أكياس وخامات الفاكيوم من شركة المهندس منسى

 العميل : السلام عليكم

المهندس منسى : عليكم السلام ورحمة الله وبركاته

العميل : شركة منسي

المهندس منسى : أيوه

العميل : معاك كمال الأجنبي من بورسعيد

المهندس منسى : أهلاً بيك

العميل : يا أهلاً بيك، إحنا دلوقتي جايبين مكنة فاكيوم وعايزين خامات

المهندس منسى : آه

العميل : حضرتك تنصحنا بإيه إحنا لسه ما اشتغلناش

المهندس منسى : عايزين خامات إيه؟

العميل : اللي ماشيه، أكيد حاجات مثلاً أطباق حاجات كده بتاعت كشري، الكلام ده كله

المهندس منسى : أنا ما أعرفش حضرتك عايز إيه، حضرتك شوف الخامات اللي إنت عايزها وتعالى لنا بعينة وإحنا نقولك آه الخامة بتاعتها كذا

العميل : ما هي العينات اللي قدامنا في السوق يا باش مهندس اللي هي العبوات

المهندس منسى : آه في أكتر من 5-6 آلاف عينة

العميل : اللهم صلي على النبي

المهندس منسى : فأنا من الصعب عليا إن أنا هخمن إيه العينة اللي في دماغك، فحضرتك مشكوراً بتنزل تختار العينات بتاعتك وتيجي تقولنا أنا عايز زي دي تجيبها عينة ملموسة، تقول عايز زي ده نقوم نجيبلك الخامة بتاعتها اللي تنفع ليها

العميل : ما هو أنا على أساس كنت عايز أضرب حسبتي يعني الماتيريال هيبقى كام، والربح كام والكلام ده كله مش عارف

المهندس منسى : آه…… أنا دوري إن أنا أديلك خامة، مش دوري إن أنا أحسبلك حسابك كام

العميل : أكيد أنا عارف

المهندس منسى : دوري إن أنا أديلك خامة وأبيعها لك، أنا مش مكتب دراسات جدوى

العميل : أيوه أنا فاهم الكلام ده كويس، بس بقول ممكن بخبرتك ولا كده الحاجة اللي ماشية إيه وسعرها إيه كده

المهندس منسى : آه… بص يا أستاذ أشكرك إنك شايف إن أنا يعني… ولكن هوه أنا ببيع مكن وببيع خامات وبس

العميل : تمام

المهندس منسى : أما الجهات التسويقية ديت مش تبعي، يعني لا يكلف الله نفساً إلا وسعها

العميل : تمام ونعم بالله

المهندس منسى : فهبقى بتاع خامات، وبتاع مكن، وفي نفس الوقت كمان هبقى بتاع بيع… إيه هبقى أنا المخرج والممثل والمؤلف والمشاهد….

العميل : ربنا يديك الصحة يا سيدي

المهندس منسى : الله يبارك لك

العميل : ربنا يعزك، يعني لازم مشوار نجيلك.. إنت عارف المشوار ببيبقى صعب شوية

المهندس منسى : إنت كل العملية إنك تروح تشوف العينات اللي هتمشي معاك في السوق إيه

العميل : آه…

المهندس منسى : وبعدين بعد ما تخلص تسويق وتخلص تجيب العينة دي وتقولي أنا عايز الخامة دي بس

العميل : تمام… طب بالنسبة للسكينة بتاعت القص عندك ولا…

المهندس منسى : عندنا آه

العميل : يعني ممكن مثلاً لو جيبت العينة تعملي السكينة برده؟

المهندس منسى : آه إن شاء الله

العميل : إن شاء الله، طبعاً أنا شفت الكلام في باب الشعرية خلف قسم باب الشعرية مش كده

المهندس منسى : آه أنا هبعتلك تليفون المبيعات تتابع معاهم

العميل : خلاص أوكيه إن شاء الله هجيلك بإذن الله حاضر، شكراً يا باش مهندس، المهندس منسى : مع السلامة