعملنا عبوة، نقوم مصنعين العبوة بتاعتهم باسطمبتهم
العميل: تمام…
المهندس منسى: وما نعملهاش لحد غيرهم
العميل: تمام.. تمام يا فندم
المهندس منسى: هشوف كده لو إنت عايز عبوات جاهزة تروح تشتريها وتيجي دي مش عندنا، أما لو عايز تعمل عبوات خاصة بيكوا إنتوا دي اللي عندنا
العميل: لا إحنا عايزين نعمل عبوات خاصة بينا طبعاً، وهيبقى في كده كل شهر متوسط أوردر بالنسبة في الشغل يعني
المهندس منسى: إن شاء الله
العميل: إن شاء الله بإذن الله، بس حابين برده نعرف متوسط الكمية بتاعتنا إحنا نتوقع إنه يبقى تقريبي في الشهر ما بين 30-50 ألف إزازة، مع فرق المقاسات، واخد بال حضرتك
المهندس منسى: اتفضل
العميل: معرفش برده إيه اللي متاح هل.. ده معناه إن الاسطمبة لسه هتتعمل ولا في حاجة تتعمل….
المهندس منسى: ما أنا بقول لحضرتك دي سياستنا من يوم بدايتنا وإحنا بنحافظ على حقوق الملكية للناس، فإحنا بنعمل الاسطمبة وعادي براحتك لو عايز تحفر الشعار بتاعك عليها تحفره عليها، واخد بالك…
العميل: أنا لسه كنت عايز أقول لحضرتك ياريت يبقى هايل
المهندس منسى: ده حقك، ومن حقك كمان تاخد اسطمبتك معاك بعد ما تخلص الطلبية، ده حقك
المهندس منسى: تمام يا فندم
العميل: بس إن النهاردة إنت عارف عملية ضرب المنتجات بقت للركب
العميل: ده طبعاً أكيد
المهندس منسى: يعني كل يوم بيخشلنا ناس عايزين يضربه منتجات
العميل: أكيد طبعاً
المهندس منسى: ده طبعاً… يعني ممكن يخشلك واحد محترم وقبال المحترم ده 10 بيضربوا
العميل: أكيد… أكيد…،برده يا باش مهندس منسي ما يبقاش معاد تصنيعه، ما يبقاش المنتج نفسه
المهندس منسى: دي الكاستومايز بتاعت حضرتك دي الإعدادات بتاعت حضرتك، بتقولنا عليها، لأن إحنا أساساً أوردي ما بنشتغلش غير درجة أولى
العميل: تمام…
المهندس منسى: يعني لو لاحظت هتلاقي أغلب المنتجات اللي بنشتغل معاها كلها شركات براندات
العميل: طيب هايل، وإحنا كمان التوكيل بتاعنا إيطالي وأمريكي فحبين لما يتعاد تعبئته هنا يبقى بشكل مناسب ليه
المهندس منسى: بحيث إن مصنعك إنت ما حدش يقدر يضربلك منتجك،يوم ما تحس إن في منتج نزل السوق يشبه منتجك، لا ده إنت تروح وتحقق وتبهدل الدنيا، إنما مش يبقى إنت بنيت بيت من إزاز وعمال.. ما ينفعش،فهمتني يعني مثلاً النهاردة إنت بنيت أسس سليمة، فعارف عبوتك شكلها إيه، وعارف في علامات نبدأ نعملها بحيث إن عبوتي أشوفها على الريون أعرف إن دي عبوتي سليمة
العميل: أكيد حبين ده بالضبط
المهندس منسى: فهي دي هي سياستنا اللي إحنا شغالين بيها
العميل: بيدي تقل للمنتج طبعاً أكيد طبعاً يا باش مهندس
المهندس منسى: شوف حضرتك نتقابل إمتى…
العميل: شوف حضرتك برده وظروفه حضرتك إيه ياريت آه نرتب مقابلة وآخد عينات حتى شبيهة مش شرط نفس المقاس، ونشوف التكلفة هتبقى شكلها إيه، والاسطمبات برده شكلها إيه..
المهندس منسى: حضرتك أنا ببقى موجود من 5-11 طول أيام الأسبوع ماعدا يوم السبت بكون في فرع مدينة نصر من 4-10
العميل: طيب هايل، أنا ممكن أقابل حضرتك في فرع مدينة نصر لأن ده جنبنا
المهندس منسى: بكون هناك يوم السبت من 4-11 بالليل
العميل: طيب هايل جداً.. جداً،طيب يناسب حضرتك إمتى في الميعاد ده، أنا معنديش مشكلة..
المهندس منسى: لا عادي أنا هتلاقيني من 4-11 يعني أنا بقول للناس كلها من 4-11
العميل: طيب.. آخد من حضرتك العنوان يا باش مهندس
المهندس منسى: هبعتلك الداتا بتاعته حالاً
العميل: يا ريت أكون شاكر، حضرتك اللي هتبقى موجود مش كده
المهندس منسى: أنا ببقى موجود يوم السبت، عادي هناك المهندس محترم قوي اسمه المهندس أحمد حسن حد محترم قوي يعني اللي ماسك الفرع
العميل: لا مقصدش حاجة والله بس أنا دردشت مع حضرتك في حاجة فطبعاً أتشرف بيك يعني
المهندس منسى: لا إن شاء الله خير
العميل: إن شاء الله بإذن الله، خلاص أنا أستأذن حضرتك بس إبعتلي العنوان وإن شاء الله ممكن على الساعة 6.5 أكون موجود إن شاء الله
المهندس منسى: إن شاء الله
العميل: فرصة سعيدة جداً يا باش مهندس مع حضرتك وائل عناني من شركة الصفوة
المهندس منسى: أهلاً بيك
العميل: الله يخليك، هستنى من حضرتك العنوان
المهندس منسى: مع السلامة
العميل: شكراً يا باش مهندس مع السلامة.. مع السلامة،وصلتني يا باشا بس مفيهاش عنوان مدينة نصر فيها عنوان باب الشعرية
المهندس منسى: همه بقى هيوصفولك…
العميل: ما أنا كلمت
المهندس منسى: آه.. آه ابعتت على سبيل الخطأ معلش
العميل: لا يا فندم ولا يهمك
المهندس منسى: لا هبعتهالك تاني حالاً
العميل: طيب شاكرين جداً شكراً يا باش مهندس
المهندس منسى: مع السلامة
العميل: مع السلامة.. مع السلامة
