مكنة فاكيوم لتفريغ الهوا من المنتج من شركة المهندس منسي
العميل : السلام عليكم
المهندس منسي : عليكم السلام ورحمة الله وبركاته
العميل : إزيك يا أستاذ
المهندس منسي : أهلاً بيك
العميل : في عندكم مكن ضغط وشفط؟
المهندس منسي : حضرتك عايز تضغط إيه بالضبط
العميل : أنا عندي مصنع مبيدات زراعية
المهندس منسي : آه إنت عايز مكنة فاكيوم تفرغ الهوا من المنتج
العميل : آه.. هي عامله كام؟
المهندس منسي : في حدود
العميل : يعني كام مصري؟
المهندس منسي : ثانية واحدة كده لما أحسبها لك 9000 جنيه
العميل : طب حضرتك معلش أنا عايز أعمل دراسة جدوى للمصنع كامل؟ عايز أشوف إيه المكن اللي إحنا عاوزينه
المهندس منسي : هوه على العموم المكن موجود بضاعة حاضرة
العميل : إنتم عندكم مكن التغليف بس؟
المهندس منسي : مكن التعبئة والتغليف و…. هوه إنت عايز مكن إيه تاني غير مكن التعبئة والتغليف؟
العميل : عايزين في مكن ضغط هوا
المهندس منسي : آه عندنا آه
العميل : لأ مش تغليف شفط الهوا….
المهندس منسي : مكن تقليب آه، اسمه هوموجلازير
العميل : اسمه إيه؟
المهندس منسي : لا هوه أنا أقولك تروح تلف تسأل… لا يا عم هوه اسمه زي ما إنت قلت
العميل : ليه يعني…. هنسرق منك الكلام… إحنا دلوقتي عايزين نعمل دراسة جدوى، ماشي
المهندس منسي : اسمه هوموجلايزر
العميل : نعمل دراسة جدوى عشان أنا دلوقتي عايز المكن، طب المكن ده يعمل كام فلوس؟
المهندس منسي : الميكسر يعني، ما هوه طاقات إنتاجية، هوه أحسن حاجة تشرفنا بالزيارة تبص على المكن بضاعة حاضرة تتفرج
العميل : في مكن مستعمل عشان الإمكانيات يعني؟
المهندس منسي : آآآآآه والله يا سيدي كنت أتمنى أخدمك
العميل : عندكم منه مكن مستعمل؟
المهندس منسي : لأ هوه إحنا ما بنشتغلش في المستعمل خالص
العميل : آه هوه أنا عايز أعرف يعني النظام فلوس أد إيه فلوسه أد إيه كده؟
المهندس منسي : اعرف.. اعرف… تعالى اتفرج على الحاجة وشوف واعرف
العميل : يعني لما يكون معايا مثلاً 30000 جنيه يجيبوا الحاجات ديت؟
المهندس منسي : إن شاء الله، يجيبوا و تبقى فلة
العميل : يعني 30000 جنيه يجيبوا المكن كله
المهندس منسي : إن شاء الله
العميل : طيب ماشي، شكراً، السلام عليكم
المهندس منسي : مع السلامة
