ماكينه الفلوباك لتعبئة الصابون من شركة المهندس منسي
العميل: باش مهندس السلام عليكم
أنا بتابع حضرتك على الإنترنت وكده بسم الله ما شاء الله عليكم، ربنا يزيدك يا رب، بالنسبة للصورة اللي أنا بعتها لك ديت ماكينة تعبئة المواد الصلبة زي البسكويت وكده، هي بخصوص الصابون اللي هي القطع التواليت، هي بتعبيه برده وبتغلفه ولا إيه نظامها، ولا هي ماكينة للتعبئة بس، تعبئة وتغليف فقط؟
وأنا ما أعرفش أنا آسف أنا أنا ما أعرفش إن عند حضرتك ماكينات برده لأن أنا الموضوع ده داخل فيه إن شاء الله وبدرسه دلوقتي حالياً بعمله دراسة جدوى وكده موضوع الصابون التواليت ده، لأن أنا أصلاً موزع في مصر
فعايز لو تكرمت يعني ابعتلي بس تسجيل واحد فيه نظام الماكينات اللي عندك، دي بتشتغل إيه، ودي بتشتغل إيه، دي وظيفتها إيه، والسعر وكده
وبالنسبة لخط إنتاج الصابون إنت ليك فيه برده، تعرف تشوفلي الموضوع ده ويتكلف كام… يعني فاهمني، متشكر جداً لحضرتك
المهندس منسي: هوه بالنسبة للمكنة دي تقدر تعبي وتغلف عليها الصابون، ولكن الصابون المدور لو فيه براح في الكيس عادي تقدر تشغلهولك، وفي مكنة تانية اسمها مكنة الفلوباك دي أفضل حاجة للصابون لأنها تقدر تعملك كل المقاسات وكده
بالنسبة للصابون اللي حضرتك عايز خط إنتاجه، إنت عايز خط إنتاج صابون صلب ولا عايز خط إنتاج صابون سائل؟
العميل: لا يا باش مهندس صابون تواليت صلب للبشرة وكده
ماكينات تعبئة الشامبو عرفني الأسعار برده، يا ريت لو تكرمت تبعتلي الصور بالأسعار، وتعرفنا موضوع خطوط إنتاج الصابون ديت نظامها إيه، وبتتكلف كام، وتتراوح من كام، والخامات بتيجي منين وكده، لأني أنا عندي فكرة عن الصابون النابلسي بيتفرش في الأرض ويتعمل كخلطة وكده، وبعدين بختمه، حوار يعني، أما بالنسبة للصابون بتاع الفنادق والمصانع وكده اللي هوه خطوط الإنتاج بتاعت الشركات والمصانع وكده ده عندي فكرة إن هوه في مكن بيعملوا على طول، بينشف وبيتعبى أوتوماتيك يعني، فأنا عايز أعرف ده نظامه إيه عند حضرتك يعني، عندك فكرة وبيتكلف كام، ونظامه إيه، والخامات بتيجي منين، كده يعني
وبالنسبة للرولات برده بتاع الصابون اللي هوه الغلاف بتاع الصابون نفسه بتيجي نظام رول ولا إيه… كل ده عرفني على الموضوع كله بعد إذنك والله، الموضوع أنا بدرسه يعني كاملاً يعني
يعني قصدي خط إنتاج يكون مصغر لإنسان مبتدئ فاهمني حضرتك، مش خط يكون كبير ضخم مصنع كده وكلام من ده، لأ يعني خط إنسان مبتدئ طموحه يبقى بعد كده نظام مصنع بس هوه طبعاً
يعني معلش آسف على التطويل جداً جداً جداً وآسف على وقت حضرتك، بس إنت عرفني من الألف إلى الياء في موضوع الصابون التواليت ده، أنا داخل في موضوع مستحضرات التجميل عموماً، أما موضوع الصابون دوت أنا كنت بدرسه وبرجع منه، بدرسه وبرجع منه، بقرب منه وبرجع تاني لأني أنا في دماغي إنه ممكن يكون موضوع فيه شويه لخفنه وصعب وكده، فأنا عايزك معلش بعد إذنك هل في مكن 2 × 1 يصنع ويعبي في نفس الوقت؟ ولا مكنة منفصلة زي الفلوباك اللي حضرتك بتتكلم عليها للتعبئة والتغليف، والمكنة اللي هي نفسها اسطمبة الصابون نفسه اللي بتقطعه، والخامات بتيجي منين، والرول بتاع الصابون… الرول بتاع الصابون أمره سهل يعني المطابع عندنا مطابع غباشي ومطابع الشنواني والناس دي، بس أنا بتكلم على أهم حاجة في الموضوع يعني خط إنتاج يكون مصغر بتاع إنسان مبتدئ يعني
فتعرفني الموضوع كله وتقولي يتكلف كام عموماً وأشوف وأدرس الموضوع، أما موضوع عبوات الشامبو دي فأمرها سهل إن شاء الله أنا في زيارة هنا في السعودي 3 شهور الحمد لله ربنا كتبلي الحج وكده وقريب إن شاء الله راجع، ممكن شهر أو أكتر من شهر بالكتير خالص، فعايز أبدأ في الموضوع لأني كنت شغال مندوب في مصر أصلاً
المهندس منسي: هوه عدد المكنات اللي حضرتك عايزه كتير، فده هيبقى صعب عليا إن أنا أقعد أبعته في الشات، فحضرتك تابع مع الشركة على الإيميل اللي أنا بعته لحضرتك دلوقتي
العميل: حاضر ماشي
ا
