مكنة لحام الأكياس بالهواء موديل 307 من شركة المهندس منسي
العميل : السلام عليكم
مهندس منسي : عليكم السلام ورحمة الله وبركاته
العميل : شركة المهندس منسي
مهندس منسي : أيوه اتفضل
العميل : معاك المهندس احمد شركة مصر للملاحات إسكندرية
مهندس منسي : أهلاً بيك
العميل : أهلاً بحضرتك، أستاذ إحنا في مكنة عندنا أكياس عرضها حوالي 60 سم سمك 180 ميكرون، عايزين نعملها لحام بولي بروبلين، فإحنا شفنا في مكنة لحام كويسة على النت عند حضرتك، تصنيع حضرتك ولا من بره؟
مهندس منسي : السمك بتاعها كام؟
العميل : 180 ميكرون
مهندس منسي : حضرتك لحمتها قبل كده في مصر الـ 180 ميكرون؟
العميل : لأ ده أول مرة مطلوب مننا حاجة جديدة، والمورد جايبها، المطلوب إن أنا أشتريله مكنة مقاسها 75 عرض× 70 طول، السمك 180 ميكرون بولي بروبلين شفاف
مهندس منسي : ماشي حاضر، ابعتلي بعد إذنك عينة ملموسة وإحنا نعمل التجارب عليها وإن شاء الله خير
العميل : يعني المكنة اللي على النت دي ما تنفعش؟
مهندس منسي : ما هي تنفع، بس إحنا عايزين برده نعمل عينة ملموسة بحيث إن إحنا نعمل تجربة عملية، ولا إحنا هنقول اه وخلاص، عايزني أقولك آه تنفع خد أهي، ولا ناخد ونجرب…
العميل : أصل أنا من إسكندرية، ماشي.. نجيلك مشوار القاهرة، طب سعرها بيعمل كام تقريباً؟
مهندس منسي : في عندنا مكنة بتعمل يعني في حدود 3000 وشويه، وفي مكنة بتعمل يعني 2500، ال بس اللي ولع الأسعار
العميل : طب ماشي اللي على الموقع دي رقم كام؟
مهندس منسي : ما هو اللي على الموقع أنهي؟؟ ما هو أنا عندي…
العميل : موديل 307 مكتوب أهي لحام 10مللي تحت ضغط الهوا، دي مناسبة دي؟ عايز عينة برده
مهندس منسي : آه إنت عايزها اللي هي بتلحم بالهوا
العميل : آه دي كويسة دي؟
مهندس منسي : آه ممتازة آه بس غالية
العميل : كام؟
مهندس منسي : تعملها في حدود 600- يعني في حدود 10000 ـ 11000
العميل : لأ 10000 إيه ده أكتر، آه 12000 صح، طب ما دي كويسة، دي مناسبة مش كده؟
مهندس منسي : ما هو حسب الخامة، هوه حضرتك لو تقدر تبعتلي خامة يبقى خير عشان نعمل عليها شويه تجارب، وبعدين أوردي هوه جايبهالك أكياس ولا جايبهالك رول وهيتفصل؟
العميل : لأ جايبهالي أكياس
مهندس منسي : أكياس جاهزة؟
العميل : آه
مهندس منسي : طب كويس
العميل : طب حضرتك مالكش حاجة في إسكندرية صح؟
مهندس منسي : لسه بنعمل المكان بتاعنا في برج العرب عندكم
العميل : آه… شركة المهندس منسي خلف قسم باب الشعرية
مهندس منسي : آه..
العميل : يعني لازم حضرتك نيجي لحضرتك ونجيب عينة معانا صح كده؟
مهندس منسي : آه يا ريت
العميل : البضاعة متوفرة ولا…
مهندس منسي : في متوفرة وفي تاخد أقصاها 21 يوم
العميل : صيني مش كده ولا تصنيعها…
مهندس منسي : لأ دي ماركة، يعني إحنا… أسلوب جديد في مصر، كل اللي في مصر يقولك صيني هولندي ألماني مش عارف إيه، لأ هوه إحنا زي الألماني والإيطالي اللي بيصنع لحسابه بره، يعني إحنا بنعمل رسوماتنا ونبعتها بره تتعمل قطع غيار ونجيب قطع الغيار ونجمعها
العميل : يعني صناعة مصري، إحنا عايزين صناعة مصري
مهندس منسي : النهاردة إن أنا أقولك صناعة مصري خالصة مخلصة يبقى أنا بكذب عليك
العميل : أنا فاهم يا بيه…
مهندس منسي : ولكن اللي عايزك تبص عليه وتشرف بلدك، يعني حاجة تشرف بلدك اكتب المهندس منسي في معرض الصين الدولي، إحنا كنا عارضين في الصين وبنافس في الصينيين والحمد لله حققنا نتايج عالية يعني، حققنا إقبال عالي يعني
العميل : تمام والله
مهندس منسي : فإحنا ماركة، براند، وكنا محطوطين في معارض بنافس في الماركات العالمية
العميل : آه.. كويس، الاتجاه بتاعنا إن إحنا نشجع المصري يعني إن شاء الله
مهندس منسي : لأ كون إن إحنا نقول إن في منتج مصري 100% يبقى إحنا بنكذب
العميل : صعب.. صعب…
مهندس منسي : مش صعبة، هاتلي بلد في العالم عندها منتج من عندها من الإيه تو زد، استحالة، مش هتلاقي، فالنهاردة التكنولوجيا الحديثة معناها إنك على الأقل خالص يكون 25-30% من بلدك، ولكن النهاردة الثينكر من بلدك والديزانير من بلدك، الليلة كلها، الثينكر يعني المفكر، والديزانير يعني الرسام من بلدك همه دول الليلة، النهاردة لما تروح تجيب الحاجة من ألمانيا وإيطاليا، بيبقى الثينكر والديزاينر بس هوه اللي إيطالي أو ألماني
العميل : بالضبط كده آه
مهندس منسي : يعني النهاردة تنزل أي معرض عندنا في مصر يقولك ألماني.. إيطالي.. مش عارف إيه، واقف إمبارح مع واحد بقوله إنت عارف ألمانيا بتصنع في الصين، قالي آه، قلتله الله؟؟ طب لما ألمانيا راحت صنعت في الصين إنت رحت جيبت من ألمانيا وصنعت في الصين، طب ما تطلع إنت على الصين دايركت، قالي لأ أصل الجودة مختلفة، الله.. طب ما تنقي إنت الجودة… هوه تاجر بيبيع ماركة وبس، فهمتني إزاي؟
العميل : آه
مهندس منسي : فيدوله دي ماركة، ومالوش دعوة، هوه ماله البلد تخرب، البلد تولع مافيش مشكلة، إن هوه يصبر ويعمل ماركة لأ.. هوه عايز النهاردة ينزل بـ 100 جنيه يجي بكرة يبقوا 110 مالوش فيه بقى، دول التجار والسماسرة
العميل : آه… والله إحنا حضرتك إحنا آخر حاجة إحنا كنا بنجيب مكن تعبئة سيفتي إيطالي، وبعدين اكتشفنا إن في مصريين مطلعين مكن تعبئة كويس جداً ورخيص جداً وشغال زي الفل، فاتبعنا إن إحنا نشتري المصري يعني، وربنا يسهل
مهندس منسي : عارف هتروح هيقولك الـ بي إل سي ألماني، والماتور بلغاري، و.. و… و… لازم الاتحاد، لازم.. لازم.. لابد
العميل : هوه حضرتكم مواعيدكم كل يوم مش كده؟
مهندس منسي : آه من 11-9
العميل : ماشي يا فندم، شاكرين جداً لحضرتك، شكراً، مع السلامة
