ماكينة تعبئة ولحام اتوماتيك ونص اتوماتيك من شركة المهندس منسى

العميل: السلام عليكم

المهندس منسى: عليكم السلام ورحمة الله وبركاته

العميل: شركة المهندس يا باشا للتعبئة والتغليف

المهندس منسى: أيوه

العميل: شركة المنسي

المهندس منسى: مضبوط آه

العميل: المكنة اللي بتعبي اللي بتلحم الأكياس لازم نوع أكياس معينة ولا أي أكياس

المهندس منسى: المكنة اللي بتعمل إيه؟

العميل: اللي بتلحم أكياس، أصل أنا شايف بتاعت إم تو باك اللي هي بتلحم وبتصنع أكياس، بتلحم أكياس بس صح؟

المهندس منسى: آه

العميل: لازم نوع أكياس معين ولا أي أكياس؟

المهندس منسى: كل أنواع الأكياس

العميل: زي مثلاً كيس الملح

المهندس منسى: تلحمه

العميل: وعند حضرتك مكن تعبئة ولحام ولا مكن لحام بس؟

المهندس منسى: كله تعبئة وتغليف ولحام

العميل: آه يعني حضرتك مشروع الملح أو مشروع بعبي مثلاً بهارات في عند حضرتك حاجة كده معلش؟

المهندس منسى: في آه

العميل: تعمل كام يا باشا؟

المهندس منسى: يعني 3600 جنيه

العميل: اللي هي مكنة إيه بقى؟

المهندس منسى: مكنة اللحام، اللي هوه السير بتاع اللحام، اللي هوه بتحطله الكيس ياخده يلحمه ويوديه الناحية التانية

العميل: دي أي كيس؟

المهندس منسى: أي كيس آه

العميل: النايلون أو العادية دي

المهندس منسى: كله

العميل: آه… بكام بـ 3600

المهندس منسى: إن شاء الله

العميل: طب حضرتك بالنسبة للي بتعبي

المهندس منسى: المكنة اللي بتعبي في مكنة نص أتوماتيك وفي مكنة أتوماتيك كاملة

العميل: آه تبدأ من كام معلش؟

المهندس منسى: النص أتوماتيك تعمل يعني 18000 جنيه

العميل: تجيب أكياس وتعبيها وخلاص

المهندس منسى: آه

العميل: ولا بتعمل أكياس

المهندس منسى: آه بتجيب أكياس وهي تعبيها، وبعد كده بعد ما تتعبى توديها على السير بتاع اللحام بيلحمها ووديها الناحية التانية

العميل: آه دي أنا بجيب الكيس متقطع مش رول زي الأتوماتيك؟

المهندس منسى: آه

العميل: دي اللي بتعبي البهارات؟

المهندس منسى: تعبي البهارات، وتعبي السكر، والملح، تعبي المكرونات، تعبي الحبيبات كلها بجميع أنواعها، تعبي البقوليات…

العميل: يعني بتعبي كل ده،وبتاع اللحام معاها برده ولا لوحده؟

المهندس منسى: مكنة اللحام لوحدها

العميل: كلها بكام حضرتك بـ 18؟

المهندس منسى: آه

العميل: آه… يعني ينفع تعبي السكر، والملح، وكل حاجة

المهندس منسى: آه

العميل: بس ما تنفعش للبهارات؟

المهندس منسى: نعم؟

العميل: تنفع للبهارات؟

المهندس منسى: تنفع للبهارات آه

العميل: طب إحنا نيجي نشوف فين يا باش مهندس؟

المهندس منسى: إحنا عندنا حدائق القبة، مدينة نصر، باب الشعرية، 6 أكتوبر

العميل: أنا من المنصورة

المهندس منسى: منين في المنصورة؟

العميل: من أجا

المهندس منسى: من أجا نفسها ولا قرية تبع أجا؟

العميل: قرية تبع أجا

المهندس منسى: منين بقى؟

العميل: من الديري

المهندس منسى: إنت تعرف طمنامل

العميل: آه عارف طمنامل

المهندس منسى: في بلد تحتيها كده اسمها ميت مسعود

العميل: عارفها

المهندس منسى: دي بلدنا، يعني أنا أساساً من هناك

العميل: حضرتك من هناك؟

المهندس منسى: آه أساساً آه

العميل: أهلاً وسهلاً ده ميت مسعود جنبنا، عارفها ليا أصحاب فيها كتير، همه مشهورين بالتريكو

المهندس منسى: بصنع التريكو آه

العميل: بس ناس طيبين كلهم والله

المهندس منسى: الله يبارك لك

العميل: يعني حضرتك من ميت مسعود ولا قاعد في القاهرة؟

المهندس منسى: لا هوه أنا أساساً من هناك، بس أنا جيت أخلص الجامعة هنا اتجوزت هنا وعيشت هنا

العميل: كويسة يعني ليا زمايلي فيها كتير، عاجباني كلهم شغالين يعني

المهندس منسى: استهلكت العمالة بتاعتها فبتجيب عمالة من بره

العميل: أيوه دي حقيقة مش ضحك يعني،يعني حضرتك هنيجي نشوف فين؟

المهندس منسى: إحنا عندنا حدائق القبة، مدينة نصر، باب الشعرية، 6 أكتوبر

العميل: آه… أي معرض من دولت…

المهندس منسى: أي معرض تيجي تشرفني فيه

العميل: الله يخليك يا باشا، اسم حضرتك إيه؟

المهندس منسى: المهندس منسي

العميل: أهلاً وسهلاً يا باش مهندس

المهندس منسى: أهلاً بيك

العميل: كل سنة وحضرتك طيب

المهندس منسى: كل سنة وحضرتك طيب

العميل: أنا حضرتك بجيب أكياس وألحم اللحام اليدوي اللي هي إم 100 أو 150 جنيه دي

المهندس منسى: دي بقى خلاص راحت عليها

العميل: آه فأنا عايز أكبر المشروع شويه عايز حاجة..

المهندس منسى: غير كده بيوفر لك عمالة

العميل: لا مش عمالة ده أنا على أدي، يعني أختي، والدتي، أخواتي بنجيب ونعمل على إدينا

المهندس منسى: دي هتسرع معاك جامد

العميل: يعني مكنة تكون معقولة يعني دي أجبلها أكياس تبقى مثلاً رول ولا أجيب متقطعة مثلاً

المهندس منسى: نعم؟

العميل: دي تاخد أكياس رول بلاستيك ولا…

المهندس منسى: لا ده الأتوماتيك اللي بيركب لها رول البلاستيك أما …

العميل: بتبدأ من كام الأتوماتيك يا باشا؟

المهندس منسى: من

العميل: آه غالية قوي،يعني مصري في حدود 70 ولا 60

المهندس منسى: آه

العميل: مش مضبوط كده ولا…

المهندس منسى: آه مضبوط آه

العميل: إنما النص أتوماتيك تبدأ من 18

المهندس منسى: إن شاء الله

العميل: دي بتحطلها أكياس متقطعة حضرتك وهي بتعبي، تاخد هي الجرامات بس

المهندس منسى: آه ده النص أتوماتيك، أما الأتوماتيك بتعمل كل حاجة لوحدها

العميل: آه أي نوع رول بيركب لها وهي تعمله

المهندس منسى: إن شاء الله

العميل: ماشي يا باش مهندس، متشكرين جداً لحضرتك

المهندس منسى: معلش آسفين جداً للإزعاج يعني

العميل: ولا يهمك

المهندس منسى: كل سنة وحضرتك طيب

العميل: ماشي يا باشا، مع السلامة