ماكينة لحام اغطية عبوات الكريم بطبقة الفويل من شركة المهندس منسي
العميل : السلام عليكم
مهندس منسي : وعليكم السلام ورحمة الله وبركاته
العميل : شركة المنسي مش كده ؟
مهندس منسي : ايوه
العميل : من فضلك انا بسأل انا عندى علب كريمات وعايزة اقفلها من فوق بطبقة البلاستيك ديه او بطبقة الفويل اللى بتغطى الكريم قبل الغطاء البلاستيك عندكم من الماكنة ديه ؟
مهندس منسي : اه
العميل : هى اسمها ايه ؟
مهندس منسي : عندنا نوعين
العميل : اه
مهندس منسي : عندنا لحام حرارى وعندنا
العميل : اللحام الحرارى هو ايه الفرق بينهم
مهندس منسي : ديه طريقيتن ديه طريقة وديه طريقة تانية
العميل : يعنى ايه الفرق يعنى هما الاتنين فى الاخر بيدوا نفس النتيجة ؟
مهندس منسي : اه
العميل : ولا ديه حاجة وديه حاجة ؟
مهندس منسي : اه هما الاتنين بيدوا نفس النتيجة
العميل : طب يعنى ايه الفرق ما بينهم ؟
مهندس منسي : الفرق بيبنهم ديه بتبقي متغطية وانت مبشتوفيش الالمونيوم وهو بيتلحم اما الحرارى بتشوفي عملية اللحام
العميل : طب بس كده ديه سعرها كام وديه سعرها كام ؟
مهندس منسي : الاتنين بسعر واحد
العميل : وهما الاتنين اللى الدائرة ديه ممكن اكبرها وممكن اصغرها حسب حجم العلبة
مهندس منسي : اه اه
العميل : ولا لا ؟
مهندس منسي : انا انا ، هو المفروض هتروحى تعقدى مع بتوع المبيعات هتاخدى معاكى عينات وتشوفى اللى انتى عيزاه ..
العميل : انا فى اسكندرية
العميل : انتوا ليكم فرع هنا فى الاسكندرية ؟
مهندس منسي : انشاء الله قريب اوى
العميل : طب انا كنت بسأل عليها عشان انا عيزاها فهل انا لازم اجى القاهرة ؟ ولا ممكن تبعتهالى وانا ادفع الفلوس ؟
مهندس منسي : والله لو عايزة حد يشحنهالك مفيش مشكلة ممكن تدفعى الفلوس واحنا نشحنهالك ، وممكن توصيه يعملك فيديهوات عليها
العميل : تمام طب هو حضرتك اللى بتكون مسؤل عن الاوردر ؟ ولا اكلم حد تانى
مهندس منسي : الشركة اللى هى مسؤلة عن الناس …
العميل : امال حضرتك مين ؟
مهندس منسي : الاستشارى بتاع الشركة
العميل : اهلا بحضرتك
مهندس منسي : اهلا وسهلا
العميل : طب بالنسبة للجزء اللى فوق ده انا بجيبه منين ولا هو بيكون معاه ؟
مهندس منسي : عندنا برضه
العميل : بكام هو ؟
مهندس منسي : هو مش بكام هو بيتحدد على حسب الكمية وعلى حسب القطر وعلى حسب الكمية اللى حضرتك عيزاها
العميل : يعنى باخد رول يعنى بيتباع برول انا معنديش خبرة على فكرة فممكن حضرتك تدينى التفاصيل
مهندس منسي : لو عايزة رول مفيش مشكلة لو عيزاها متقطع برضه مفيش مشكلة
العميل : طب هو ده بكام وده بكام ؟ هو بيبقي كام متر ؟ يعنى ادينى التفاصيل بتاعته . وبيبقي خامات ولا كله بيبقي خامة واحدة
مهندس منسي : اه طبعا بيبقي خامات ، خامات الومنيوم وفويل
العميل : هو فى بلاستيك منه ولا كله الومنيوم وفويل ؟
مهندس منسي : فى بلاستك منه اه
العميل : سعره كام ، ده كام وده كام ؟
مهندس منسي : ما هو بقولك لحضرتك ده حسب الكمية وحسب القطر وحسب الشكل ولو عايزاها رول بيبقي حاجةليه وضع ولو عيزاه قطع بيبقي ليه وضع تانى ، لو رول مثلا بتقولى ليا الكمية بتاعتى كذا والقطر بتاعى كذا واللوائح وبناء عليه بنحدد ولو مش عارفة اللوائح احنا بنرشح ليكى بس حضرتك تبعت لينا كذا عبوة واحنا بنلحم عليها وبنجرب وبنقولك الانبوبة ديه اللى نجحت معاكى كذا .
العميل : حسب اللى انا هبيعه فيها ولا حسب العلبة يعنى انا عندى الحلاوة اللى بتزيل الشعر وعندى كريم للشعر .
مهندس منسي : اه
العميل : فده هيمشي معاه نفس ده ولا بيبقي الحجم مختلف ؟
مهندس منسي : ممكن هما الاتنين انشاء الله
مهندس منسي : احنا بس المشكلة عندنا فى الاحماض والقلويات .
العميل : اللى انا بستعملها هى ديه اللى بتحدد ؟
مهندس منسي : اه ، اما بالنسبة للكريم مفهوش مشكلة وبالنسبة للحلوة بتاعة ازالة الشعر مفهاش مشكلة خالص.
العميل : طب هو الموضوع ده بياخد وقت قد ايه ؟ عشان اقدر احدد الماتريل بتاعتى
مهندس منسي : لو تقدرى تتعبي نفسك شوية وتجيبي حاجاتك وتجربي ديه وتجربي ديه وتعرفي الحاجة المناسبة وانتى واقفة كل حاجة بتنتهى .
العميل : هو ممكن اخدها وانا واقفة ؟
مهندس منسي : طبعا ممكن تاخديهم وانتى واقفة
العميل : وانتوا مكنكم فين فى القاهرة ؟
مهندس منسي : احنا عندنا فى حدائق القبة ، باب الشعرية ، مدينة نصر و6 اكتوبر
العميل : تمام وبتكون موجودين الجمعة والسبت .
مهندس منسي : لا الجمعة اجازة يا افندم
العميل : الجمعة اجازة
العميل : طيب معلش اخر حاجة هى الماكينة سعرها كام ؟
مهندس منسي : هى سعرها يعنى مصرى 3200
العميل : وهى موجودة دلوقتى ولا بالطلب ؟
مهندس منسي : هى موجودة بضاعة حاضرة
العميل : 3200 جنيه
مهندس منسي : اه
العميل : موجودة ؟
مهندس منسي : اه بضاعة حاضرة
العميل : يعنى ايه ؟
مهندس منسي : بضاعة حاضرة يعنى موجودة
العميل : اه اخدها وانا ماشية
مهندس منسي : اه تاخديها معاكى عادى مفيش مشكلة خالص
العميل : طب تمام
العميل : معلش اخر حاجة اعذرنى ، اسعار الرول ده الرينج بتاعى سوا متقطع سوا رول مش متقطع يعمل من كذا لكذا ؟
مهندس منسي : ممكن تاخدى بكرة توزنيها ممكن مثلا الكيلو يعمل معاكى فى حدود 40 جنيه
العميل : اللى هو الرول ولا الكيلو ؟
مهندس منسي : لا الكيلو ؟
العميل : الكيلو طب تمام ، وطبعا السعر اقل او اعلى حسب الخامة وحسب الرول ومتقطع ولا مش متقطع
مهندس منسي : اه اه يا افندم
العميل : تمام معلش ممكن اتشرف باسم حضرتك
مهندس منسي : المهندس منسي
العميل : نعم
مهندس منسي : المهندس منسي معاكى
العميل : ماشي شكرا يا بشمهندس كتر خيرك شكرا لحضرتك
