ماكينات تعبئة الملح من شركة المهندس منسي 

العميل: السلام عليكم

المهندس منسي: عليكم السلام ورحمة الله وبركاته

العميل: المهندس منسي

المهندس منسي: أيوه

العميل: لو سمحت كنت عايز أعمل مشروع تعبئة الملح

المهندس منسي: أيوه اتفضل… حضرتك هتعبي في أكياس ولا عبوات؟

العميل:  لأ في أكياس

المهندس منسي: نص أتوماتيك ولا أتوماتيك؟

العميل: أنا عايز الكيس في الآخر جاهز، يعني أحط الملح يطلعلي في كيس، يعني أتوماتيك كامل كده

المهندس منسي: هوه فيه في كل الأحوال هيطلعلك كيس، يعني لو مش عايز تشتغل نص أتوماتيك

العميل: هوه النص أتوماتيك يطلعلي الكيس مفتوح؟

المهندس منسي:  لأ هي بتطلعلك الكيس مفتوح بيبقى في جنبيها سير كده بتاخده من عندنا، السير ده بياخد الكيس يلحمه

العميل:  لأ إيه الفرق بين الـ 2 بس السعر، عشان الماديات عندي مش عالية عشان أبقى صريح مع حضرتك أكتر

المهندس منسي:  هوه النص أتوماتيك سعرها ، والأتوماتيك سعرها

العميل:  كام؟

المهندس منسي:  سعرها يبدأ من

العميل:  يعني حوالي كام مصري؟ حضرتك منين أصلاً معلش مكان حضرتك فين؟

المهندس منسي:  في القاهرة

العميل:  فين في القاهرة معلش، أنا من دمنهور البحيرة

المهندس منسي:  إحنا عندنا حدائق القبة، مدينة نصر، باب الشعرية، 6 أكتوبر

العميل:  يعني المكنة آجي أدفع الفلوس وأستلمها من عند حضرتك يعني

المهندس منسي:  آه بضاعة حاضرة

العميل:  طيب يعني مثلاً 4500 يعني في حدود كام مصر؟

المهندس منسي:  يعني لو قلنا دلوقتي حوالي 17… إحنا بناخد منك بالمصري عادي…

العميل:  أنا فاهم بتاخد بالمصري أكيد مش هنعرف نجيبلك دلوقتي.. حضرتك بتتكلم مثلاً في حدود حاجة و 80 ألف

المهندس منسي:  آه

العميل: طب دي مافيهاش ممكن أدفع جزء وأكمل جزء ولا كاش على بعض

المهندس منسي:   لا هوه كل شغلنا كاش

العميل:  شغل حضرتك كله كاش

المهندس منسي:  آه

العميل:  والمكنة ليها صيانة عند حضرتك، يعني لو في مشكلة عندي بتبعتلي حد ولا إيه الدنيا؟

المهندس منسي:  إحنا شركة كبيرة وماركة، ولينا فروعنا

العميل:  أنا والله ما أعرف، مش بغلط أنا آسف جداً لو حضرتك فهمتني غلط…

المهندس منسي:  إحنا لينا اسمنا بره مصر

العميل:  أنا معلش أعذر جهلي معلش أنا ما أعرفش، أنا لسه جديد، أنا كنت شغال في شركة موظف والشركة صاحبها مش مصري وقفلت، ساب الشركة وقفل، وأنا معايا مبلغ بسيط فعايز أعمل أي مشروع آكل من وراه عيش، ده القصة كلها لا أكتر ولا أقل، فما أعرفش لسه بحاول كان في كذا فكرة فعايز أشوف أقرب فكرة للماديات اللي تحت إيدي، فمعلش أعذر جهلي لو أنا قلت أي حاجة غلط

المهندس منسي:   لا ولا يهمك يا غالي

العميل:  معلش يعني، فأنا عايز أفهم يعني المكنة دلوقتي اللي هي الأتوماتيك عشان السير والكلام ده واللحام بعد كده

المهندس منسي:   النص أتوماتيك عشان إنت لسه جديد في المجال مش فاهم، النص أتوماتيك أسهل ما يكن، أنا بقولك عشان الفايدة للعميل مش بدور على العميل هكسب منه إيه، أنا بدور على الفايدة، أوعى تقلق من أي حاجة في المكن عندنا إحنا بالذات… إحنا معاك لغاية ما تمسك أول الخط وتقول تمام يا جماعة الله يبارك لكم

العميل:  يعني أنا باجي آخد المكنة وأدفع فلوسها وتيجوا تركبوها لي عندي مثلاً؟

المهندس منسي:   بندربك مرتين .. مرة عندنا لغاية ما إنت تستوفي وتقول تمام، ومرة عندك

العميل:  طيب كويس قوي، طيب ممكن تبعتلي حضرتك العنوان

المهندس منسي:   كل الأماكن عندنا زي بعضها… إحنا عندنا حدائق القبة، مدينة نصر، باب الشعرية، 6 أكتوبر

العميل:  أيوه معلش أنا ما أعرفش أي حاجة في القاهرة، يعني فين في حدائق القبة مثلاً

المهندس منسي:   طب خلاص هبعتلك أي عنوان دلوقتي في رسالة حالاً

العميل:  طيب كويس قوي، أقرب عنوان يكون مثلاً قريب من رمسيس عشان مثلاً أركب القطر أنزل رمسيس آخد أي مترو أو حاجة بحيث أركب مترو لو في لكم قريب من رمسيس بحيث آخد المترو على طول

المهندس منسي:   إنت تيجي تنورني

العميل:  ربنا يخلي حضرتك

المهندس منسي:   ولو في أي حاجة ما تقلقش خالص يعني

العميل:  أنا مش قلقان الأرزاق على الله وربنا بيوقف للواحد ولاد الحلال أكيد يعني، أنا داخل عايز أعمل حاجة مشروع يعني.. وربنا كريم يعني، أكيد ربنا هيكرم يعني

المهندس منسي:   إن شاء الله… أنا متفائل خير وإن شاء الله خير

العميل:  ربنا يخلي حضرتك … طب حضرتك ما عندكش معلومة عن الأكياس والكلام ده، أنا لقيت الكراتين عرفت مكانها، حضرتك الأكياس ما عندكش معلومة فين؟ وأرخص مكان فين؟

المهندس منسي:   عندنا

العميل:  عند حضرتك؟ طيب كويس قوي.. كويس قوي… هاجي لحضرتك بقى وأستأذنك بس تبعتلي في رسالة العنوان وتقولي مواعيدكم من كام لكام وأيامكم إيه؟

المهندس منسي:   من 11-9 بالليل… طول أيام الأسبوع ماعدا يوم الجمعة أجازة

العميل:  ماشي ربنا يخلي حضرتك، مستني الرسالة

المهندس منسي:   ماشي

العميل:  شكراً يا فندم، شكراً