ماكينات لحام اكياس مستمر من شركة المهندس منسى

العميل: سلام عليكم

المهندس منسى: عليكم السلام ورحمة الله وبركاته

العميل: شركة المهندس منسي

المهندس منسى: أيوه

العميل: مع حضرتك عماد من شركة آي إس بي للصناعات الغذائية

المهندس منسى: أهلاً بيك

العميل: أهلاً بحضرتك، بسأل حضرتك على مكنة لحام أكياس تعبئة، أنا بعبي منتج بتاعي مع البنات وبعدين عايز ألحمه في كيس عرضه 45، كيس لوو شفاف عرضه 45،بالنسبة للحام حضرتك، حضرتك معايا أستاذ مين؟

المهندس منسى: المهندس منسي معاك

العميل: إزي حضرتك

المهندس منسى: الحمد لله

العميل: أنا عايز اللحام هوه اللحام يكون لحام، هل ينفع أجيب 2 لحام في المرة الواحدة بحيث إنه الـ 2 لحام يبقوا قريبين من بعض، هل في حاجة زي كده؟

المهندس منسى: هوه في حاجة تانية أحسن من كده، في حاجة لحام عريض 1.5 سم كونتنيوس، يعني مستمر، يعني كل اللي عليك إنك تحطيلها الكيس وهي تاخد الكيس وتلحمه وتوديه الناحية التانية، فهنا وفرتلك عامل

العميل: أنا مش هلحمه فاضي

المهندس منسى: آه هتلحمه مليان

العميل: آه

المهندس منسى: ما هي معاها سير، السير ده بيشيل الكيس

العميل: يعني عرض اللحام أد إيه؟

المهندس منسى: 1.50 سم، هوه إنت بتعمل شكاير ولا بتعمل إيه؟

العميل: حضرتك أنا بعبي معجنات اللي هي الكرواسوه والباتيهات في كيس كبير عرضه 45، فبعبي المنتج بتاعي بالعدد أو بالكيلو، وبعدين العامل اللي واقف بيلحم بقى بعد ما يعبي

المهندس منسى: آه…

العميل: فأنا كنت شفت حاجة على النت كده بالقدم عندكم هي دي اللي بتتكلم عنها ولا دي حاجة تانية؟

المهندس منسى: في بالقدم، ولكن التانية اللي هي المستمر أحسن من اللي بالقدم، أنا بقولك على الحاجة اللي هتساعدك

العميل: التانية دي مستمرة، طب هي شكلها إيه؟

المهندس منسى: حضرتك بقى تشرفنا بالزيارة اتفرج على شكلها واتفرج على شغلها

العميل: آه… طب فيديوهات طيب ولا حاجة أشوفها؟ يعني…

المهندس منسى: في فيديوهات آه في

العميل: طب حضرتك ممكن تبعتلي حاجة واتس ولا على الإيميل

المهندس منسى: ابعتلي على الواتس وأنا هبعتلك

العميل: على نفس الرقم ده عليه واتس

المهندس منسى: أصل مش محتاجة، ده مكنة صغيرة، مش مكنة نقعد نبعت بالواتس فإنت تشرفنا بالزيارة أدي المكنة بكام أهي خد فلوسها سلام عليكم

العميل: آه… آه… أنا أقصد مش عليا، لو عليا أنا آجي، أنا شغال في شركة وفي رئيس مجلس إدارة وكده يعني، فأنا حتى اعرفه تبقى عامله كام المكنة؟

المهندس منسى: يعني 2000 جنيه مصري، والسعر ده لآخر الشهر ده لأنه ال عمال يغلى

العميل: تمام… واللي هي بالقدم؟

المهندس منسى: نفس السعر… ما هو إنت ما شفت حاجة، ما إنت لو شفت هتعرف إن اللي أنا بقولك عليه هوه الصح، تعالى اتفرج على بضاعتك عشان خاطر، وصورها واعمل كل حاجة، عشان خاطر تقدر تحط… إنت كده قاعد عرضة للي يتكلم أحلى

العميل: أيوه… أيوه…

المهندس منسى: طالما إنت من بعيد وأنا من بعيد، فإنت بدور على اللي بيتكلم أحلى

العميل: لا… لا… دي حتة بتاعت حضرتك مش بتاعتي

المهندس منسى: افرض إن أنا راجل دلوقتي ضليتك، ما هو إنت لازم تيجي تشوف المكنة وتتأكد من كلامي وتتأكد من كل حاجة

العميل: أيوه… صح كلام حضرتك مضبوط

المهندس منسى: إنما لو قعدت إنت في البيت أو قعدت مكانك ومش عايز تيجيي وعمال مستني فيديوهات تجيلك ومستني حاجات من دي فإنت في الآخر عرضة للي هيتكلم أحسن أو اللي هيتعامل أحلى

العميل: صح

المهندس منسى: حرية الرأي راجعة لحضرتك في الأول والآخر

العميل: آه… آه… تمام يا فندم، تمام، بس هي سعرها مش هيتعدى الـ 2000 جنيه يعني؟

المهندس منسى: هتعدي إن شاء الله من أول الشهر الجاي

العميل: تمام… أنا هحاول آجي لحضرتك يا باشا

المهندس منسى: تيجي تنورني

العميل: هشوف بس هعرض المعلومة بس هعرضها عليه

المهندس منسى: ماشي يا غالي

العميل: ماشي يا فندم، اتشرفت بمعرفة حضرتك يا فندم

المهندس منسى: مع السلامة

العميل: الله يخليك، اتفضل يا باشا، مع السلامة