ماكينات نص اتوماتيك لتعبئة العسل من شركة المهندس منسى
العميل: السلام عليكم
المهندس منسى: عليكم السلام ورحمة الله وبركاته
العميل: باش مهندس منسي معايا حضرتك
المهندس منسى: أيوه
العميل: معلش آسفة على الإزعاج أنا كنت كلمت حضرتك قبل كده بخصوص عبوات تعبئة العسل أو ماكينة التعبئة
المهندس منسى: آه
العميل: أنا مش عارفه لغاية دلوقتي أنا كان نفسي أعبي العسل في عبوات جديدة بشكل زي عبوات اللي هي المياه المعدنية اللي بتبقى في الصيدلية
المهندس منسى: آه
العميل: تمام.. فأنا جيت كلمت الفرع اللي في أكتوبر قالي إحنا ما عندناش إلا المكن بس، والمكنة بـ 27000 جنيه تقريباً
المهندس منسى: المكنة اللي هي…
العميل: قالي نص أتوماتيك
المهندس منسى: آه نص أتوماتيك آه
العميل: طيب أنا دلوقتي هل في أماكن للتعبئة دي ولا بيبقى عندها المكن ده، ولا أنا لو جيبت مثلاً إنتم في الشركة هل شركة تعبئة ينفع تعبيلي الكمية اللي أنا عايزاها؟
المهندس منسى: لأ هوه إحنا بنبيع المكن بس
العميل: وهوه بالمبلغ اللي هوه قالهولي في أكتوبر صح؟
المهندس منسى: لأ في مكن أرخص من كده
العميل: يعني لو مكنة صغيرة لسه الموضوع مجرد بدء يعني، هتبقى مثلاً سعرها كام
المهندس منسى: لأ في مكنة أرخص من كده، هوه إنت هتعبي كام جرام؟
العميل: ممكن 25 أو 20
المهندس منسى: 25 جرام بس؟
العميل: آه
المهندس منسى: لا هوه فكر إنك هتعبي كيلو
العميل: آه
المهندس منسى: فإدالك أعلى مكنة، إدالك مكنة دبل وكيلو، يعني إدالك أعلى مكنة
العميل: تمام، طب اللي أنا بقول عليها لحضرتك دي تعملها كام تقريباً؟
المهندس منسى: بدور لك عليها أهو
العميل: طيب وحاجة تاني، عند حضرتك برده شايفه في الإعلانات في الويب سايد البرطامنات بتاعت العسل ده البلاستيك
المهندس منسى: آه
العميل: دي متوفرة عند حضرتك؟
المهندس منسى: دي بنصنعها بالطلب على حسب العميل ما بيطلب
العميل: وأقل كمية للتصنيع أد إيه؟
المهندس منسى: لأ النظرية مش أقل كمية، أي كمية، ولكن بنفذ عبوة خاصة بالعميل
العميل: أسعار العبوات تقريباً يعني الربع كيلو أو النص كيلو أياً كان شكله
المهندس منسى: صدقيني مش متذكر، لأنه العبوات كتير قوي، فمبقاش متذكر قوي أسعار العبوات
العميل: طب هل في عند حضرتك موديلز أو كده؟
المهندس منسى: ما هو أنا بقول لحضرتك إنت اللي بتجيبي الموديلز وإحنا بنعملك عليه اسطمبة، بتجيبي أي رسمة وتقولي أنا عايزه أنفذ رسمة زي دي، أو لو ماعندكيش رسمة بتقولي اعملولي إنتم رسمة وأنا أختارها
العميل: تمام فهمت حضرتك
المهندس منسى: على أساس إن منتجك ما حدش يضربه في السوق، يبقى بتاعك إنت لوحدك
العميل: فهمت آه، ما هو أنا بصراحة نفسي أعمل حاجة جديدة فعلاً
المهندس منسى: إن شاء الله
العميل: بصي هوه في مكنة بـ ، أحسبهالك بالضبط بالمصري
1200 × 18 حوالي 21600
المهندس منسى: طيب ما فرقتش كتير قوي عن الـ 27
العميل: أنا قصدي مافيش صغير مكن تجربة
المهندس منسى: أصل إنتي عسل، بتعبي عسل، فالعسل ده مادة لزجة، من السوائل اللزجة مادة عنيدة يعني
العميل: آه
المهندس منسى: فكنت أتمنى إني أساعد حضرتك، أما في طريقة تانية بقى ممكن تجربي إنما أنا مش متأكد من النتيجة،ممكن تجربي إنك تجيبي زي بستلة ألومنيا مثلاً وتسخني العسل يبقى سائل، لما يتسخن يبقى سائل يبقى عامل زي المياه، وتاخدي مكنة اسمها ديسك توب تجربي بيها
العميل: مش فاهمه برده
المهندس منسى: في مكنة عندنا اسمها ديسك توب، مكنة صغيرة قوي، رقمها عندنا 451
العميل: آه
المهندس منسى: دي سعرها رخيص قوي، هشوفلك سعرها أهوت
العميل: مع حضرتك
المهندس منسى: سعرها 430 ، لأ المفروض تبقى أرخص من كده، في حدود ، نبقى نعدل السعر ده،فدي المكنة ديت سعرها رخيص يعني 300 × 18 = 5400 جنيه،بس هنا بقى لازم تعملي إيه؟؟؟ لازم تسخني العسل، وإنت كده كده بتسخنه العسل عشان الترميل
العميل: لازم أسخنه، طب ما التسخين ده غلط، يعني…
المهندس منسى: مين اللي قال كده،لا.. لا.. ده لازم يتسخن العسل، يبقى إنت بتشتري العسل جاهز
العميل: آه عسل جاهز جاي من المنحل
المهندس منسى: لأ قوليله إنتم بتسخنه ولا ما بتسخنوش، لازم بصي لازم يسخنه، ويبيته 24 ساعة في حمام سخن، اسألي المنحل كده قوليله في مهندس قالي إنكم لازم بتسخنه العسل، إنتم بتسخنوا صحيح وبطلعوا الشهد من عليه، في حاجة اسمها شهد
العميل: آه
المهندس منسى: الشهد ده بيقشطوا الشهد اسمه شهد العسل، بيروحوا عاملين إيه؟؟ بيروحوا عاملين حمام حسب ما إنت عايزه متر أو مترين حمام سخن، الحمام ده وظيفته إن هوه يسخن العسل ليه بقى؟
العميل: ليه؟؟
المهندس منسى: بصي يا سيتي، لما تيجي في الشتاء تلاقي العسل مرمل عامل زي الرمل كده، شكله كده عامل زي السمنة
العميل: اللي هي بلورة العسل
المهندس منسى: أيوه عشان يمنع حاجة اسمها الترميلة، ليه؟؟ لأن العميل العربي عموماً ما بيحبش العسل اللي شكله مرمل
العميل: ده كده على فكرة بيفقد قيمته، أنا عندي على فكرة عسل متبلور كده زي حضرتك ما بتقول وسايباه ومفهمه العميل عندي إن ده مش صح
المهندس منسى: أيوه ده اللي المفروض تعملي، لأنه الصح إنه يكون مرمل، لأنه لو مش مرمل ما يبقاش عسل أساساً،لأن ده طبيعته إنه يكون درجة حرارته باردة، ومش كل أنواع العسل
العميل: مش كل الناس بقى بتفهم كده
المهندس منسى: لا أنا بفهمهم، أنا عامله جروب على الواتس فهمناهم إن الموضوع ده طبيعي، وإن أنا لو عملت غير كده وسيحته يبقى كده يفقد قيمته…
العميل: جروب على الواتس دوت بحس كده يعني مين اللي هيجري معاكي ويقعد مستني… إنما أنا أقصد إنك لو عملتي…
المهندس منسى: أنا التسويق بطيء مش عالي، بس أنا حاولت على أد ما أقدر إن يكون القيمة الغذائية واصله صح، لأن العسل هوه علاج فعلاً،عبال ما توصلي المعلومة أنا النهاردة لما يجيلي حد يقولي تشتري عسل أروح عامل بلوك في ثانية واخدة بالك،إنما أنا لما أحتاج عسل وأخش هلاقي جروبات على الإنترنت اللي عايز يخش يخش، واللي عايز… مش هيقدر يعملي بلوك
العميل: فتسويق الواتس ده أنا ما بحبوش
المهندس منسى: أنا في تخيلي بقى إنه حتى لو العسل متبلور جوه الباكت بتاعت الريكة ديت أو بتاعت المياه المعدنية مش هيحسوا بيه
العميل: آه…
المهندس منسى: يعني مش هيحسوا بيه خالص، هياخدوا لأن هي هتبقى جوه مثلاً
العميل: يعني هحاول أفكر الجرعة أو جرعتين تبقى جوه العبوة مثلاً، فمش هتحس بيه
المهندس منسى: هوه عموماً نسبة كبيرة جداً جداً جداً من الناس اللي همه… أنا مش عايز أقول نسبة عشان ما تتحسبش عليا، إنما نسبة كبيرة جداً من الناس اللي بتعمل العسل بيعملوا في أحواض
العميل: آه
المهندس منسى: يعني أنا كنت بعملهم الأحواض ديت على أساس إن هوه لازم يسخن عشان خاطر ما يرملش لأنه لو رمل العميل ما بيحبوش
العميل: مش هيتباع آه
المهندس منسى: زي عندنا يقولك إيه؟؟ إديني العيش الفينو، العيش الأبيض، يا عم العيش الأسود أنظف من العيش الأبيض، يقولك يا عم العيش الأبيض شكله حلو، ده حتى باين على شكله
العميل: أيوه
المهندس منسى: ما إن العيش اللي هوه البلدي العادي ده عيش في قيمة غذائية عالية
العميل: صح آه
المهندس منسى: ومع ذلك العميل بتاعنا المصري دايماً كل حاجة عنده عكس عكاس
العميل: آه همه ليهم رؤية، بس إحنا بنحاول على أد ما نقدر إن إحنا نعرفهم آه،والنهاردة ما حدش بسمع نصيحة، لما تيجي تنصحيه يقولك إمممم اطلع من دول يا برنس
العميل: والله نسب بطيئة… بس أنا مش بمل يعني
المهندس منسى: في ناس بتفهم، بس نسبتهم قليلة جداً، وفي الآخر يروح داخل على طبق الفول يقعد يدعس في طبق الفول، يا ابني ما هو طبق الفول ده غلط، فول ومقشور، كل الفول ماشي، بس كله مقشور، لأن القشر دوت بياخد وقت كبير جداً في المعدة، فيسحب الدم فبيخليك ما بتعرفش تفكر كويس، كله ولكن كله مقشور، يعني قشره الأول وبعد كده اطبخه،يقولك لا ده الفول يخلي الواحد يصمد
العميل: حضرتك عندك حق، بس إحنا بنحاول وإن شاء الله يبقى في خير، إن شاء الله واحدة واحدة، بس كده
المهندس منسى: إن شاء الله
العميل: طيب هوه حضرتك مقر حضرتك فين أصلاً؟
المهندس منسى: إحنا عندنا حدائق القبة، مدينة نصر، باب الشعرية، 6 أكتوبر
العميل: ما هو أنا سألت في 6 أكتوبر بالتليفون بس ما وصلتش لحاجة غير إن هوه قالي 27000 وخدت بعضي من قبل ما أروح وما روحتش بصراحة
المهندس منسى: أنا هقول لحضرتك على حاجة، لما تروحي المكان ده له فوائد عظيمة، يعني ممكن إنتي كده اعتمدي على أسلوب رجل المبيعات، فأسلوب رجل المبيعات بيختلف من شخص لآخر
العميل: طب قولي آجي لحضرتك في أي فرع وآجي لحضرتك
المهندس منسى: هوه أنا بالنسبة لي مش مبيعات أنا استشاري الشركة
العميل: تمام… طيب أروح لمين أو توجهني لمين؟
المهندس منسى: والله عادي اختاري الفرع اللي يعجبك وتوكلي على الله روحي وشوفي…
العميل: حضرتك قلت باب الشعرية
المهندس منسى: حدائق القبة، مدينة نصر، باب الشعرية، 6 أكتوبر
العميل: فين في مدينة نصر؟
المهندس منسى: هبعتلك الداتا بتاعته في رسالة
العميل: خلاص أوكيه تمام، ربنا ييسر أتوجه للمكان وإن شاء الله أوصل لحاجة بإذن الله، دعوات حضرتك بقى
المهندس منسى: ربنا ييسر لك الأمور
العميل: معلش سؤال أخير بقى حتة الشرينكات بتاعت الغطا اللي بيقفل الغطا بس مش البرطمان كله
المهندس منسى: آه عشان يمنع النمل، ويمنع العبث بالعبوة، ويأكد للعميل إن الحاجة دي ما حدش لمسها قبل كده
العميل: بالضبط
المهندس منسى: آه موجودة برده
العميل: بالمقاسات اللي أنا هعوزها مثلاً
المهندس منسى: آه بالمقاسات اللي حضرتك عايزها إن شاء الله
العميل: ماشي شكراً يا باش مهندس، مرسي لحضرتك، شكراً
المهندس منسى: السلام عليكم
العميل: مع السلامة
