ماكينة تعبئة النيتروجين في عبوات نصف أوتوماتيك من شركة المهندس منسي

العميل : السلام عليكم

مهندس منسي : وعليكم السلام ورحمة الله وبركاته

العميل : أيوه يا باشا إزيك، معاك مروان من شركة دليشيا

مهندس منسي : أهلاً بيك

العميل : أهلاً وسهلاً يا باشا، بقول لحضرتك أنا كنت شفت عندكم مكن فاكيوم

مهندس منسي : آه

العميل : إحنا عندنا منتج بيتحط في كيس هوه عبارة عن شتيز كيك وفي حاجات وسلطات وكده، إحنا كنا عايزين مكنة تسحب الهوا من المنتج وتقفل يا إما الغطا يا إما زي البرطمان اللي هوه السلفانه اللي بتتحط من تحت الغطا

مهندس منسي : آه.. إحنا عندنا مكن فاكيوم بس بيشفط من الأكياس، مش بيشفط من العلب والعبوات

العميل : آه.. أكياس بس

مهندس منسي : إنما لو إنت عايز تحل الوضع، إحنا ممكن نعملك حاجة… إنت خايف من التعفن يعني؟

العميل : التعفن وعايز أزود الصلاحية، لأن الصلاحية بتاعتنا مدتها أسبوع، فطبعاً لو مافيش هوا بيخش المنتج ومحطوط في الثلاجة هيزيد، على الأقل هيبقى أسبوعين 3

مهندس منسي : آه الخامة اللي إنت هتغلف بيها إيه؟ خامة إيه بي إي تي ولا خامة بي في سي؟

العميل : بي في سي اللي هوه الغطا يعني؟

مهندس منسي : العبوة

العميل : لا العبوة إزاز، إزاز زي بتاع المربى

مهندس منسي : آه.. هوه الغطا أوردي عندنا، إنت عايز الغطا الألومنيا ولا الغطا التويست أوف…
العميل : لأ إحنا عندنا الغطا وعندنا الإزاز وكل حاجة، أنا عايز بس….

مهندس منسي : عموماً إحنا ممكن نعملك حاجة تانية فكر جديد يعني، دايماً عندنا الفكر الجديد والمتطور، إن إحنا ممكن نعبيلك مع المنتج نيتروجين

العميل : آه… نيتروجين هيعمل إيه مع المنتج؟

مهندس منسي : النيتروجين هيمنع… بص هوه السبب في تعفن المنتج وتطور البكتيريا جوه إيه؟؟ هوه الأكسجين أكتيف

العميل : آه…

مهندس منسي : فالأكسجين أكتيف دوت عشان نتغلب عليه بنحط النيتروجين، فالنيتروجين بيطرد الأكسجين ويبقى المنتج مع النيتروجين بس

العميل : تمام

مهندس منسي : فإحنا عندنا مكنة التعبئة اللي هتعبيلك النيتروجين، ممكن بعد ما تعبي المنتج بتاعك تعبي النيتروجين وتقفل على كده

العميل : يعني وهنحط من فوق اللي هي… وهنقفل بقى من فوق كمان، صح؟

مهندس منسي : آه بعد ما تخلص… بص إنت حطيت الشيكولاته بتاعتك

العميل : تمام

مهندس منسي : أو وات إيفر أياً كان المنتج، بعد ما حطيت المنتج أياً كان بتروح معبي نتيروجين مثلاً +10%، يعني مثلاً دلوقتي الفراغ اللي باقي 2سم، إنت بتحط مثلاً 2.2 سم

العميل : آه

مهندس منسي : بعد ما تحط 2.2سم بنروح حطين الغطا، فبيطر الـ + وبعد كده بيحافظ على النتيروجين اللي جوه

العميل : طب والنيتروجين ده صحي يعني على….

مهندس منسي : النيتروجين ده جاي من الهوا

العميل : يعني مش هيأثر على المنتج…

مهندس منسي : لا.. لا.. لا بيأثر ولا أي حاجة، وبتودي المنتج كأنه فريش لسه معمول دلوقتي، دي صيحة جديدة معمولة في العالم، يعني صيحة جديدة

العميل : طيب وحضرتك عارف برطمان النسكافيه أو برطمان النوتله

مهندس منسي : آه عارفه آه، اللي هوه الإزاز، إحنا اللي عاملين تعبئة وتغليف النوتله بتاعت مصر

العميل : اللي هي نوتله دي

مهندس منسي : اسمها فونتله… اللي همه الجماعة بتوع القاهرة الجديدة دول

العميل : طيب حضرتك عارف السلوفانه اللي شبه الفويل كده بتتحط من فوق ده؟

مهندس منسي : عارفها آه

العميل : قبل الغطا البلاستيك من فوق…

مهندس منسي : آه من عندنا آه

العميل : إحنا عايزين دي

مهندس منسي : آه عندنا برده

العميل : يعني نحط….

مهندس منسي : بص يا سيدي.. بص.. إنت دلوقتي حطيت المنتج بتاعك أياً كان المنتج، بتحطه وبعد ما تحطه بتحط النيتروجين، وبعد النيتروجين بتقفل بالغطاء القصديري اللي هوه الغطا الألومنيا دوت، وبعد كده بتقفل بالغطا العادي، ولو عايز تعمل سيفتي على المنتج في حاجة عندنا اسمها سليف سيفت شرينك، يعملك سليف كده على العنق بحيث إن المنتج ما حدش يعبث بيه

العميل : آه.. تمام، طيب الحاجة دي كلها طبعاً محتاجة تجارب يعني، هوه مكانكم فين بالضبط يا باشا؟

مهندس منسي : إحنا عندنا حدائق القبة، مدينة نصر، باب الشعرية

العميل : أفتكر مدينة نصر يكون أفضلنا يعني

مهندس منسي : مافيش مشكلة

العميل : طب التجارب دي هتاخد وقت ولا إيه المطلوب مننا أجيب….

مهندس منسي : هتجيب المنتج وتيجي في يوم سبت أو يوم ثلاثاء

العميل : تمام

مهندس منسي : هوه بس عشان اللي بيدير الفرع هناك نبدأ نقعد مع بعض وأعرفه الوضع إيه، لأنه هوه ممكن يكون عنده أبديتد العلم، وممكن ما يكونش عنده

العميل : طيب أنا هقول لحضرتك حاجة، أنا حالياً في إسكندرية، بس يوم السبت ممكن أبعتلك حد

مهندس منسي : مافيش مشكلة، أهم حاجة عندي العبوات والمنتج وإحنا نتعامل

العميل : أنا لو كده أنزل السبت ده هبعت لحضرتك المنتج بالعبوة بكل حاجة…

مهندس منسي : وإحنا ممكن نفتح معاك أون لاين وتبقى إنت شايفنا وإحنا بنعمل التجارب

العميل : تمام.. تمام.. زي الفل

مهندس منسي : إنت منين في إسكندرية؟

العميل : أنا من كفر عبده

مهندس منسي : فين دي من برج العرب؟

العميل : لا بعيد

مهندس منسي : آه.. هي كفر عبده دي قريبة من المنشية ووسط البلد

العميل : من رشدي آه

مهندس منسي : أصل إحنا أخدنا مكان عندكم في برج العرب

العميل : آه تمام منطقة صناعية دي

مهندس منسي : آه خدنا مكان هناك إن شاء الله قريب قوي هنبدأ نشتغل فيه عشان يبقى لينا فرع في إسكندرية

العميل : إن شاء الله يا باشا، لو احتجت حاجة هنا إحنا خدامينك يعني

مهندس منسي : والله محتاج محاسب ومحامي عشان يخلصولنا الأوراق، لو حد كده يعني أمين وكويس

العميل : الـ 2 موجودين

مهندس منسي : أهم حاجة الأمانة والأخلاق، أهم حاجة

العميل : موجودين، عندي محاسب طبعاً حضرتك قابله واتكلم معاه ولو استريحتله زي الفل إحنا شغالين ووالده شغال معانا يعني

مهندس منسي : طب ما تبعتله رقمه الله يرضى عليك

العميل : عنيا هبعتهولك

مهندس منسي : تسلم يا غالي

العميل : ماشي يا باشا، طب يوم السبت أبعتلك الحاجة على الساعة كام كده؟

مهندس منسي : أنا موجود دايماً من 5-11، هوه بص في الأول بس وأنا موجود، إنما بعد كده خلاص هتسستم العملية وهتتعامل مع المبيعات دايركت، في الأول بس أنا اللي هعملهم التجارب وأعرفهم هيعملوا إيه

العميل : ماشي أنا بس زي ما بقول لحضرتك أنا يوم السبت بس عشان إحنا مستعجلين على الموضوع

مهندس منسي : لا.. لا ما تقلقش خالص

العميل : إحنا بقالنا دلوقتي شهر وبس لسه بنظبط في حاجات فطبعاً عايزين ننجز الموضوع، يوم السبت هبعت لحضرتك حد وإن شاء الله لو كده أنا كنت في القاهرة يوم الاثنين لو كان يوم الثلاثاء ممكن أعدي على حضرتك أتشرف بمعرفتك

مهندس منسي : عادي أنا موجود يوم الاثنين في باب الشعرية

العميل : خلاص هوصل كده….

مهندس منسي : وموجود…

العميل : السبت بس هبعتلك عينات من الحاجة عشان بس السرعة

مهندس منسي : إنت تيجي تنورني

العميل : تمام…

مهندس منسي : ماشي يا غالي

العميل : وهبعتلك دلوقتي رقم المحامي والمحاسب وحضرتك قلهم من طرف صلاح فؤاد

مهندس منسي : ماشي يا أ/ صلاح، أنا اتشرفت بمعرفتك، حضرتك شركة إيه؟

العميل : ديليشيا

مهندس منسي : ماشي يا غالي

العميل : تمام.. شكراً يا باشا

مهندس منسي : مع السلامة