ماكينات تغليف فاكيوم نظام غرفتين ونظام غرفة واحدة من شركة المهندس منسي

العميل : السلام عليكم

المهندس منسي : السلام عليكم

العميل : عليكم السلام ورحمة الله وبركاته

المهندس منسي : اتفضل معاك

العميل : شركة المهندس منسي

المهندس منسي : أيوه

العميل : كنت بسأل على ماكينات الفاكيوم

المهندس منسي : آه

العميل : في غرفتين ولا غرفة واحدة؟

المهندس منسي : في الـ 2، الصوت مش واضح أنا مش سامع حاجة

العميل : طب كده كويس

المهندس منسي : هوه كل الناس أقولها الصوت مش واضح أول كلمة يقولها كده كويس وبعد كده برده الصوت وحش برده

العميل : طيب أعمل إيه تاني؟ طب سامعني كده.. ألو..

المهندس منسي : أيوه

العميل : سمعني كده يا فندم

المهندس منسي : أيوه اتفضل معاك ،أنا سامعك كويس

العميل : لا الصوت فيه طبلة كده زي ما يكون فيه طبلة الصوت مش واضح

المهندس منسي : أنا قاعد في المكتب مافيش طبلة ولا حاجة ،ماشي اتفضل

العميل : بسأل بس على مكنة الفاكيوم غرفتين

المهندس منسي : موجود

العميل : هوه اللي عند حضرتك صناعة إيه يا باش مهندس؟

المهندس منسي : دي ماركة.. براند، يعني إحنا بنصنع قطع الغيار بره مصر وبعدين بنجمعها

العميل : تمام… يعني بلد المنشأ ألماني هولندي إيطالي؟

المهندس منسي : لا إحنا مش بتاع الحاجات دي، إحنا مش تجار، الحاجات اللي يقولك بلد المنشأ دول تجار، إنما إحنا ماركة عالمية، ماركة على مستوى العالم، يعني النهاردة ينفع تقول لتوشيبا إنتم شركتكم إيه؟

العميل : لا طبعاً

المهندس منسي : إحنا نفس العملية، إحنا براند، ماركة

العميل : طب معلش هي المكنة اللي عند حضرتك غرفتين فيها كام باب لحام؟

المهندس منسي : 4

العميل : كل واحد مثلاً طوله أد إيه؟

المهندس منسي : والله ما سامع حاجة أنا عمال ألقط كلام، طب بص حضرتك شوف عدة تانية كلمني منها أو شوف الوضع إيه أنا مش سامع حاجة

العميل : طيب ماشي أنا هكلم حضرتك تاني ، السلام عليكم ،أيوه يا باش مهندس

كده كويس ولا

المهندس منسي : لا والله زي ما هوه ، بص عموماً هوه المكن بضاعة حاضرة تعالى شرفنا بالزيارة، أصل لما تاخد كل المعلومات في التليفون يبقى معناه إنك قاعد دلوقتي بدور على أي واحد يتكلم أفضل، أنا ما بعرفش أتكلم، إنت كده عايز تاجر مش عايز مصنع، المصنع معروف إن كلامه خشن

العميل : تمام….

المهندس منسي : التاجر كلامه ناعم وزي الفل ويقعد هيييييييييه وبيبع كلام، ما هو التاجر بيبيع إيه؟؟؟ ما هو بيبيع كلام، المكنة بتاعتي أبقى مديهاله مثلاً عشان يبيعها بـ 35 هوه يبيعها باسم الله ما شاء الله مكنة بنبيعها بـ 35 باعها بـ 125000

العميل : تمام عشان تاجر

المهندس منسي : آه قعد يقولك اتحاد أوروبي واتحاد ألماني واتحاد إيطالي، وقعد يجيبلهم علامات لدرجة إنه جبلهم علامة الـ سي إيه اللي هي علامة الاتحاد الأوروبي وجاب جنب علامة الاتحاد الأوروبي علم ألمانيا

العميل : معلش آخر سؤال كام فولت؟

المهندس منسي : كل شغلنا على 220 فولت إلا إذا لو العميل طلب غير كده

العميل : طب ماشي حضرتك موجود من إمتى لإمتى عشان لو كده هنجيلك؟

المهندس منسي : أنا هبعتلك دلوقتي تليفون المبيعات إنت تابع بقى معاهم، أنا استشاري بس

العميل : يعني مثلاً لو في حاجة ممكن نسأل عليها دلوقتي ده متاح ولا؟

المهندس منسي : آه متاح آه

العميل : طب ماشي ابعتلي رقمه وأنا هكلمه

المهندس منسي : ماشي يا غالي

العميل : ماشي يا فندم

المهندس منسي : ماشي

العميل : السلام عليكم