عبوات تعبئة البويات من شركة المهندس منسي

العميل : السلام عليكم

المهندس منسي : عليكم السلام ورحمة الله وبركاته

العميل : باش مهندس عبد السلام معايا

المهندس منسي : المهندس منسي أيوه اتفضل

العميل : إزيك يا باش مهندس

المهندس منسي : أهلاً بيك

العميل : أنا المهندس حسام معاك مدير شركة للتوريدات بتاعت العبور ابن الحاج منير

المهندس منسي : ابن الحاج منير

العميل : كنا بناخد العبوات بتاعت البويه، افتكرتني، بقالنا فترة كبيرة داخلين على سنة ونص سنتين أهو

المهندس منسي : آه.. آه…

العميل : إزي حضرتك

المهندس منسي : إزيك يا غالي

العميل : الحمد لله، إزي أ/ حامد وأ/ زكريا

المهندس منسي : أ/ منير أخباره إيه؟

العميل : والله الله يرحمه بقى توفى من 4 شهور

المهندس منسي : لا البقاء لله

العميل : في حياتك الباقية، والله كنت عايز حضرتك في شغلانه مطلوبة مني وفي موضوع كده يخصني أنا شخصياً

المهندس منسي : اتفضل يا غالي

العميل : كان الوالد كان عرفني كده بناس عندهم مصنع بويه عندنا هنا في العبور ناس مصريين مشاركين واحد سعودي، بيعملوا عبوات ويطلعوا على ليبيا ويطلعوا على السودان، فكانوا ماضيين عقد مع الحاج محمد عبد الرحيم بتاع العاشر الشركة الدولية بياخده منه العبوات دي وفسخوا العقد لأنه العلب بقت تعبانه ومواعيد التوريد مش مضبوطة فقلتلهم ما تتفقوش مع حد أنا أعرف مصنع في أكتوبر ادوني فرصة بس أرتبلكم معاد معاه فرنوا عليا النهاردة عايزين يجوا يوم الخميس المصنع لو مناسب ليك، هيجي صاحب الشركة وشريكه السعودي بحيث اللي هيتفقوا عليه هيعربنولك عليه يعني، همه هيحتاجه طبعاً العبوات هيعبوا فيها بويات وعبوات تانية هيعبوا فيها شغل، في شغل مع الجيش هناك في ليبيا عبوات زي زيوت بتاع محطات البنزين البترول دي، زيوت بترولية

المهندس منسي : آه.. آه…

العميل : فالحاجات دي إن شاء الله هنقدر نوفرها لهم، هتبقى كميات كبيرة قوي يعني، أعتقد يعني كل أسبوع نقلتين كبار يعني

المهندس منسي : إن شاء الله مافيش مشكلة، ولكن هوه جايين بعد بكرة؟

العميل : لأ يوم الخميس اللي جاي، آخر الأسبوع

المهندس منسي : للأسف أنا رايح المغرب يوم الاثنين

العميل : آه توصل ترجع بالسلامة

المهندس منسي : راجع إن شاء الله بعد 5 أيام

العميل : طيب خلاص…

المهندس منسي : لو كده يشرفونا في الفرع بتاع مدينة نصر

العميل : مافيش مشكلة أرتب معاهم ، الموضوع التاني ده بقى مش عارف متردد بصراحة أكلمك فيه من إمبارح موضوع يخصني أنا شخصياً، كان حصل عندي كده ظرف من حوالي 10 أيام كان زوجتي في عندها موضوع كده كانسر في المعدة وظروفها الصحية كده اتدهورت مرة واحدة من حوالي 10 أيام، المشكلة إن أنا كنت عاملها علاج على نفقة الدولة من حوالي سنتين ودي تالت سنة، شالولها القولون والرحم والحالب، الموضوع  في المعدة والأمور ساءت جداً، وعندنا مشكلة في التحصيل لأن أنا أقرب تحصيل مالي ليا لسه يوم 10/3……معلش الشبكة وحشة قوي

المهندس منسي : آه

العميل : بس فطبعاً المشكلة عندي إن أنا أقرب تحصيل مالي ليا لسه 10/3، فالطريق بالنسبة لي الأعمار بيد الله  ، فأنا عبال ما كلمت الزبون بصورة ودية كده إن هوه يسقطلي جزء من الفلوس كده بدري عن ميعادها ويخصمها يوم 10 الحمد لله وافق، بس مادنيش المبلغ كله لسه باقي جزء يكاد لا يذكر بس عاملي أزمة كبيرة،  فقلت أكلمك هو الموضوع حرج يعني، لو الوضع يسمح بحاجة زي كده أكتب بيه أي ضمان على نفسي لغاية يوم 10 ما كنش تناسى كل الكلام اللي بتسمعه مني ده وخليني في الشغل بس، أنا حتى في نص هدومي وأنا بتكلم

المهندس منسي : لا والله أنا بالنسبة لي ما ببقيش أي جنيه بره، ده رقم واحد، رقم 2 السوق النهاردة بقى ضعيف جداً، يعني يدوب بنشتغل عشان نأكل ونشرب العيال

العميل : طيب يعني توعدني لو اتفقنا معاهم تطلعلي عمولة في يومها لو دفعوا فلوس

المهندس منسي : ده أكيد

العميل : طب الله يبارك لك، خلاص أنا هأكد عليهم وأديك تليفون يعني أقولهم على إمتى يبقوا عندك في أكتوبر ولا فين في مدينة نصر؟

المهندس منسي : في مدينة نصر

العميل : إمتى أديهم ميعاد إمتى؟

المهندس منسي : يوم السبت

العميل : طيب خلاص يوم السبت إن شاء الله، طب على تليفون يوم الجمعة، أأكد عليك، مع السلامة

المهندس منسي : وهمه لو عايزين يروحوا مدينة نصر يتفقوا مفيش مشكلة

العميل : يعني في اللي يحل محلك ويتفق وكل حاجة

المهندس منسي : شغالين، في عدد من الفروع الناس شغالة مش قاعدين مستنييني

العميل : لا عشان الاتفاقات والعقود هيعربنوا في اليوم ده أنا واثق من كده يعني، لأنه معاهم الشيخ محمد السعودي ده فالموضوع هيبقى فيه اتفاقات في نفس اليوم يعني

المهندس منسي : إن شاء الله

العميل : يا مسهل، إن شاء الله ماشي يا باش مهندس، السلام عليكم

المهندس منسي : مع السلامة