ماكينة طباعة التاريخ علي الشكاير من شركة المهندس منسي

العميل : سلام عليكم

المهندس منسي : عليكم السلام ورحمة الله وبركاته

العميل : باش مهندس

المهندس منسي : أهلاً بيك

العميل : يا مرحب بحضرتك، حمادة المصري مع حضرتك

المهندس منسي : حمادة المصري؟

العميل : إن شاء الله كنا بنستفسر حضرتك عن طابعة، إحنا مطبعة، مكنة طباعة يعني

المهندس منسي : آه

العميل : تقوم بتغيير السعر على شيكارة الأسمنت، شيكارة الأسمنت اتكيست وتغلفت، اللي هي أم ورقة ليها زي ركبة اللي هوه الأرضية والعجلة يعني ربنا يسهل ليها حاجة ما يفضلش ورقة مستوية يعني

المهندس منسي : موجودة آه

العميل : موجودة المكنة دي؟

المهندس منسي : إن شاء الله

العميل : طيب عامله كام حضرتك؟

المهندس منسي : في حدود 300 جنيه مش فاكر

العميل : طيب اللي هي شغالة أحبار إيه؟

المهندس منسي : بتبقى أحبار زي أحبار السلك سكرين، هي أحبار سلك سكرين تعتبر لو إنت خففتها تشتغل بيها

العميل : آه.. آه.. طيب ممكن آجي أشوفها بكرة إن شاء الله حضرتك؟

المهندس منسي : ماشي يا غالي

العميل : طيب نفس العنوان ولا…

المهندس منسي : هي موجودة في الفرع بتاع 6 أكتوبر، ولكن هوه اللي ماسك في 6 أكتوبر مش هيعرف… ولكن كلمه قوله مكنة الطباعة اللي هي اللي بتتمسك في اليد وبنطبع بيها على الكراتين أو على الشكاير

العميل : آه.. آه.. أنا عايز دي بقى، طيب ماشي أوكيه مافيش مشكلة، أقدر أوصله إزاي

المهندس منسي : هبعتلك الداتا بتاعته في رسالة دلوقتي حالاً

العميل : طيب ماشي يا فندم، ابعتلي رقمه برده عشان أتواصل معاه

المهندس منسي : حاضر الأرقام بتاعته وتابع معاه

العميل : ماشي يا فندم ماشي.. شكراً جزيلاً.. ماشي.. طيب ممكن حضرتك تبعتلي صورة المكنة ديت أو تشرحلي مثلاً بتممسك إزاي

المهندس منسي : اللي هي إيه دي؟

العميل : اللي هي مكنة الطباعة اللي على الأكياس، المكنة اليدوي

المهندس منسي : مهما وصفتلك.. أنا ما بحبش أقعد أوصف كده، زي ما تكون مغمض واحد عينيه وبقوله إيه اللي في إيدي دي؟؟؟ هي المكنة اللي إنت عايزها هي المكنة دي، أنا عارف أنا بقول إيه، أنا مش هسوحك أونطا يعني

العميل : طيب ماشي عشان بس ما أنزلش المشوار على الفاضي…

المهندس منسي : لا.. لا.. لا.. تأكد تمام التأكد إن أنا صادق في الكلام، لو…

العميل : لا يا باش مهندس…

المهندس منسي : لو مش هي مش هقولك، إنما هي وعندنا منها كميات كمان

العميل : طيب بإذن الله إحنا عايزين كمية، أقل حاجة هنبدأ بـ 10 بس، بس عايز أعرف هي هي اللي هتناسبني ولا لأ؟

المهندس منسي : آه… هي اللي هتناسب حضرتك لأن هي…

العميل : بص حضرتك…

المهندس منسي : بنعملها تطبع على الكراتين، وتطبع الشكاير، وتطبع كل ما هو منتج مش عارفين نوصله في الطباعة…

العميل : الله ينور عليك، بس كده

المهندس منسي : آه هوه ده

العميل : يعني معلي معايا البتاع مش هتيجي لا سلك سكرين ولا… وهو راكب

المهندس منسي : هوه لو قلتله في التليفون هيقولك هاه… بتقول إيه؟؟؟ هتروح هناك وتكلمني هوصفها له هيعرفها على طول

العميل : طيب ماشي يا فندم، بس أهم حاجة عشان ما أنزلش عشان جاي من العريش بكره بقابل طبعاً كماين وبتاع، فعايز أوصل على طول على الهدف على طول، يعني أقوله 1 ـ 2 ـ 3 يقولي خد

المهندس منسي : ماشي يا غالي

العميل : ماشي يا فندم، ابعتلي بس حتى ولو العنوان تفصيلي والرقم بتاعه عشان أعرف أتواصل معاه بس

المهندس منسي : إن شاء الله

العميل : ماشي يا فندم، شكراً جزيلاً

المهندس منسي : مع السلامة

العميل : مع سلامة الله