ماكينة ديسك توب لتعبئة زيت الطعام من شركة المهندس منسي

العميل: السلام عليكم

المهندس منسي: عليكم السلام ورحمة الله وبركاته

العميل: إزيك حضرتك يا معالي الباشا

المهندس منسي: الحمد لله نحمد ربنا ونشكر فضله

العميل: الباش مهندس منسي معايا؟

المهندس منسي: أيوه

العميل: بعد إذن معاليك يا باشا معلش أنا راسلت حضرتك في وقت غير مناسب أولاً

المهندس منسي: خد راحتك

العميل: ثانياً كنت عايز أفتح مشروع بتاع تعبئة الزيت ده وكنت عايز أسأل حضرتك المكنة اللي بتعبي الزيوت دي عند حضرتك صح؟

المهندس منسي: آه عندنا مكن كتير قوي لتعبئة السوائل، اللي هي تعبئة الزيوت، في عندنا نص أتوماتيك، وفي عندنا أتوماتيك… في عندنا للأكياس، وفي عندنا للعبوات … النص أتوماتيك عموماً بعبي العبوات والأكياس

العميل:  تمام.. تمام

المهندس منسي:  أما الأتوماتيك بيبقى متصمم إما أكياس أو عبوات، فحضرتك هتعمل زيت الأكل، ولا زيت مستحضرات التجميل، ولا الزيت بتاع العناية الشخصية… أي نوع من الزيوت؟

العميل:  لا زيت الطعام يا فندم

المهندس منسي: ده هيبقى عبوات أكيد مش كده؟

العميل:  آه عبوات يا فندم آه … ده في منه نص  أتوماتيك وفي منه أتوماتيك كامل؟

المهندس منسي: في عندنا مكنة لو بتبدأ المشروع مش عارف سوقك إيه، ففي مكنة عاملنها كده ديسك توب بـ 250- مش متذكر السعر قوي

العميل:  آه.. دي مكنة بجرب عليها نفسي أول ما أبدأ المشروع يعني

المهندس منسي: ده لو إنت لسه مش متأكد من المشروع وعايز تجرب تعمل تيست كده على المشروع تشوف السوق عامل إيه

العميل:  تمام

المهندس منسي: لأنه إنت هتروح دلوقتي تعمل تسويق، فيقولك وريني منتجك مش مضبوط؟

العميل:  مضبوط يا فندم كلام حضرتك مضبوط تمام

المهندس منسي: فهتقوله أنا هنتج وأجيب وأودي، فهيقولك طب إنتج ووريني

العميل:  تمام.. تمام

المهندس منسي: فهنا بيعملوا إيه بقى؟؟؟ بياخده مكنة ديسك توب بسيطة يبدأ بيها وبعد ما يشتغل بيها يجرب السوق بيها يعني، الدنيا اتحركت معاه يبدأ يتحرك مع السوق ومنها هي نفسها بتجيب اللي فوقيها  على طول

العميل:  كده فهمت قصد حضرتك بالضبط… طب حضرتك بالنسبة للمادة الخام بتاعت الزيوت اللي أنا عايز أشتريها، حضرتك تعرف مصانع ممكن تديني الخامة دي؟

المهندس منسي:  هوه مش مصانع بقى، هوه بيبقى في مستوردين وفي شركات عامة بتبيع الحصص ديت بكميات، بس دي ما تطمعش إنك هتنزل في فرق سعر، وتلاقي الدنيا زغرايت مقابلاك وحاجات من دي، هي العملية بتبقى في الأول صعبة، ليه؟؟؟

إنت لو رحت سألت في شركة طنطا للزيوت والصابون، أو شركة الزيوت والصابون عموماً أو شركات الزيوت العامة هتلاقي فرق السعر قليل، هتقول الله أمال الناس دي بتكسب إيه؟؟؟

العميل:  تمام

المهندس منسي:  فهي بقى كل مهنة في جمهورية مصر العظيمة والجميلة هتلاقي لها دهاليز وزواريق كده لازم تخش جواها عشان خاطر تفهمها، لازم تتعبلك على الأقل خالص 6 أشهر عبال ما تبدأ تمسك قرش وتبدأ تتعلم المهنة وإلا ما كانش حد غلب، ماكنتش هتلاقي حد في الشارع

العميل:  تمام كلام حضرتك صح بنسبة 100% … طب حضرتك أنهو الأفضل الواحد ياخد من المستورد ولا من مصانع الزيوت؟

المهندس منسي:  ما هي دي بقى المهارة والمهنة، إن حضرتك هتتعامل هنا وهتتعامل هنا، هتتعب في الأول، يعني تجهز مبلغ تعتبر إنه مش خسائر، ده اسمه تعليم، النهاردة أهالينا صرفوا علينا أد إيه عبال ما يخلصوا لنا البكالريوس اللي ما كنش له لازمة؟؟!!!!

العميل:  بعد كده إحنا بنجيب اللي اتصرف وزيادة بإذن الله

المهندس منسي:  يعني أنا قعدت 18 سنة أتعلم لغاية ما خدت بكالريوس هندسة تخطيط عمراني، وبعد كده سافرت هندسة قعدت 3 سنين خدت بكالريوس ريفيرس إنجينرينج هوه ده اللي اشتغلت بيه

العميل:  إيه اللي خلاك تيجي يا ريس، ما كنت فضلت في ألمانيا؟

المهندس منسي:  والله حاولوا معايا بقدر الإمكان

العميل:  حد طايل يروح هناك يا ريس

المهندس منسي:  هقول لحضرتك على حاجة، ما هوه في ناس كده غاوية تتعب دماغها، أنا كنت من الناس اللي غاويه تتعب دماغها… هوه إنت مش أوقات تروح تجيب واحد من الريف يجي يقعد معاك في القاهرة شويه، وتبقى مقعده مثلاً في منطقة راقية زي هليوبوليس أو الزمالك أو حاجات من دي يقولك يا عم أنا مروح البلد، وحشتني البلد، يا عم بلدك إيه ما تقعد، يقولك لا لا وحشتني البلد يا عم

العميل:  كلامك صح يا باشا والله 100%

المهندس منسي:  هوه كده، الإنسان لو كان مكيف بمعادلات محسوبة ما كنش بقى بني آدم، بقى آلة، أو بقى كمبيوتر

العميل:  كلام حضرتك صح، كل واحد له سيستم دماغ معين

المهندس منسي:  تيجي تحسبها تلاقي مادة، صحة، سن، تناسق… لما تيجي تجمعهم كلهم كده يقولك لأ عايز حتة من هنا، على حتة من هنا على حتة من هنا تمشي العملية… عمرك ما تقدر تقنع واحد بفكر، كله عايز فكره هوه اللي مقضيه، عبارة عن مكونات من اللي هوه حصلها خد فكر معين واشتغل بيه

العميل:  إنت كلام حضرتك صح، طب يا ريس إيه أفضل مكان حبيت أجيب زيت؟

المهندس منسي:  والله يستحسن لو نزلت على رجلك، يعني إزاي؟؟؟ الأول هتتشك على مصادر بيع الزيوت بالجملة، طبعاً مش هتلاقيها على النت، لأن الشركات العامة مش هتعلن على النت، الشركات الخاصة بس اللي بتعلن على النت… فتبدأ تمسك السلسلة من أولها، الأول هتروح مثلاً تسأل في اتحاد الصناعات المصرية، تسأل اللي هوه غرفة المواد الغذائية

العميل:  تمام

المهندس منسي:  إيه الشركات اللي عندكم، همه قاعدين مخصصين لحاجة زي كده، إيه الشركات اللي عندكم اللي بيبيعوا زيت الطعام جملة؟؟…. هيقعدوا يقولولك بقى في زيت بذرة القطن، وفي زيت فول الصويا، وفي زيت.. وفي زيت.. وفي زيت… ادوني كل البيانات اللي عندكم، تبدأ تلقط الخيط من أوله، لقطنا الخيط من أوله ده هيديك معلومة وده هيديك معلومة… وإحنا شعب طيب، يعني لما هتروح لواحد هتقعد تدردش معاه بس ما تروحلوش في رمضان، تقفل السكة من أولها، هيبقى قاعد زهقان أساساً مش هيرضى يتكلم معاك

العميل:  طب إنت حضرتك تعرف شركة معينة باسمها كده ممكن أروح لها على طول

المهندس منسي:  والله لو كنت أعرف ما كنت اتأخرت عنك

العميل:  تمام يا باشا

المهندس منسي:  ولكن هوه في معاصر، وفي تكرير الزيوت

العميل:  آه دي فين يا فندم؟

المهندس منسي:  ممكن يكون في إسكندرية، في المنصورة، مش فاكر، ولكن دعبس إن شاء الله هتوصل

العميل:  والتسويق ده بقى بتاعتي، بشطارتي

المهندس منسي:  آه هوه إنت الأول بدور في المنطقة بتاعتك، ما لقتهاش متجاوبة، تبدأ تدور في بلاس تانية، في بلاس تالتة… اختار منطقتك، هل هتلاقي نفسك في الصعيد، هتلاقي نفسك في وجه بحري، هتلاقي نفسك في القاهرة..

تبدأ بقى تختار العبوة بتاعتك، تشكل عبوة صح، مش عارف إيه… هتلعب على الشكل، هتلعب على السعر، هتلعب على الجودة… هوه كل واحد بيتميز بحاجة

طب بالنسبة للعبوات البلاستيك اللي أنا هحط فيها الزيوت دي، إيه أفضل شركة…

المهندس منسي:  إحنا

العميل:  حضرتك هتديني المكنة والعبوات البلاستيكية

المهندس منسي:  آه.. آه.. إحنا عندنا برده عبوات

العميل:  تمام حلو قوي قوي… طب مكتب حضرتك فين يا أستاذ؟

المهندس منسي:  إحنا عندنا حدائق القبة، مدينة نصر، باب الشعرية، 6 أكتوبر.. وقريباً إن شاء الله في العبور

العميل:  طب عنوان بتاع مدينة نصر وحدائق القبة فين بالضبط

المهندس منسي:  هبعتهولك دلوقتي في رسالة حالاً

العميل:  تمام ماشي، ابعتهولي عشان إن شاء الله قريب جداً عشان كلام التليفون ما ينفعش هتلاقيني عند حضرتك

المهندس منسي:  آه المعاينة دايماً المعاينة على الطبيعة ديت دايماً أنا بنادي بيها

العميل:  آه يا باشا، كلام التليفونات ما يوديش ولا يجيب

المهندس منسي:  آه لو إنت هتقعد على التليفون يبقى إنت النهاردة مش بدور على المكنة الصح، إنت بتدور على اللي بيتكلم صح، اللي بيتكلم حلو

العميل:  تمام

المهندس منسي:  وإحنا للأسف إحنا ما بنعرفش نتكلم حلو، إحنا بنعرف ننتج حلو، إنما ما بنعرفش نتكلم حلو… يا باشا إحنا نيجي نشوف كل حاجة على الواقع، إحنا بنحب الواقع العملي نشوف المكاين حاطينه إزاي

المهندس منسي:  يبقى هتنجح، طالما إنك هتنزل وتلف وتتفرج على شركتي وشركة غيري وتدور وتدعبس يبقى إن شاء الله هتنجح

العميل:  تمام يا فندم، تمام، بس يا فندم المشروع ده حلو تنصحني بيه ولا…

المهندس منسي:  بص أي مشروع في جمهورية مصر العربية أرباحه حلوة وكويسة، لأنه إحنا متصنفين التالت على العالم في الاستثمار

العميل:  تمام

المهندس منسي:  فأي مشروع في جمهورية مصر العربية كويس، بس المهم إن إحنا نشتغل

العميل:  تمام يا فندم، تمام

المهندس منسي:  ومرحباً بك في عالم الصناعة

العميل:  ربنا يخليك يا ريس، حضرتك برده تبقى الخبرة بتاعتنا، مع العلم برده أنا أول مرة أكلم حضرتك في التليفون حضرتك تبقى ريسنا برده والخبرة بتاعتنا

المهندس منسي:  ده شرف كبير

العميل:  الله يخليك يا باشا ده شرف لينا إحنا يا ريس

المهندس منسي:  ربنا يبارك لك يا غالي

العميل:  حضرتك يا فندم ممكن أعمل على النت كده على الفيس…

المهندس منسي:  آه دعبس على النت كده ممكن يطلعلك حاجة تكرير الزيوت واخد بالك، بعد كده دور بكلمة مثلاً زيت بذرة القطن، زيت فول الصويا، امسك أول الطرف

العميل:  أنهو أفضل يا فندم زيت اللي ماشي في السوق؟

المهندس منسي:  أفضل حاجة؟

العميل:  آه

المهندس منسي:  أفضل حاجة زيت الذرة، وبعد كده عباد الشمس

العميل:  آه..

المهندس منسي:  وبعد كده بذرة القطن، وبعد كده أنتن حاجة أو أزبل حاجة هي فول الصويا بيستخدموا عشان ما بتتحرقش بسرعة

وفي بقى زيت الزيتون… زيوت كتيرة قوي

العميل:  ولكن أصعب زيت هوه زيت فول الصويا عشان نسبة الكلسترول فيه عالية، أسمع يعني ثقافة عامة كده أسمع

المهندس منسي:  هوه كلام صح هوه فول الصويا الكلسترول فيه عالي، بس فول الصويا مليء بالبروتينات والكالسيوم كده كده أساساً

لأ الفول نفسه مليء بالبروتينات، إنما الزيت بتاعه فيه بروتين؟؟ الزيت بتاعه مستخلص مافيهوش بروتين

مستخلص

العميل:  آه صح…بس الكلسترول بيفضل فيه

المهندس منسي:  البروتين في الفول الصويا نفسه، في الدول المتقدمة الفول الصويا بياكلوه، إحنا بقى بناكل الفول التاني، ما بناكلش الفول الصويا….إحنا بناكل الفول التاني، يعني في الصين بيعملوا من الفول الصويا لبن، يعني بيمسكوه ينقعوا في المياه، وبعدين يدخلوه على مكنة تحوله زي حاجة كده زي لبن، ويشربوه

العميل:  ناس بتفكر يا باشا

المهندس منسي:  فول الصويا بيشربوه، هنا قالك لأ أوعى تشربوا فول الصويا، يا جماعة ده غذاء نظيف وجميل، ولا حد… يا سيدي أهي ماشية

العميل:  حضرتك المكان إيه أنسب مكان مساحته أد إيه للمشروع ده؟

المهندس منسي:  كبداية مش شرط المكان، مكان مساحته 12 متر يشتغل

العميل:  حلو

المهندس منسي:  إنت مع نفسك تتوسع واحدة واحدة

العميل:  تمام..

المهندس منسي:  يعني هتلاقي نفسك محتاج مكان، تبدأ تاخد مكان أعلى، مكان أعلى، مكان أعلى… لغاية ما ربنا ييسر لك أمورك وتبقى من أكبر الشركات إن شاء الله

العميل:  إن شاء الله يا فندم بحس سعادتك وخبرة حضرتك معانا إن شاء الله لما نتقابل مع حضرتك بإذن الله تعالى هيبقى في معرفة أقوى إن شاء الله… حضرتك برده خبرتنا وكبيرنا برده وإحنا لسه في الأول

المهندس منسي:  الله يبارك لك يا غالي ده شرف كبير

العميل:  الله يخليك يا ريس، أنا عموماً اسمي فادي برده عشان لو اتصلت على حضرتك على طول، ورقم حضرتك هسجله معايا يا فندم وإن شاء الله هنكون على تواصل بحضرتك

المهندس منسي:  أنا هبعتلك تليفون المبيعات في رسالة هتابع معاهم لأن أنا ما ببقاش موجود في المكان، أنا الاستشاري بتاع الشركة

العميل:  تمام… ابعتلي العنوان يا فندم بتليفونات المبيعات، وفي نفس الوقت العنوان بالضبط عشان لما آجي لحضرتك

المهندس منسي:  إن شاء الله

العميل:  تسلم يا باشا، مع السلامة

المهندس منسي:  مع السلامة