ماكينة تعبئة نص أتوماتيك موديل 403 من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
العميل: إزي حضرتك يا فندم
المهندس منسي: الحمد لله
العميل: شركة المهندس منسي
المهندس منسي: أيوه معاك اتفضل
العميل: أنا كنت بسأل على المكنة إم تو باك 403، مكنة التعبئة النص أتوماتيك، دي بتشتغل كهربا ولا لأ
المهندس منسي: كهربا آه
العميل: كهربا، مش هوا يعني؟
المهندس منسي: لأ ما هوه هوا واللي بيتحكم في الهوا الكهربا
العميل: أيوه ما أنا فاهم مفهاش كهربا على طول
المهندس منسي: هي بتعتمد على الهوا بالضغط، والضغط بتاعها عشان تطلعلك جودة عالية جداً من الدقة في السوايل
العميل: طيب أنا صاحب شركة معطرات ، فعايز مكنة بالمواصفة دي
المهندس منسي: أنا تحت أمرك
العميل: أولاً دي الكابستي بتاعها يا باش مهندس إيه؟
المهندس منسي: دي في مقاسات منها في لغاية 100 مللي، من 1-100 مللي، وفي من 5-250 مللي، وفي من 25-500 مللي، وفي من 50-1000مللي، وفي بقى لغاية 5 لتر
العميل: خلينا في هي من 50-1000
المهندس منسي: آه…
العميل: أنا أقصى وزن عندي ألف، النزل عامل كام بقى عندكم؟
المهندس منسي: يعمل في حدود
العميل: كامله يا فندم بالكمبروسر ولا من غيره؟
المهندس منسي: لأ الكمبروسر لوحده
العميل: الكمبروسر عامل كام؟
المهندس منسي: لا ده مش عندي، حضرتك المفروض إنك عندك مصنع فبالتأكيد عندك كمبروسر
العميل: أوكيه ماشي مافيش مشكلة، الكمبروسر المواصفة بتاعت الكمبروسر اللي بيشغل المكنة دي
المهندس منسي: ولا أي حاجة عادي، مافيش مشكلة، 100 لتر يشغلها، 200 لتر يبقى عفي عليها، 300 لتر يبقى يعني تقيل جداً عليها، إنما عادي لو 100 لتر هيشغلها عادي
العميل: طيب معلومة معلش حضرتك، أنا بوصل التنك، يعني هي بتاخد من التنك صح؟
المهندس منسي: آه… بترمي الخرطوم بتاعها في التنك وهي بتسحب لوحدها، فيها نظام فتحة، مش محتاجة تحضير، يعني لو التنك بتاع التغذية فوق عادي تشفط من تحت وتطلعلك فوق عادي
العميل: طيب معلش أنا هتقل على حضرتك تاني
المهندس منسي: اتفضل
العميل: دي بتعبيلي كام إزازة لتر في الدقيقة؟
المهندس منسي: بيبقى على حسب كفاءة العامل، لأن منها 1 نزل وفي منها 2 نزل وفي منها 4 نزل
الـ 2 نزل بكام، والواحد نزل بكام؟
المهندس منسي: الـ 2 نزل بتعمل في حدود
العميل: طيب خلينا في الألف نزل لإن إحنا لسه في التصوير النزل الواحد ممكن معقول بالنسبة لنا…طيب أستأذن حضرتك التعبئة بقى، كل أد إيه المكنة بتضرب تعبئة
المهندس منسي: هي عندها صلاحية إنها تنزلك 2000 عبوة في الساعة أو 6000 عبوة في الساعة، بس إحنا بنتكلم في إيه بقى، بنتكلم في مهارة اللي واقف عليها، هوه ده اللي هيحددها
العميل: خلي بالك أنا بتكلم في واحد نزل
المهندس منسي: آه أصل هي نظام إندكشن يعني نظام إيه شفط وطرد، فده بيتحدد على السائل، والسائل له رغوة ولا مالوش، والعامل اللي واقف نايم ولا شغال، وكده يعني
العميل: العمال عندي مدربين على التعبئة اليدوية
المهندس منسي: بص صلي على النبي، كون إن حد يقولك كذا في الساعة يبقى ده غلط، لأنه إنتى بتعتمد على أول حاجة على لزوجة السائل، تاني حاجة قوة دفع السائل…
العميل: السائل مياه
المهندس منسي: هتجيبلك 2000 في الساعة
العميل: تمام… بالنسبة لتركيب المكنة وكده يعني والصيانة وقطع الغيار؟
المهندس منسي: بنركبهالك عندنا وبنجربهالك وبنصورهالك فيديو وإزاي تشغيل وإزاي صيانة تكون سريعة وكل حاجة عندنا، وبعدين بنعيد تاني نفس العملية عندكم، بنركبهالك ونعيد تشغيلها ونعملك الصيانات اللي هي إيه الحاجات اللي ممكن تحتاج صيانة ده كل ده بتسجيل فيديو، حد بيسجلك فيديو وبيديلك اسطوانة هنا واسطوانة هناك
تمام.. تمام… مافيهاش فنيات كتير؟
المهندس منسي: كل المكن بتاعنا بسيط التعامل، بنحاول نسهل أسلوب التشغيل، ما بنعقربهاش على أساس الدنيا تشتغل
العميل: تمام.. تمام.. تمام، على بركة الله، طيب أقدر إمتى آجي أتفرج على المكنة دي؟
المهندس منسي: روح في أي وقت
العميل: يعني أقدر آجي إمتى النهاردة
المهندس منسي: حضرتك تروح دايماً من 11-9 ماعدا يوم الجمعة
العميل: طيب تمام.. تمام، إحنا كده شبه متفقين
المهندس منسي: أنا تحت الأمر
العميل: يعني السعر بقى يبقى نهائي كام إن شاء الله
المهندس منسي: لا هوه السعر مش قدامي أنا بقولك في حدود، إنما السعر إحنا شغالين برايز، إحنا شركة إنترناشيونال مش محل، يعني ملتزمين كلنا بقائمة أسعار، كل الفروع ملتزمة بقائمة أسعار ما يقدروش يتعدوها، مش بنعتمد على الشطارة والفهلوة يعني
العميل: تمام.. تمام…
المهندس منسي: وبعدين إنت هتشوف المكنة حاجة محترمة قوي هتنبسط منها قوي يعني
العميل: طب في فيس بوك مثلاً أخش أشوف المكنة بتشتغل إزاي
المهندس منسي: والله فيس بوك إحنا ما بنحترموش أساساً حاجة كده…
العميل: ولا إحنا بنحترمه
المهندس منسي: ممكن على المواقع بتاعت الشركة، إحنا لينا مواقع زينا زي الفيس بالضبط، إنما أخش على الفيس أهرتل مع مين؟؟؟!!!
العميل: لأ عشان بس أنا أشوف الفيديو …
المهندس منسي: ما هو أنا فاهم حضرتك… ماشي على عيني وعلى راسي، عندي مواقع خش اكتب المهندس منسي هيطلعلك المواقع بتاعتنا، ابدأ خش المواقع بتاعتنا، إنما عيب لما أروح أخش على الفيس وأقعد أحط حاجات بحس إنها حاجة كده ما تنفعش مع شركة يعني
العميل: والله على فكرة أغلب الشركات ليها يعني ليها مواقع على الفيس دلوقتي
المهندس منسي: ما هي الشركات الضعيفة، إنما الشركة القوية بيبقالها موقعها، إنما الشركة الواحد اللي عايز يسترزق يادوب يعمله صفحة على الفيس واتعشت على كده، إنما الشركات القوية بيبقى ليها موقعها، آه النهاردة بره لما بيجوا يتعامله مع الشركة ببصوا مدى قوة الموقع بتاعه على النت أد إيه، ومدى قدم الموقع، إنما إحنا عندنا كبيره قوي يادوب وصلنا للفيس واتعشت
العميل: تمام.. أكيد طبعاً، والله الثقافة المصرية كده يعني
المهندس منسي: تمام
العميل: طيب أنا أروح إن شاء الله باب الشعرية؟
المهندس منسي: ماشي
العميل: ولا آجي فين؟
المهندس منسي: إحنا عندنا حدائق القبة، مدينة نصر، باب الشعرية الفرع اللي يريح حضرتك روحه
العميل: طيب على بركة الله.. على بركة الله، ماشي يا فندم شاكر أفضالك يا فندم
المهندس منسي: مع السلامة، تحت أمرك، اكتب بس المهندس منسي هيطلعلك المواقع بتاعت الشركة كلها
العميل: أنا قدامي الإنفو أهوه، إنفو آت إنجنير منسي ده الإيميل صح؟
المهندس منسي: آه ده الميل آه
العميل: والويب هوه ده ولا اللي تحت
المهندس منسي: الـ 2 الموقعين شغالين
العميل: عليهم الفيديوهات يا فندم ولا لأ؟
المهندس منسي: اللي هوه إنجنير منسي دوت كوم هوه اللي عليه الفديوهات، إنت عندك إنجنير منسي ، خد إنجنير منسي كده خد وارميها وحط جنبيها دوت كوم هتلاقيه عليه فيديوهات
العميل: طيب شاكر يا فندم
المهندس منسي: أو إم تو باك هتلاقي في كلمة فوق كده إم تو باك دوت كوم هتلاقي فيه أيكونة صغيرة كده مكتوب لمشاهدة الفيديوهات، دوس على الأيكونة دي هيدخلك الموقع على طول
العميل: طيب شاكر جداً يا فندم
المهندس منسي: مع السلامة
العميل: هلاقي فيها الـ 403
المهندس منسي: آه.. آه متقسمة ومتضبطة ما تقلقش
العميل: ماشي يا فندم شكراً، متشكر لحضرتك يا فندم
المهندس منسي: العفو يا باشا مع السلامة
