ماكينة تعبئة السكر من شركة المهندس منسي
العميل: السلام عليكم
المهندس منسي: عليكم السلام ورحمة الله وبركاته
العميل: إزيك يا باش مهندس عامل إيه؟
المهندس منسي: الحمد لله، مين؟
العميل: معاك نور الدين يا فندم من أسيوط
المهندس منسي: أهلاً بيك
العميل: أهلاً بيك يا باش مهندس، كنا عايزين نسأل على أسعار المكن بتاع التعبئة والتغليف دي عامله كام؟ تعبئة السكر مكن آلي؟
المهندس منسي: آه.. الأتوماتيك الكاملة؟
العميل: آه.. إحنا مش عايزين نص… قولي النص أتوماتيك عامله كام والأتوماتيك الكاملة عامله كام؟
المهندس منسي: النص آلي وزنية عامله 16000، يعني
العميل: يعني هي بتغلف وتعبي وكده؟
المهندس منسي: لأ هي جنبها سير إنت بتروح معبي.. المكنة تعبيلك وبعد ما تعبيلك تحط الكيس على السير بتاع اللحام ده يقوم السير واخد الكيس لاحمه وموديه الناحية التانية
العميل: وليها وزن ولا إنت بتوزن
المهندس منسي: لأ ليها وزن تدريجي براحتك من 100 جرام ـ لغاية كيلو
العميل: طب دي عامله كام دي؟
المهندس منسي: دي عامله يعني 16000 جنيه مصري
العميل: طب تمام، طب والأتوماتيك الكاملة؟
المهندس منسي: بتعمل يعني 96000 جنيه مصري
العميل: تمام.. العنوان بتاعكم زي ما هوه في فيصل ولا فين؟
المهندس منسي: لأ إحنا عندنا حدائق القبة، مدينة نصر، باب الشعرية، 6 أكتوبر
العميل: أنا نازل إن شاء الله عندك في المعرض، أجيلك المقر الرئيسي بتاعك فين بالضبط؟
المهندس منسي: أنا هبعتلك العنوان في رسالة دلوقتي حالاً
العميل: ابعتهولي في رسالة الله يبارك لك
المهندس منسي: إحنا كل الفروع زي بعضها، ما عندناش مكان رئيسي، همه كلهم يعتبروا رؤساء
أنا عايز أقابلك إنت شخصياً يا باش مهندس عايز أقعد معاك شويه يعني
المهندس منسي: إنت تشرفني مقابلتك، بس هيبقى إنت لما تتعامل مع حد من المبيعات أحسن ما تتعامل معايا عشان المبيعات هيستضيفك وهيروقك ويفرجك…
العميل: الله يبارك فيك، طب بالنسبة يا باش مهندس لو فيه صيانة وكده يعني بينزل مندوب من عندكم…
المهندس منسي: يا باشا إنت بتتعامل مع ماركة وبراند عالمي
العميل: تمام…
المهندس منسي: مش بتتعامل مع واحد جايب مكنتين وبيتسبب فيهم
العميل: أنا عارف والله، أنا عارف الشركة وبسم الله ما شاء الله يعني اسم مسمع
المهندس منسي: الحمد لله بفضل من ربنا
العميل: اللهم آمين يا رب
المهندس منسي: إحنا مش شركة محلية، إحنا شركة عالمية لينا اسمنا، وبعدين إحنا شركة مساهمة مش شركة فردية
العميل: والله يا باش مهندس أنا أقصد من سؤالي إني لو حصل عندي عطل لا قدر الله وأنا عندي مصنع…
المهندس منسي: لازم هيجيلك ناس وعندنا قطع الغيار مستمرة، وعندنا كل حاجة، لأنه الديزاين من عندنا والتصميمات من عندنا، فلازم هيجيلك ناس يتابعوا العملية ويعملوا لك كل حاجة
العميل: طب يا باش مهندس بالنسبة للآلي كاملة إيه إمكانياتها يعني؟
المهندس منسي: آه… من 100 جرام لغاية 1000 جرام يعني كيلو
العميل: تمام…
المهندس منسي: تعبي معاك كل أنواع المواد الغذائية الجافة
العميل: الحبوب
المهندس منسي: الحبوب.. والملح… والسكر.. والمكرونة.. والرز.. البسلة.. فاصوليا.. لوبيا.. عدس
العميل: تشتغل على أي أكياس ولا أكياس معينة
المهندس منسي: إن شاء الله كل أنواع الخامات اللي اللامينيد تمشي معاها
العميل: الله يبارك لك، ماشي يا باش مهندس، جزاك الله خير
المهندس منسي: ماشي..
العميل: وابعتلي العنوان بس في رسالة الله يبارك لك
المهندس منسي: إن شاء الله
العميل: ماشي يا باش مهندس
المهندس منسي: مع السلامة
