ماكينة تعبئة النيتروجين السائل في عبوات نصف أوتوماتيك من شركة المهندس منسي
العميل : السلام عليكم
مهندس منسي : عليكم السلام ورحمة الله وبركاته
العميل : باش مهندس
مهندس منسي : أهلاً بيك
العميل : معاك محمود عبد العزيز ومروان لو إنت فاكر بتوع إسكندرية إحنا بتوع الشيبس كيك وقلتلنا مكنة نتيروجين ….
مهندس منسي : آه مضبوط آه، آه اتفضل
العميل : هوه الباش مهندس منسي معايا ولا مدير الفرع؟
مهندس منسي : آه معاك المهندس منسي آه
العميل : إزي حضرتك يا باش مهندس
مهندس منسي : الحمد لله
العميل : بص يا فندم إحنا جينا أول إمبارح كان حضرتك في اجتماع وتأخرت، فقعدنا مع مدير الفرع فقلنا دي مكنة النيتروجين وورها لنا بخرطوم شفاف كده تمام
مهندس منسي : آه
العميل : قال لازم تيجبولي نيتروجين عشان أجرب لكم
مهندس منسي : آه
العميل : فإحنا لفينا لفتنا ووصلنا للي عنده نيتروجين، وإحنا موجودين عنده دلوقتي بالمنتج، فالطبيعي بقى النيتروجين سائل ولا غاز؟
مهندس منسي : سائل
العميل : يعني المكنة اللي عند حضرتك المفترض إنها بتاخد النيتروجين من الاسطوانة ولا فيها نفسها
مهندس منسي : لأ عادي ممكن تاخده من اسطوانة وممكن تاخده من إناء عادي.. العميل : من خزان
مهندس منسي : هي بتشتغل على الـ 2 السائل والغاز، بس الأفضل بالنسبة لنا السائل
العميل : بس هي بتاخد من التنك بتاع …. طب الباش مهندس عبد الله أهوت ممكن تفهمه موضوع المكنة اللي عند حضرتك تقوله دي بتشتغل إزاي عشان الصورة تبقى أوضح؟
مهندس منسي : ماشي اتفضل
العميل : السلام عليكم يا باش مهندس
مهندس منسي : عليكم السلام ورحمة الله وبركاته إزيك يا غالي
العميل : اتشرفنا بمعرفة حضرتك
مهندس منسي : الله يبارك لك ده أنا اللي ليا شرف، حضرتك شركة غازات سايلة ولا شركة إيه؟
العميل : إحنا شركة مصر للغازات الصناعية، عندنا التنك بنعبي للناس في الأماكن بتاعتها، يعني إحنا بنروح للناس في الأماكن بتاعتها نعبي لها
مهندس منسي : آه… طب المشكلة في إيه؟
العميل : التنكات الصغيرة بتبقى كام لتر؟ 50 ولا كام؟
مهندس منسي : يعني مثلاً لنفترض إن واحد بيحط نيتروجين مثلاً في العجل، أو الناس اللي بيعبوه مع الآيس كريم
العميل : مع الآيس كريم إحنا شغالين مع المحلات اللي زي كده
مهندس منسي : هوه بتاعنا هوه بتاع الآيس كريم
العميل : يعني في عند حضرتك تنك بيعبيهولك الراجل وتشتغل منه يعني
مهندس منسي : هوه مش عندي، عند العملاء، هوه ياريت حضرتك ترن عليا بعد المكالمة عشان أسجل… لأنه كتير قوي بييجوا يقولوا نشتريها منين
العميل : طب خلاص ماشي أنا هرن على حضرتك بس… الله المستعان، يعني اللي عند حضرتك زي بتاع الآيس كريم؟
مهندس منسي : أيوه
العميل : بس خلاص، الله المستعان
مهندس منسي : ماشي يا غالي
العميل : معاك أهوه يا باش مهندس
العميل : أيوه يا باش مهندس
مهندس منسي : أيوه.. هوه نفس بتاع الآيس كريم
العميل : طب أنا المفترض دلوقتي أحط أد إيه على المنتج اللي معايا؟
مهندس منسي : + 10%، يعني المفترض دلوقتي تحسب اللي فاضي أد إيه كميته وبعد كده تضيف عليه 10 أو 20%
العميل : يعني أكتر من الفاضي صح؟
مهندس منسي : أيوه، يعني العبوة بتاعت حضرتك….
العميل : الحيز اللي فاضي عندي في الجار فيه مثلاً 50 مللي
مهندس منسي : آه… تحط مثلاً 50 مللي + 10%، يعني إحنا لما نيجي نقول العبوة مثلاً ألف مللي، فحضرتك دلوقتي تعبي ألف مللي مرة هتعبيها ألف مللي، مرة ألف و10، مرة ألف إلا 10
العميل : بالضبط
مهندس منسي : فدايماً بتحسب على الأقل مش على الأكتر
العميل : مضبوط الكلام
مهندس منسي : وتضيف 10% زيادة، يعني مثلاً اللي باقي عندنا دلوقتي 7 مللي، يبقى نقول 7.7 يعني 8 مللي، 7 + 10%
العميل : طيب المكنة اللي عند حضرتك المفترض إنك بتديها الكمية اللي إنت عايزها وهي بتحطها لك
مهندس منسي : آه إنت تكتب عليها، يعني المكنة فيها عداد، العداد دوت بيتحددلها على حسب اللي إنت حددته هي تاخد وترميهم لك في العبوة
العميل : تمام.. تمام…
مهندس منسي : فالـ 10% الزيادة دول بتلاقيهم طايرين من فوق دول، فإنت بتروح حاطط الغطا بيها
العميل : تمام…
مهندس منسي : لأنه هوه بيتضغط، هو سهل الضغط عموماً، لما تضغط بيتضغط معاك
العميل : هوه الفكرة إن أنا عندي دلوقتي ، عارف إنت برطمان المربى لما تيجي تفتحه كده بيعمل تك صح
مهندس منسي : آه تويست أوف
العميل : أنا عندي الجار فيه نفس الفكرة بتاع التك دي، هوه أنا لما أحط سائل وهوه هيتبخر هيطلع بخار وأقفل على طول، البخار ده لو قفلت عليه هيضغط الجار؟
مهندس منسي : هيضغط ضغطة خفيفة ما تقلقش مش تقيلة ولا حاجة
العميل : آه بحيث إن أنا لما آجي أفتح يقولي التكه دي يعملها؟
مهندس منسي : أيوه هيعمل التكه دي ده رقم واحد، رقم 2 أول ما تفتح كده هتلاقي في شويه بخار كده طلعه الأول، البخار ده عبارة عن نتيروجين
العميل : تمام.. تمام…
مهندس منسي : واخد بالك، ده حتى يدي أمان للعميل
العميل : آه بالضبط
مهندس منسي : آه العميل هيحس بأمان قدام في فكر جديد، في حد مأمن المنتج بتاعه، فده يزرع فيه الثقة يعني
العميل : طب بص أنا موجود دلوقتي في العاشر من رمضان مع الباش مهندس، وبنجرب المواضيع دي أستأذنك لو احتجناك في أي معلومة هتصل عليك أرجوك… معلش هتقل عليك يعني لحد ما نوصل لـ….
مهندس منسي : هوه بس خلي يرن عليا عشان في ناس كتير زي حضرتك.. ده يعني إنت عارف الفكر الجديد ده…
العميل : أيوه بس أنا صاحب السبق وصاحب مشوار العاشر حضرتك تديني بقى تضبطني يعني، آخد الجهاز اللي عندك بنص السعر، أنا جبتلك الناس بتوع النيتروجين
مهندس منسي : المفروض إن أنا اللي آخد جايزة عالمية على الموضوع ده
العميل : أنا تحت أمرك يا باشا
مهندس منسي : ماشي يا باشا
العميل : شكراً لذوقك، الله يكرمك، السلام عليكم
مهندس منسي : عليكم السلام ورحمة الله وبركاته
