ماكينة تعبئة وغلق فروت سلات من شركة المهندس منسي

العميل: سلام عليكم

المهندس منسي: عليكم السلام

العميل: باش مهندس منسي

المهندس منسي: أيوه

العميل: إزي حضرتك

المهندس منسي: الحمد لله

العميل: نبيل عاشور مع حضرتك كنت خدت رقمك من الكويت، كنا بعتنا على الفيس بوك حاجة زي كده

المهندس منسي: من الكويت

العميل: آه.. آه كنت خدت رقم حضرتك قلنا بس ندردش بس لما أنزل مصر

المهندس منسي: آه أنا تحت الأمر

العميل: أنا باين أزعجتك كنت نايم ولا حاجة أكلمك بعدين

المهندس منسي: لا ولا يهمك … حضرتك خدت رقمي منين

العميل: من على الفيس بوك مش حاطت حضرتك على الفيس بوك… بعتلك أنا على الواتس آب

المهندس منسي آه.. آه أهلاً وسهلاً

العميل: إزي حضرتك

المهندس منسي: الحمد لله

العميل: والله أنا شايف ليك صفحة جميلة يعني وفيها موضوع المكاين، حضرتك من القاهرة ولا من إسكندرية؟

المهندس منسي: من القاهرة

العميل: أحسن ناس، بس أنا للأسف من إسكندرية، باش مهندس أنا كنت عايز أستفسر منك على شويه حاجات، المكاين اللي عند حضرتك ديت  إنتاج دي صناعات فين؟

المهندس منسي: لأ دي صناعاتنا إحنا

العميل: عندك إنت يعني في مصر

المهندس منسي: لأ مش عندنا هنا، اللي بيحصل كالآتي، يعني إحنا متعودين اللي بيحصل في مصر ونجيب مكن من الصين ونيجي نبيعه هنا، يبقى ده اسمه مكن صيني، لأ إحنا بنعمل إيه بقى إحنا لينا فلسفة تانية واشتغلنا بطريقة تانية، إحنا كنا بنصنع هنا في مصر ولكن الجودة ما بتطلعش أد كده لأن الناس مش عايزه تشتغل ولو اشتغله يا ريتهم ما اشتغله، التكنولوجيا كانت عندنا ضعيفة

العميل: آه..

المهندس منسي: فبقينا نعمل نرسوماتنا ونصنع رسوماتنا وديزايناتنا دي في الصين أو تايوان أو هونج كونج أو مكاو أو الدول ديت، ونجيب القطع ديت ونكمل عليها هنا

العميل: آه بس مكاو مفيهاش صناعة ولا هونج كونج، هونج كونج لو حتى إنت اشتغلت في هونج كونج صناعتها عالية جداً جداً…

إحنا صناعتنا مختلفة

العميل: مكاو آبار كلها

المهندس منسي: ما أنا جاي لحضرتك، إحنا صناعتنا مختلفة، إنت بتتكلم على بضاعة تامة الإنتاج، إحنا مش تامة الإنتاج، إحنا بنعمل… إنت النهاردة ممكن تخش مصنع مثلاً المصنع ده هوه بس مفيهوش إلا  تي إن تي بس، أو برينيج تي إن تي، أو بلانو تي إن تي، فبنديلوا الرسومات هوه بيعملها لنا وبنجيبها وبنجيب مثلاً من هونج كونج مثلاً الأجهزة الإلكترونية مش بنصنع… فهمتني..

العميل: أصلنا عارف يا باش مهندس لفيفهم كده

المهندس منسي: بص صلي على النبي

العميل: عليه الصلاة والسلام

المهندس منسي: يعني إحنا دلوقتي لما نجيب من هونج كونج هنجيب إيه؟ هنجيب المايكرو كنترولر، المايكرو كنترولر اللي بنعمل بيها الـ بي إل تي بتاعنا، يعني ما بنجبش بي إل تي شنايجر وفلكس ولا حاجات من دي، لأ بي إل تي المهندس منسي عبارة عن إم تي يو مبني على المايكرو كنترولر

العميل: آه…

المهندس منسي: وإحنا مبرمجينوا بيطلع منه 6 أطراف، الـ 6 أطراف دول كل طرف له وظيفة.. كده يعني

العميل: عند حضرتك ماكينة تقشير التوم والبطاطس؟

المهندس منسي: لأ هوه اللي عندي ماكينة البطاطس بس ممكن تستخدم في مكنة تقشير التوم

العميل: بظن آه…

المهندس منسي: لكن إحنا ما جربنهاش، هي فكرة إيه المانع

العميل: طيب بص يا جميل، أنا عندي مناقصة، المناقصة دي عبارة عن إيه شفت علب الزبادي

المهندس منسي: آه

العميل: اللي هي سيلينج …. سيلينج ، فروت سلات متقطع سيلينج في عبوات بلاستيك زي عبوات الزبادي

المهندس منسي: آه.. آه عبوات الزبادي متقفله بالسيلينج باللحام، باللحام الحراري

العميل: بالضبط.. بالضبط آه، فدي عندك؟ عندك الماكينة دي لأني أنا عندي في اليوم مثلاً المفروض إن الكباستي بيكون…

المهندس منسي: طب ممكن نتكلم بقى مكنة مكنة، لأن إحنا دلقوتي داخلين على 3 مكنات

العميل: أول حاجة…  خلينا في السيلينج

المهندس منسي: آه السيلينج آه دي موجودة

العميل: الكباستي بتاعها أد إيه؟

المهندس منسي: اللي موجودة نص أتوماتيك، إنت عايز إيه عايز مكنة أتوماتيك ولا إيه؟

العميل: أنا عايز تقطع وتعبي

المهندس منسي: تقطع إيه بقى؟

العميل: تقطع السلات فود، الفواكه

المهندس منسي: هتعبيها في الكبيات؟

العميل: هتعبيها في الكوبيات آه، هبعتلك أنا الصور على الواتس آب من الرقم الكويتي

المهندس منسي: هوه يستحسن لو حضرتك بعتلي طلب استفسار على الإيميل

العميل: ما هوه حضرتك إنت عارف أنا دلوقتي في أجازة ماعنديش لا إيميل ولا عندي غيره، أنا عندي واتس آب دلوقتي

المهندس منسي: آه… وقت ما تخلص أجازتك براحتك

العميل: لا أنا مطول شويه، مهو عشان كده حبيت أفهم الدنيا ماشيه معاك إزاي

المهندس منسي: ما هوه أنا لغاية دلوقتي أنا مش فاهم من حضرتك أي حاجة، معلش أنا آسف يعني، يعني هنقشر بطاطس ولا هنقشر توم، ولا هنقطع…. إحنا كده دخلنا في 4 مكنات

العميل: يا سيدي كأني ما طلبتش منك أي حاجة، أنا بكلمك دلوقتي في الفروت سلات

المهندس منسي: آه..

العميل: عايز مكنة تقطع الفروت سلات … تقطع الفواكه وتعبيها تعملها سيلينج

المهندس منسي: آه.. ماشي، توكلنا على الله

العميل: الكباستي بتاعت الماشين اللي عندك أد إيه؟

المهندس منسي: يعني بتعمل 32 ضربة، لو إنت هتاخد 2 كوباية يعني معناها 64 كوباية في الساعة

64 كوباية في الساعة

العميل: آه

المهندس منسي: تاخد 4 كوباية بقى، شوف إنت الطاقة الإنتاجية اللي إنت عايزها أد إيه وأنا أقولك اللي تناسبك إيه

العميل: أنا عندي 100 ألف حباية في اليوم

المهندس منسي: نقسم 100 ألف على 10 ولا 8 ساعات، الوردية عندك 8 ولا 24 ساعة

العميل: 7 ساعات

المهندس منسي: 7 نقسم الـ 100 ألف على… إنت عايز 100 ألف كوباية؟

العميل: بالضبط

المهندس منسي: نقسم 100 ألف كوباية ÷ 7 يبقى 14285 قول 14، يبقى إنت محتاج حاجة تنزلك 14

العميل: تمام..

المهندس منسي: حاجة من الاتنين يتاخد.. دقيقة واحدة 14 ÷ 64 يتاخد مكنتين أو 3 مكينات من اللي هي 2 كوباية، يا إما تاخد مكنة واحدة 6 كوباية، يستحسن لو أخدت 3 ماكينات 2 كوباية

العميل:  3ماكينات، عشان لا قدر الله لا قدر الله في أي مشكلة يبقى عندك باك أب

المهندس منسي: لا هوه مكنة الحمد لله مفهوش مشاكل، مكنا الحمد لله دي ماركة عالمية، مش واحد بيروح يجيب مكنتين 3 من الصين ويسترزق فيهم، إحنا ماركة عالمية، لينا فرعنا في هونج كونج، لينا فرعنا في الصين، في كوانزو، لينا في مصر 7 فروع وطالعين 2 قريب، ولينا….

العميل:  ربنا يزيدك

المهندس منسي: فإحنا إن شاء الله عملية الأعطال ديت تكاد تكون زيرو، إحنا بنحاول بقدر الإمكان إنها تكون زيرو، بس اللي هوه العميل بس مش مساعدنا بثقافته الصناعية، واخد بالك

العميل:  للأسف… للأسف

المهندس منسي: فهي العملية إحنا بنبسطها يعني، أنا دلوقتي بقول لحضرتك إيه هوه لقيت إن تبسيط الشيء هوه اللي بيقلل من صيانته ومشاكله، عشان كده بقول لحضرتك يستحسن لو أخد 3 مكنات 2 كوباية، لسبب بسيط لأنه العامل اللي عندك غير مدرب، غير مؤهل العمل من بابه، واخد بال حضرتك

العميل:  آه..

المهندس منسي: فكل ما بسطله المكنة كل ما اتعامل معها، كل ما عرف يتعامل معها، كل ما عقدتله المكنة وكلكعتهاله كل ما هوه جابلك مشاكل كتير

العميل:  تمام سعادتك، طيب أنا هبعت لحضرتك الإيميل، ممكن تديني الإنفرميشن كامل…

المهندس منسي: بص حضرتك ابعت طلب استفسار على الإيميل، وبعدين مش لازم تبعت إيميل ولا حاجة هوه المكنة العميل:  عندنا اسمها 701 ماركة المهندس منسي

العميل:  تمام…

المهندس منسي: ابحث في جوجل 701…

العميل:  مش ممكن تبلغ السكرتيرة تبعتلنا إنفرميشن لو بعتلك الإيميل بتاعي دلوقتي

المهندس منسي: لأ ابعتلي طلب استفسار على الإيميل نفسه، أما إن إنت تبعت الرسالة فأنا هقفل ما حضرتك وهنسى على طول، في استفسارات كتيرة طول النهار

العميل:  آه.. أوكيه.. تمام خلاص ماشي خليني أكلم الجماعة في الكويت يبعتوا لحضرتك

المهندس منسي: ماشي يا غالي شرفت

العميل:  شكراً كلك ذوق شكراً ليك

المهندس منسي: مع السلامة

العميل:  مع السلامة