ماكينة تغليف كرتونة العطور من شركة المهندس منسى
العميل: سلام عليكم
المهندس منسى: عليكم السلام ورحمة الله وبركاته
العميل: إزيك يا باشا
المهندس منسى: الله يخليك
العميل: أنا كنت كلمتك من إيمت يومين على تعملي تغليف عطور، كرتونة عطور
المهندس منسى: آه
العميل: إنت كنت قلتلي انها موجودة الراجل اللي هوه محتاجها هوه كفيلي في السعودية تمام
المهندس منسى: آه…
العميل: فإحنا عايزين آلة يدوية مش تكون ديجيتال ولا حاجة، لأ آلة يدوية تكون بسيطة يعني تغليف الكراتين بتاعت العطور
المهندس منسى: آه عايز آلة إيه…؟؟؟
العميل: نعم؟
المهندس منسى: عايز آلة يدوية تغلف العطور؟
العميل: آه تغليف الكرتون نفسه
المهندس منسى: آه مافيش مشكلة موجودة عامله
العميل: طب مش ممكن تبعتلي صور ليها
المهندس منسى: اتعب نفسك شويه وتعالى اتفرج عليها وصورها واعمل كل حاجة، إنت عايز تقضيها كلها كده…
العميل: حضرتك أنا من الشرقية، مش حكاية أتعب نفسي شويه أنا من الشرقية إنت لما هتبعتلي صورة أنا هاخد وقت لحد مأوصل للقاهرة
المهندس منسى: الراجل في السعودية كده مكلفك بأمانة لازم تقضيها على أكمل وجه يعني، تعالى وتشوف الناس وتشوف الشركة
العميل: يا باشا
المهندس منسى: ولا إنت عايز تقضيها مراسلات يعني
العميل: الدنيا كلها بتبيع بالمراسلات يا سيدي الفاضل، إنت مش عايش في الدنيا؟
المهندس منسى: نعم؟؟
العميل: بقولك الدنيا كلها بتبيع بالمراسلات
المهندس منسى: بس إنت جوه مصر هنا…
العميل: يعني لو هي عجبتني واتفقت هاجي أخودها مش هاجي أتفرج
المهندس منسى: ما هوه يا ابن الحلال إنت كده دلوقتي قاعد عرضة للي بيتكلم أحسن، مش للي بيقدم مكنة أحسن، يعني إنت قاعد دلوقتي عرضة للي هيتكلم معاك أحسن ده اللي هتروحله، فأنا عايزك تيجي تتعرف على المكنة ونتعرف عليك وتشوف المكنة عندنا وتنبسط كده، تعرف المشروعات الصناعية عندنا شكلها إيه، يعني إنت مش عايز تشرب معايا القهوة؟؟
العميل: يا باشا قهوة إيه بس، الله يصلحك الحال، أنا دلوقتي بقولك أنا من الشرقية حضرتك، وبسأل على المكنة ديت عشان أشوفها عشان لو عجبت الراجل أبعتهاله، قالي أوكيه آجي أخودها منك وأمشي، أنا مش جاي أتفرج ولا جاي.. أنا وسيط بينك وبينه، مش أنا اللي هفتح المشروع حضرتك
المهندس منسى: آه… ماشي يا غالي،أبعتلك إيه دلوقتي؟
العميل: ابعتلي صورة المكنة اللي حضرتك بتقول عليها ديت أنا هوريهاله قالي أوكيه هجيلك أنا أخدها منك على طول مش هطول معاك ولا أتفاوض معاك
المهندس منسى: إنت تيجي تنورني
العميل: الله يبارلك يا رب
المهندس منسى: هبعتلك حالاٌ
العميل: ماشي يا باشا
المهندس منسى: مع السلامة
العميل: سلام يا باشا
