ماكينة تغليف الكتب من شركة المهندس منسي
العميل: سلام عليكم
المهندس منسي: عليكم السلام ورحمة الله وبركاته
العميل: بقول لحضرتك بخصوص مكنة التغليف الموجودة على النت
المهندس منسي: آه ما هو مكن التغليف أنواعه كتير، إنت عايز تغلف إيه؟
العميل: إحنا دار الشروق للطباعة والنشر في الهرم، لو تبعتلنا مندوب أوريله الكتب اللي عندي ونشوف نتعاون إزاي
المهندس منسي: آه هوه للأسف ما عندناش مناديب للأسف
العميل: طيب تحب نجيلك إحنا مثلاً إمتى
المهندس منسي: تيجي تنورني في أي وقت إحنا عندنا حدائق القبة، مدينة نصر، باب الشعرية
العميل: باب الشعرية يبقى أقرب لينا
المهندس منسي: هبعتلك العنوان في رسالة حالاً
العميل: طيب ممكن تمليهوني ولا على الموبايل
المهندس منسي: هبعتلك على الموبايل في رسالة حالاً
العميل: طيب ماشي لو في رقم أرضي تاني يبقى حلو
المهندس منسي: إن شاء الله
العميل: طيب ممكن تديني فكرة عن الأسعار طيب يا باش مهندس عشان لو هجيب معايا عربون ولا حاجة
المهندس منسي: هوه في مكن شرينك… ما أنا مش عارف هتغلف إيه؟
العميل: أنا دار نشر بنطبع كتب، فالكتاب بدل ما أحطه في كيس أحطه في كيس من اللي هوه بيلصق ده، واخد بالك
المهندس منسي: آه.. في مكنة بتبدأ من 3500….
العميل: تمام… دي بتعمل مقاس أد إيه؟
المهندس منسي: بتعمل ارتفاع 16 سم وعرض 26 سم والطول اللي إنت عايزه
العميل: طيب إديني العنوان برده وأنا آجي أتفرج عليها أحسن…
المهندس منسي: وفي حاجات تانية مقاسات تانية كتير
العميل: طيب أنا هجيلك وأجيب معايا عينات الكتب اللي إحنا بنعملها الـ 4 مقاسات، نجربهم ونشوف إن شاء الله ما نختلفش يعني إن شاء الله
المهندس منسي: إن شاء الله
العميل: بالنسبة للرولات والصيانة عند حضرتك؟
المهندس منسي: إن شاء الله
العميل: طيب الرولات اللي هي البلاستيك نفسها، وقطع الغيار والكلام ده كله عندك
المهندس منسي: إن شاء الله
العميل: طيب ابعتلي العنوان في رسالة، اسم الكريم إيه؟
المهندس منسي: المهندس منسي
العميل: يا باش مهندس منسي، أنا هقفل وأستنى منك الرسالة دلوقتي، والرسالة باسمك إنت بقى
طيب الحمد لله اتفضل يا فندم، مع السلامة
