عينات رولات افلام شرينك لتغليف المنتجات من شركة المهندس منسي
العميل : سلام عليكم
المهندس منسي : عليكم السلام ورحمة الله وبركاته
العميل : شركة إم تو باك
المهندس منسي : أيوه
العميل : كنت عايز أستفسر بخصوص أفلام الشرينك اللي هوه الرول، كنت عايزه أعرف أقل كمية والأسعار؟
المهندس منسي : هوه إنت عايزه كمية أد إيه؟
العميل : ما هو أنا بسأل حضرتك الكمية أد إيه وبعد كده الأسعار
المهندس منسي : ما هو أقولك الكمية أقعد أرصلك مثلاً كمية كذا بكذا، وكمية كذا كذا.. كذا… المفروض إنت بتقولي أنا عايزه كمية أد كده والديزاين بتاعك.. إنت عايزها مطبوعة ولا سادة؟
العميل : لا عايزها سادة
المهندس منسي : عايزها سادة أقل كمية مثلاً في حدود 50 كيلو، الأسعار بتحدد بقى بناء على السماكة اللي إنت عايزيها والعرض، عايزها نظام تيوب أو خرطوم، أو نظام مشقوق من الجنب، ولا نظام قطع، والتكنيك نفسه، يعني عدد من العوامل…
العميل : أنا عايزه حاجة عشان أبقى واضحة مع حضرتك، أنا هستخدم الشرينك ده عشان شغل من البيت، تمام، فأنا هغلف بيه أكتر من حاجة، أنا شفت فيديوهات إن الشرينك ده ممكن بالهيت جن بيلم على البرودكت
المهندس منسي : ما هو ده بالهيت جن بيلم على البرودكت ولكن النهاردة المنتج نفسه بيطلع مش مضبوط، ولكن هوه في مكنة ديت، المكنة نفسها كلها بـ 430 يعني 4300 جنيه
العميل : ماشي حضرتك بس هقولك لحضرتك حاجة عشان نبقى واضحين، أنا لما بكون ببتدي شغل من البيت إن أنا أمشي بالهيت جان أحسن ولا إن أنا أمشي بمكنة، أنا لسه بجرب…
المهندس منسي : لأ بالمكنة
العميل : بالمكنة؟
المهندس منسي : آه المكنة أفضل ، تتطلعلك المياه كلها واحدة، لأن الهيت جان هيعملك إيه؟؟ هيعملك.. هيركز على نقطة دون نقطة، عامله بالضبط زي اللي بيستحمه بخرطوم مياه واللي بيستحمه بدش
العميل : طيب.. أنا بتكلم في حاجة مؤقتة لغاية ما ربنا يكرمني وبعد كده نبقى أجيب ده…
المهندس منسي : هبعتلك أنا دلوقتي تليفون الفرع بتاعنا اللي في 6 أكتوبر هتروحي هتلاقي عنده كميات كبيرة هتنقي… مش شرط بقى أقل كمية، خدي اللي يعجبك
العميل : لأ حضرتك أنا كنت عايزة أسهل حاجة شحن، كنت عايزه أسأل هل في إمكانية إن أنا أشحن الحاجة لأن أنا مش…
المهندس منسي : آه بتبعتيلي فلوسها الأول وبعد كده نشحنهالك، بس الأحسن إنك تروحي تنقي حاجتك، عشان هوه مش عارف اللي إنت عايزاه إيه
العميل : طيب، حضرتك عموماً أنا هشتغل في الصابون عموماً، أو علب برطمانات ، أنا مش هحتاج حاجة السماكة بتاعتها عالية قوي، يدوب بس الشكل إنها….
المهندس منسي : وحدي الله
العميل : لا إله إلا الله
المهندس منسي : عشان كده أنا بقولك روحي هناك تنقي الحاجة اللي إنت عايزاها، أو في جنبك هنا في حدائق القبة، مدينة نصر، باب الشعرية، العبور بس لازم تروحي، معلش اتعبي شويه وروحي شوفي الحاجة بتاعتك قولي لأ دي للعلبة دي، ودي للعلبة دي…..
العميل : حضرتك أنا في أسوان
المهندس منسي : آه… آه….
العميل : فهمتني عشان كده… خلاص يبقى الفكرة…
المهندس منسي : تقدري تبعتي العينات بتاعتك عشان خاطر نطلعلك المقاسات مضبوطة؟
العميل : تمام أوكيه، على الميل مثلاً؟
المهندس منسي : لأ تبعتيها بالبستة بالبريد، عشان نمسكها كده ونروح نجرب عليها، يجرب دي ويجرب دي ويجرب دي
العميل : حضرتك قصدك كده على القطع
المهندس منسي : أيوه، لعلمك أنا مش عايز أبيع وبس…
العميل : ما أنا فاهمه حضرتك…
المهندس منسي : أنا بحاول بقدر الإمكان إن العملية تكون مضبوطة
العميل : بالضبط تمام أكيد، لأ أنا شفت ناس بتستخدم مكنة كده زي اللحام اللي هي بتقص وفي نفس الوقت بتلحم، في ناس شفتها…
المهندس منسي : آه.. آه… ما شاء الله عليكي إنت كده عامله بحث جامد قوي، إنت كده تمام قوي، صح.. صح.. اللي هي بتلحم وتقطع في نفس الوقت على أساس…
العميل : بالضبط بعد كده…
المهندس منسي : تاخدي أي عرض وتشتغلي عليه.. صح.. صح
العميل : أشتغل على كذا قطع، تمام
المهندس منسي : مافيش مشكلة
العميل : الله يخليك، فبس المكنة دي هي اللي هي بتلحم وتقطع دي، وفي نفس الوقت الرول بكام مثلاً، لأني أنا هاخد رول السماكة بالنسبة لي مش هتفرق لأن…
المهندس منسي : هيبقى في حدود 28 في الحدود دي
العميل : الرول نفسه اللي هوه 50 كيلو
المهندس منسي : آه مثلاً
العميل : طب وأقل كمية مثلاً أد إيه؟
المهندس منسي : ما هو أقل كمية 50 كيلو، ولكن إنت عايزه إني سايز فده عادي ممكن يديلك رول 20 كيلو 30 كيلو براحتك يعني
العميل : لأ هنقول مثلاً هاخد الـ 50 عشان مش كل شويه هشحن
المهندس منسي : مافيش مشكلة
العميل : هوه الـ 50 طالما 28 ممكن أقولك لأ ابعتلي 100 كيلو
المهندس منسي : مافيش مشكلة
العميل : حلو، تمام… نيجي مثلاً المكنة اللي هي بتلحم وتقص
المهندس منسي : إنت عايزاها عرض كام؟
العميل : لأ مش كبيرة، لأني عندي حاجات صغيرة، يعني مثلاً برطمانة كده صغيرة، علبة كريم، صابونة.. حاجات زي كده، فمش حاجات كبيرة، يدوب حاجات ماكس مام 20 ـ 30 سم… خليها 30
المهندس منسي : 30 تعمل النهاردة في حدود 500 جنيه
العميل : طيب تمام… كنت عايز أسأل على حاجة…
المهندس منسي : هوه الهيت جان إحنا ما بنشتغلش فيه لأني رافض الفكرة لأنه هوه بيبوظ بسرعة جداً أنا شفت ناس بتعمله باستشوار…
العميل : آه.. آه أنا رافض الفكرة من بابها
المهندس منسي : لأن أول حاجة هوه بيبوظ بسرعة، وبسرعة منطلقة، يعني إذا كمل معاكي يومين يبقى من الله، واخده بالك
العميل : آه يبقى أنا أجيبله استشوار وأريح دماغي
المهندس منسي : آه…
العميل : كبداية، وفيما بعد إن أنا لما أكبر بإذن الله في المجال ماشي أجيب مكنة جاهزة أكيد لما الكميات عندي بتزيد، إنما أنا لسه في البداية
المهندس منسي : آه.. ربنا يوفقك يا رب
العميل : إن شاء الله تسلم يا باش مهندس، طب خلاص أوكيه تمام طب فيه رقم اللي قلت عليه إن أنا.. ده اللي هوه اللي هيشحنلي الحاجة وكده
المهندس منسي : آه هبعتلك أنا رقم اللي هيشحنلك الحاجة دلوقتي حالاً
العميل : هتبعتلها ماسيج ولا…
المهندس منسي : آه هبعتها ماسيج آه
العميل : طب خلاص أوكيه، شكراً لذوق حضرتك
المهندس منسي : الله يخليكي، مع السلامة
العميل : شكراً
