ماكينة تعبئة الصابون السايل من شركة المهندس منسي

العميل: سلام عليكم

المهندس منسي: عليكم السلام ورحمة الله وبركاته

العميل: باش مهندس منسي

المهندس منسي: أيوه

العميل: والله أحب آخد فكرة عن خط إنتاج الصابون السايل دوت والتعبئة

المهندس منسي: آه…

العميل: تديني فكرة حضرتك بالأسعار الحالية خط متوسط كده، والمساحة اللي ممكن المكان يستوعبها يعني

المهندس منسي: آه.. إنت عايز حاجة نص أتوماتيك ولا أتوماتيك

العميل: والله كبداية مش عارف إنت تنصحني بإيه، أنا جديد في الموضوع خالص وماعنديش أي فكرة عشان كده بكلم حضرتك بكل صراحة…

المهندس منسي: إنت هعتبي في أكياس ولا في عبوات؟

العميل: الـ 2 برده حضرتك

المهندس منسي: آه…  طب ماهوه كده الموضوع كبير قوي، أنا هتكلم في النص أتوماتيك، وهتكلم في الخلاط، وهتكلم في الخلط، وهتكلم في الأكياس، وهتكلم في العبوات، تخيل بقى إن أنا أقعد أسح في الحاجات ديت 5 حاجات

العميل: حاجات كتير

المهندس منسي: هوه يستحسن حضرتك تيجي تشرفنا بزيارة وتقعد مع أي فرد من أفراد المبيعات وهوه يشرحلك كل حاجة

العميل: طيب سؤال مختصر حضرتك

المهندس منسي: لو حضرتك محدد الهدف مثلاً وبقولي عايز مكنة كذا كنت هقولك عليها على طول

العميل: ما هوه حضرتك أنا جديد في الموضوع يعني لسه داخل جديد

المهندس منسي: لا ولا حاجة عادي يا عم عادي.. عادي، مفيش مشكلة، هوه كل العملية ان هاخد وقت اشرح كل داا

العميل: أنا أقصد المساحة عندي هنا

المهندس منسي: لا المساحة عادي ممكن 20 متر عادي شغال، هوه كل العملية إنت في الأول خالص إنت محتاج مكسر، خلاط

العميل: نعم.. نعم

المهندس منسي: وبعد كده مكنة التعبئة هي اللي هتفرق، في مكنة نص أتوماتيك، وفي مكنة أتوماتيك

العميل: آه…

المهندس منسي: المكنة النص أتوماتيك في منها 1 نزل ومنها 2 نزل ومنها 4 نزل، وفي بقى مكنة غلق الأغطية، في مكنة الليبول

العميل: نعم….

في بقى لو إنت هتشتغل أكياس هيبقى في برده مكنة نص أتوماتيك وفي مكنة أتوماتيك

العميل: آه…. يعني مش خط الإنتاج الكامل

المهندس منسي: آه… المكنة النص أتوماتيك اللي تعبيلك صابون سائل هي نفسها اللي بتعبي في أكياس هي نفسها اللي بتعبي في عبوات

العميل: آه… يعني هي نفسها اللي في الأتوماتيك برده

المهندس منسي: لأ.. مكنة النص أتوماتيك اللي بتعبي في عبوات هي نفسها مكنة النص أتوماتيك اللي بتعبي في أكياس

العميل: في أكياس.. كلام جميل قوي

المهندس منسي: آه… وهي نفسها اللي بتركب على المكنة بتاعت تعبئة الأكياس أتوماتيك، وهي نفسها برده بتركب على خط التعبئة الأتوماتيك

العميل: تمام….

المهندس منسي: المكن عندنا شويه في مرونة، يعني إنت خدت النهاردة مثلاً خط نص أتوماتيك وجيت بعد كده قولتلي أنا عايزه يبقى أتوماتيك، أخيلهولك أتوماتيك

العميل: آه…

المهندس منسي: لأن إحنا اللي مصنعين المكن، وإحنا اللي عارفين الناس عندنا كلهم بيبدأوا صغيرين ويكبروا

العميل: كلام سليم جداً

المهندس منسي: فإحنا فاهمين الموضوع فبنبدأ معاهم نص أتوماتيك وبعد كده يقولك لأ أنا عايز أخلي الموضوع أتوماتيك كامل، أقوله حاضر وأروح عاملهوله

العميل: جزاك الله كل خير، بس أنا شايف عندكم على اليوتيوب إن الميكسارات 25 لتر بس حجمها

المهندس منسي: إزاي بقى إحنا عندنا الـ 25 لتر، و50 لتر، و100، و200، و300، و500، و1000، بس هوه الحظ لما جيت حضرتك دورت لقيت ده بس اللي قدامك …  لأ لو دخلت على صفحة الميكسارات عندنا هتلاقي إحنا بنعمل حوالي 6 أصناف من الميكسارات

العميل: آه… أولها 25 وآخرها…

المهندس منسي: آه أولها 25 واحد مثلاً معندوش المساحة ومعندوش الإمكانيات ومعندوش فلوس ومعندوش أي حاجة، وعايز يعمل خلطة في البيت عنده كده في المطبخ ولا في الحمام، عايز يستغل الحمام يعمل الشغلانه دي فيه

العميل: لا أنا عندي المكان بالنسبة للكلام ده حضرتك كنا عاملينه كنا مجهزينه لمعمل جبنة كده عندنا تحت العمارة يعني… حوالي 120 متر

المهندس منسي: بص صلي على النبي ما هوه مش كل الناس معاها إمكانيات، في دكتور مثلاً عاوز يعمل مثلاً خلطة للصيدلية بتاعته

العميل: آه…

المهندس منسي: واخد بالك في مهندس زراعي عايز يعمل خلطة يجربها مثلاً للدواجن أو المواشي، في ناس كتير عايزه تعمل مشروع صغنون متناهي متناهي الصغر، في واحد عايز يعمل مشروع صغنون قوي في بيته يعمل شويه شامبو يعبيهم وينزل يسوقهم عبال ما ربنا ييسرله ويجمعه فلوس يبدأ يعمل مشروعه

العميل: تمام… طب حضرتك بالنسبة للميكسارات عشان إحنا نشترك في حاجة مع بعض فيها، إحنا بالنسبة لميكسارات الجبنة هي تقريباً نفس اللي إنتم بتعملوه، بس هل اللي عندك إنت ماتوره سريع ولا بطيء؟

المهندس منسي: هوه عادي إنت تعمله إنفرتر بحيث إنك إنت تقدر تتحكم في الماتور تخليه سريع أو بطيء، براحتك

العميل: آه.. ما أنا عارف إحنا في الأجبان في واحد 3000 لفة، وفي واحد إيربوكس بمشي كده بطيء علشان اللبن ما يمسكش يعني

المهندس منسي: آه… بص يا سيدي صلي على النبي

العميل: عليه الصلاة والسلام

المهندس منسي: اللي إحنا بنعمله بنعمله لفات سريعة ومعاه جهاز مش إيربوكس، معاه جهاز اسمه انفرتر، جهاز الإنفرتر ده معناه لو عايز تشغله سريع تشغله، عايز تشغله متوسط تشغله، عايز تشغله بطيء تشغله

العميل: يعني ده راكب على الماتور نفسه؟

المهندس منسي: لأ بيجي مع الماتور، يعني بيجي جنبه

العميل: مع الماتور آه

المهندس منسي: يعني باسلمك الإنفرتر بقولك الإنفرتر أهوه تركبه ده بيتحكملك في إيه، يعني هوه دلوقتي مثلاً الماتور اللي عندك البطيء اللي إنت بتخليه يقلب اللبن عشان اللبن ما يخثرش

العميل: نعم..

المهندس منسي: وفي ماتور عندك ماتور سريع عشان خاطر يخلطلك الخميرة على اللبن علشان خاطر تبقى زبادي

العميل: مضبوط…

المهندس منسي: ففي بقى نوع تاني إن إحنا نعمل إيه إن إحنا نجيب الماتور يشتغل على كل الاتجاهات

العميل: أيوه بمعنى؟؟؟

المهندس منسي: يعني يشتغل بطيء وسريع وشمال ويمين

العميل: أيوه…

المهندس منسي: وممكن كمان أخيلهولك يشتغل شمال كذا لفة وبعد كده يرد يمين كذا لفة، وبعد كده يشتغل بطيء، وبعد كده يشتغل سريع، يعني ممكن أعملك دايرة كمان إن هوه يقعد يعمل عدد من العمليات مع نفسه من ما إنت تتحكم فيه

مضبوط.. عشان نعمل تجانس كويس

المهندس منسي: آه.. كل الحاجات دي بتتطلب مننا

العميل: نعم.. نعم، عشان كده تبقى حركة التجانس معاه سليمة

المهندس منسي: أيوه

العميل: آه… اتفضل

المهندس منسي: معاك يا غالي معاك اتفضل.. اتفضل

العميل: يعني أنا عايز المكنة الأتوماتيك وأنا عندي 2 ميكسر كل واحد 750 لتر، يصلح بس دابل جاك اللي عندي عشان بتوع لبن

المهندس منسي: آه يصلح آه

العميل: يصلح يعني نركب عليهم الماكينة الأتوماتيك ولا النص أتوماتيك

المهندس منسي: اللي هوه، الاتنين مش فارقة

العميل: الاتنين يمشي حالهم

المهندس منسي: آه..

العميل: طيب الماكينة دي الأتوماتيك عامله كام يا باش مهندس؟

المهندس منسي: المكنة الأتوماتيك اللي هتعبي في عبوات ولا في أكياس؟

العميل: الاتنين إنت قولتلي بتعبي أكياس وفي عبوات

المهندس منسي: لأ دي بقى نص أتوماتيك

العميل: النص أتوماتيك هي اللي بتشترك في الاتنين

المهندس منسي: أيوه بس، إنما الأتوماتيك لأ، الأتوماتيك بتاعت العبوات لوحدها، وبتاعت الأكياس لوحدها

العميل: آه… يبقى كده التكلفة كتير يبقى مش هتنفع… طب النص أتوماتيك بيبقالها سير ناقل؟

المهندس منسي: عادي سير ناقل لوحده

العميل: لوحده يعني

المهندس منسي: آه

العميل: آه.. دي عامله كام اللي هي النص

المهندس منسي: النص أتوماتيك على اللتر بتعمل اللي هي بتعبي لغاية لتر، يعني من 50 مللي لغاية لتر دي بتعمل يعني 10000 جنيه مصري

العميل: طيب… اللهم صلي على رسول الله، طب الأتوماتيك بقى حضرتك

المهندس منسي: الأتوماتيك بتبقى في 1 نزل و2 نزل و4 نزل

العميل: اللي هي الـ 4…

المهندس منسي: ما أنا جاي لحضرتك أهوه، الأتوماتيك اللي بترميلك طن ونص في الساعة تعمل… لا يا ربي اللي ترميلك 3 طن في الساعة بتعمل 7000

العميل: يعني 70000 جنيه يعني .. دي كده إحنا بنتكلم في العبوات

المهندس منسي: في العبوات آه…  آه.. والأتوماتيك اللي بترميلك 6000 لتر في الساعة تعمل

العميل: دي برده أكياس وعبوات ولا عبوات

المهندس منسي: عبوات آه.. أما بالنسبة للأكياس الأتوماتيك الكاملة بتعمل ، يعني 45000 جنيه

العميل:  اللي هي الأكياس

المهندس منسي: آه اللي بتعبي في أكياس آه

العميل:  أنا على العموم كاتب العنوان بجوار مدرسة البنات الثانوية، إن شاء الله نتشرف بمعرفة حضرتك…

المهندس منسي: هوه إحنا خلف رئاسة حي باب الشعرية، أول شارع المنسي، 1 ش المنسي، هبعتلك العنوان في رسالة

العميل:  أنا كاتبه العنوان أهوه، شركة المنسي للصناعات الهندسية أمام مدرسة البنات الثانوية شارع المنسي خلف قسم باب الشعرية

المهندس منسي: لأ القسم نقلوه، القسم اتنقل إحنا ما اتنقلناش..

العميل:  القسم اتنقل؟؟ هنوصل هنوصل بإذن الله … طب إحنا دلوقتي كتصنيع ما عندناش أي فكرة يا باش مهندس؟

المهندس منسي: يا عم أنا هكون في ظهرك لغاية ما تقف على رجلك

العميل:  الله يرضى عليك، ربنا يجعلها معرفة خير إن شاء الله

المهندس منسي: ماشي يا باشا

العميل:  ماشي يا باش مهندس.. شكراً

المهندس منسي: هوه حضرتك منين؟

العميل:  أنا من الزقازيق جنبك هنا

المهندس منسي: أهلاً بيك ماشي يا غالي

العميل:  بيعوز كهرباء أد إيه حضرتك؟

المهندس منسي: كهرباء عادية 220

العميل:  عندنا 3 فاز برده

المهندس منسي: عادي لو عايز تحولها 3 فاز مفيش مشكلة

العميل:  هي تبقى أرخص في الفلوس؟

المهندس منسي: لا.. لا ولكن هي أردي شغاله على كهرباء البيوت العادية

العميل:  عادي يعني، طب على بركة الله، ربنا ييسر الأمر.. شكراً جزيلاً

المهندس منسي: مع السلامة

العميل:  آسفين للإطالة وآسفين

المهندس منسي: لا ولا يهمك

العميل:  اتفضل